ESEKIELI 13 - Biblía Axweesantá Hhohho' ar Mungú 2004

Aaruusér lamuuse

¹ Axweesantá AAKOÓ MUNGÚ ana axaás, i kat,

² «Heewí, aaruusér lama ar múk Israeli iigahhaateek, tidá' inslawoó sager'ín kah, muruú aníng naa oiiká, kibeeto, ‹Gár anuú AAKOÓ MUNGÚ ni kah iiárií qaasaak.›

³ «Aníng Aakoó MUNGÚ a kah, ‹Tsaxwaahúng, kuungaásingaá aaruusér daktana, tidá' inslaway'ín nee iigu'utuuín eeharahar.

⁴ Aaruuserhúng, kuungá' múk Israeli, a adór intsaawér baraá sluhháy wa hi'iimiit.

⁵ Inooín wa/aameedá' aa fee/it baraá koo/iro nga xun'iiká, laqaá koo/ír /aben ngi tlehhitiaaká as múk Israeli nguwa /is qoomár slaqwaraaro, baalaadá' anuú AAKOÓ MUNGÚ naa qoomeesi.

⁶ Iigu'utuuín a lamtá tawo, nee inooín gár i aariirina' a al/aymár tawo. Inooín ngiwa xuiya' in axweesiyá' kitángw anuú AAKOÓ MUNGÚ wa aleeró, ala aníng ngaa ya/aawiiká, slamí inooín ngi xuiya' aníng tidá' i aariirina' a boo/eés.

⁷ Xáy, aníng kuungá' nu yaahaás, iigu'utuú lamtá tawo ugwa kati'iikáhe, nee aarír al/ayma aga oiindí'iíke? Kuungá' a kata' an axwesá' ar umuueé', tam aníng kuungá' naa baloó ádbawiikahe.›

⁸ «Gawaá adoorihe anuú Aakoó MUNGÚ a kah, ‹Axweesantahúng a al/ayma nee iigu'utuhúng a lamtá tawo. Gimsé', aníng nee kuungá' ti araán. Aníng Aakoó MUNGÚ tí aga oó'.

⁹ Aníng kuungá' nu alwarqáw muxtaaro, kuungaákaá aaruusér iigu'utuú lamtá ara'ará', nee aarír kudá' al/aymár kaahá'. Kuungá' a burumburita'aaká dír dinku'uumár muk'eene, laqaá tundu harafariiká baraá múk Israeliwo, laqaá sleeme a dat'aaká baraá yaamaá Israeli. Daqaní adoorihe kuungá' a tsahhá' adór aníng tar Aakoó MUNGÚ.

¹⁰ «Aaruuseerí i muk'eé' qwaareemís nee ngun babaya', ‹Wayda i deer,› ala laatí wayda iqo kaahh. Muk'eé' ta koo/ír qoomaaká tlehhiit, slám kan /awakeemiis.

¹¹ Hám daxta aaruuseerí koo/ír /awakeemiis baweek, tluwoó yaariír oo tlaa/e nee oo dukitá koóm ngu huúw, koo/isíng gari yaamií daahh.

¹² Xáy, qoomár koo/idá' bira hú', kuungá' muu nuqo yaahaásiíke, ‹Da/araadá' taa koo/ír ar sliké' i amoomá?›

¹³ «Gawaá adoorihe, anuú Aakoó MUNGÚ a kah, ‹Asma daanduú buhhtaeene aníng bambaao nee tluwoó tlaa/e oo úr ngu huúw, nee koo/i kari yaamií daahh.

¹⁴ Koo/irí kuungá' taa /awakeesé' a amór saáw i daáhh nee maparirós iri geehhoouúr. Koo/irí bira hú', kuungá' nuri alqát tari hhaandá'. Daqaní adoorihe kuungá' a tsahhá' aníng adór tar AAKOÓ MUNGÚ.›

¹⁵ «Buhhtaaeé' in faák gawaá daanduú koo/irí nee daanduú mukdá' gaa /awaakees. Kuungá' tunduri bay, koo/idá' i káhh, nee mukdá' sleeme gaa /awaakees i kaahh.

¹⁶ Gaarí a alhhe'eesoó aruuseedár Israeli aa aariin nee iigu'utuú wayda gwa aan daanduú Yerusalemuro, ala wayda iqo kaahh. Anuú Aakoó MUNGÚ tí aga oó'.»

Daanduú aaruusér /ameena

¹⁷ Gimáy daxta, heewí, warqáw amór /ameenadá' aariiriim ar mukók, tidá' aariiriim daanduú inslaway'ine. Aariím daanduuine,

¹⁸ tawa kat, «Aakoó MUNGÚ i kaahi, ‹Tsaxwaahúng kuungá' awa /ameena, kudá' hirísír hiriitá' nee kay dahamisá' baraá dabér muu, nee kuungaáká' sheélár taa hirísáy hirité' ar umuú adooro as muu kuwa sage warqesa'. Xáy, kuungá' tawa slafíngw muk'eé' gigidiinda', kawa xuá' slafingwhúng u kiloohúng /isá'a?

¹⁹ Aníng kuungá' iga ló'wa /ooslisliindé' dír geeraá múk wa alé, as tsa/oó wák oo puuruú angaanoó shayiíri kuwa sleera' nee muruú /aymár niiná. Kuungá' múk tsu/utaro harimaaká una tsu/é', nee kudá' tsu/utaaro hariím una meeré' tsu/utaaro. Muk'eé' ugwa lameemaá babeeré', nee inooín lameemoohúng nga haratlinti'iyé'.›

²⁰ «Gawaá adoorihe, gimsé' anuú Aakoó MUNGÚ a kah, Aníng hirísayhúng kudá' taa tsegaagité' gawaá muu, ugwa hingeés gawaá dabaahunge, nee muk'eé' kudá' ta gigidiinda' i gweerimiit adór tsir/ór wa aleeró.

²¹ Tlabaahúng kudaá sheéla i feehhamiís, nee muk'eé' nguri tuú/ gawaá dabaahúng wa alé. Inooín i ki/iiaaká adór muruú taa slakaát wa aleeró. Daqaní adoorihe kuungá' a tsahhá' adór aníng tar AAKOÓ MUNGÚ.

²² «Kuungá' múk hota ganaá' ugwa daba' tlaqé' ar lameemoohúng, oo aníng naa diqiya' tsatiiká, nee múk tlákw kuri /uurií hanisé', tlakweema tlehhtuuwo tari kumiít, nee slafingw'ín kuri ba/amisiiká.

²³ Daxta kuungá' iigu'utuú al/ayma u malé aanda'aaká, laqaá a malé aariinda'aaká. Aníng muk'eé' u ba/amís gawaá dabaahunge. Daqaní kuungá' a tsahhá' adór aníng tár AAKOÓ MUNGÚ.»