ESEKIELI 14 - Biblía Axweesantá Hhohho' ar Mungú 2004

Mungú i sluufmisuú slaqsa'aá munguaá lu'umis

¹ Looarka wake bariisér múk Israeli ina haraxeér as iwa hara'ayár slaiya'.

² Naagáy axweesantá AAKOÓ MUNGÚ ana axaás, i kat,

³ «Heewí, mukwí muner'ín kaa óh nee slaqsa'aá munguaá hatlá', munguiiká' muu ngun gan'amisiyá' baraá tlakweema. Xáy, iqo hariínda tiwa hara'ayárí leehhi nee mukwí?

⁴ «Inooín baweek, anuú Aakoó MUNGÚ a kah, Heé baraá tla/ángw múk Israeliwo oo muunaáwós ta hatsís nee slaqsa'aá munguaá hatlá', nee gari ló'wa ya/án kuwa gan'amisi nee munguiiká tleehhmaá' tlákw ngiwa tleehhi, aluuwo tari daqáy dír aarusmo as iwa hara'ayár leehhiya', anuú AAKOÓ MUNGÚ in mu/aywaáts, ar mu/aywatstá qoom tam dír slaqsi'ii'ín kudá' yaariire.

⁵ Aníng múk Israeli u mune kwatiít as aníng iwa i ki/iya', asma inooín taa saweés dir'eene as slaqsi'iidá' mungui ngiwa sluufmisuú ayé'.

⁶ «Gimáy, múk Israeli baweek, Aakoó MUNGÚ i kaahi, ‹Hhu'uu'umé' nee slaqsi'iidaá munguaá hatlá' mawaak sluufmisuwo. Muruú aníng i buhhtamís mawaak tlehhtuwo.›

⁷ «Umuú qoomaaro, hee tam gaalá dír múk Israeliwo, laqaá dahaaymo oo yaamaá Israelír wa hoót, birta paraátl dir'eene, nee barnaxes slaqsa'aá munguaá hatlá' giri haratlintií' ar ilakaahara, nee tlakweemaaká' tari dukuutsmo dír án nee inose, aluuwo iri daqáy dír aarusmo as ngiwa xu'utír wa slai gár aníng ni kah, naagáy aníng AAKOÓ MUNGÚ, inós un mu/aywaáts.

⁸ Aníng nee inós ti araán. Aníng inós un laya tleéhh nee slaqsaay, aníng un hingeés baraá tla/ángw xooror'eene. Diirí an didá' kawa tsaahhi adór aníng tár AAKOÓ MUNGÚ.

⁹ «Nee barnaxes aarusmoosíng kwa al/aáy gaa gari oó', daqaní anuú AAKOÓ MUNGÚ ugwa al/aáy. Aníng dakw'eene aarusmoowí un hingeés dír muk'eé' oo Israeliwo.

¹⁰ Aarusmoowí aníng u sakwasleemuút dinkwa nee heedaádá' kangw'eé' ngwa yaahasár ayi, sleémeero in dinkwaárií sakwasleemuút ar sakwasleemár wák.

¹¹ Adoorí an tleéhh as múk Israeli miwa malé geexáy, tari kilooín slasla/aresiyá' ar tlakweemaaín kiwa tleehhi, as inooín tawa muk'eé' nee aníng tawa Munguúín. Anuú Aakoó MUNGÚ tí aga oó'.»

Noa nee Danieli nee Yobu

¹² Axweesantá AAKOÓ MUNGÚ ana axaás, i kat,

¹³ «Heewí, barnaxes xoororka tlakweema gaa tléhh as inkihhimu wasle dir'eene, aníng dakw'eé' nguri tleés gawaaín i aleeró, as ngiwa sakwasleemuut. Muruú /aymar'ín kudá' na amohhe'esiyé' un hhaamiís nee ngiri giyeédií huúw. Muu nee makay'ine ngiri tsuú/,

¹⁴ tam geera Noa, nee Danieli, nee Yobu in baraá yaamuuká' i diri'iia, inooín mukwí /iisaro ngu aleeslay'aaká, aqo har slafingw'ín ngun ba/amisiyá', as gan'amuuín kudá' i koná'. Anuú Aakoó MUNGÚ tí aga oó'.

¹⁵ «Barnaxes makaá sla/a awa xaraaslá' in ya/aawa muu nguwa /ayiya', na/ii'ín ngiri hayohiyá', yaamu niri deewaaiyá', nee heé waarahhamuú baraá yaamuudá' gu qiítl tumu wák iri kaahh as makaydá' xaraaslá'.

¹⁶ Tam geera mukwí tám bar in deero baraá yaamuukae, lo'o an /aáy ar umuueé', anuú AAKOÓ MUNGÚ, tam na/ii'ínaá kilá' /iisaro ngi aleeslay'aaká, tam na/oó garma laqaá oo dasi, aqo har inooín kilooín kin ba/amis, ala yaamuudá' aqo in deewaaiyá' adór panmo.

¹⁷ «Barnaxes aníng slaqwara an iimu/uuma dír yaamuukae ar muu nee makaywo kiwa hhaamisi.

¹⁸ Mukwí tám geera bar in baraá yaamuuká' i dirii'i, looeemaawo tam na/oó wák baraá na/ii'ine ba/amiisaro ngu aleeslayká, tam na/oó garma laqaá oo dasi. Inooín aqo har slafingw'ín kilós tu/uto ngun aleeslayá'.

¹⁹ «Laqaá barnaxes pu/i ngin huwa gawaá daanduú yaamuuká', nee buhhtaaeene muu nee makaywo ngiri tsuú/,

²⁰ tam geeraawo barnaxes Noa, nee Danieli, nee Yobu in baraá yaamuukae, adór anuú Aakoó MUNGÚ nirqo hotaatina, ar ló', tam na/oó wák oo garma laqaá oo dasi oo ta ba/amiisi i kaahh. Aqo har inooín slafingw'ín kilós ngun /iisiyá', asma gan'amuuín kudá' ta kon.

²¹ «Ala anuú Aakoó MUNGÚ a kah, qoomár bar Yerusalemu aga slaáhh ar muruuwí tsiyáhh oo sakwasleemar'eé' tidá' ló'wa xaraasl, ngiri sakwasleemuút ar slaqwara nee qwari, nee makaá xaraaslá' nee tiqtír pu/i, as muu nee makaywo ngiwa hhaamiis baraakae.

²² Ala tam adoorihe, barnaxés múk niiná i slafíngwí meet, na/ii'ín awa daaqaay nee awa dasuuwo ngiri amoorók i huwiyé', Esekiéli, kuúng aqo tsáhh adór kir tlákw ló'wa ale, tari ya/aán adór sakwasleemarír daanduú Yerusalemu ir hariín.

²³ Tlehhmi'ii'ín nee adór hotaarir'ín ngi dirók i geehhoeesiyá' adór kaangwí tlákw daanduú gixsarihe ngura tawo tleehhiiká. Anuú Aakoó MUNGÚ tí aga oó'.»