ESEKIELI 12 - Biblía Axweesantá Hhohho' ar Mungú 2004

Aarusmo a adór heé aa goow

¹ Axweesantá AAKOÓ MUNGÚ ana axaás, i kat,

² «Heewí, kuúng dír ta hot a dír tla/ángw múk aa dee/anumiit. Inooín i ilaá koná' ala i xumisiaaká, i iaá koná' ala i axamisiaaká.

³ «Inooín a múk aa dee/anumiit. Gawaá adoorihe, heewí, gimáy, adór heé lóh tleehheek, tláw qoomár inooín bir kuúng ga/ayá', ta góp dír hatlá' i aleeró. Tláw adór heé aa tlatlaahh dirkár wa alé ay dír hatlá' geeraá ilaaín wa alé. Dooqa ngi tsaahhiyá', tam inooín a múk aa dee/anuuti.

⁴ Gár ta harmaagahh a tí: Masók umuuqó gár ta tlehhita ka ga/áy. Xooslaarók tseegeek, ka tsee/ií dúx, slaqamiís nee heé tleemuú slaá' tsiindoowo, adoodá' múk lohuuse i tlehhahhiti.

⁵ Qoomár inooín barta xumiis koo/ír do'ók fee/eek, ta dír pa/angwdár ti'ít tsee/áy alé.

⁶ Qoomár inooín barta xumiis, huwaawók qaaseek gawaá suuma, nee qoomár iimi bira gíp ta tleér. Gitsee/awók tuuntuukeek, nee bar hi'iimít masók amór ta keer a ga/eeraaká. Adoorihe aníng kuúng un laya tleéhh dír múk Israeliwo.»

⁷ Naagáy adoodá' taa báy ngiri tleéhh. Baldae qoomár tlaatla/aango huwar'eé' ngiri tseék, adór huwár heé aa goow, tsiindowo koo/ír do' ngiri feé/, nee qoomár iimi iwa giwaagip niri ti'iít, huwar'eé' i gawaá suuma, nee muu sleémeero i ga/áy.

⁸ Matlaatlér taa kawaani, axweesantá AAKOÓ MUNGÚ ana axaás, i kat,

⁹ «Heewí, mukuú Israeli aa dee/anuut ugwa yaahasi'iikáhe daanduú tí taa tlehhi?

¹⁰ Gimáy kibeeto, Anuú Aakoó MUNGÚ a kah, ‹Kaangwí an kángw geeraaharusmoó gixsár Yerusalemu gu sláw, nee múk Israeli sleémeero kudá' baraaká' hoót.

¹¹ Kibeeto, kuúng an laya dir'ine, adoodá' taa tléhh an adoodá' tleehharuut dir'ine. Inooín ki huuw baraá loohaay, kiri ar tláy tawa haasaáng.

¹² Waawutmooín huwaarós ga gagaar qoomár xweeraawo, iri ti'iit as iwa gowi, koo/i gan fee/, iri tsee/ií ti'iit ar didá' gitsee/aawós gi tuuntuuk as yaamu mingiwa ár ilaawose.

¹³ Ala aníng tsaxweeli a qaás nee inós guri ót. Aníng nguri huúw Babuloni, yaamaá múk Kaldayo, inós amoodae iri gwaa', tam adoorihe yaamuudá' gi ariiká.

¹⁴ Eeharuuseerós sleémeero, múk inós gu hara'ayiím, nee slaqwaruuseerós sleémeero an tsee/áy tlatlahhaás, paángar'eé' an tuuntsiís ngiri aluú wa eehár.

¹⁵ «Qoomár bira diyaá/ baraá tla/ángw xoordaá hatlá', nee yaamaá saaw, an didá' aníng iwa tsaahhiya' adór tar AAKOÓ MUNGÚ.

¹⁶ Ala panoó niiná u meetiís baraá slaqwaraaro nee baraá qwarko, nee baraá tiqtír pu/ito, as kahhó' inooín adoodá' tlii/ naa tleehhiyé' ngiwa dír xoordií ooiya'. Diirí an didá' ngiwa tsaahhiya' adór aníng tar AAKOÓ MUNGÚ.»

Layár daaraxoó aarusmo

¹⁷ Axweesantá AAKOÓ MUNGÚ ana axaás, i kat,

¹⁸ «Heewí, muruú /ayma /ayeek nee ma'aay ki wát ar daaraxaay nee ar da'e.

¹⁹ Múk yaamuuká' baweek, Anuú Aakoó MUNGÚ a kah daanduú yaamuloouusér Yerusalemu, tidá' baraá yaamaá múk Israelír hoota, kaangwí baweek, Muruú /aymar'ín ku /aay ar dae, nee ma'aay kin wahán ar amoqwaqwadiingw, asma yaamuuín nin tawo meetiyá', asma umuú heewo a /aytusmo.

²⁰ Gixsadaá múk koomá' ki hhaamiis, yaamu niri deewaaiyá'. Kuungá' ka tsahhá' adór aníng tar AAKOÓ MUNGÚ.»

Axweesantá Mungú i bó/

²¹ Axweesantá AAKOÓ MUNGÚ ana axaás, i kat,

²² «Heewí, ahaá waáy gár axweesantí kas kaahi daanduú Israeliwo? Tí tawa kaahi, ‹Deelo nin hardarát nee iri waaráhh, ala iigu'utuú aarusmo i boo/iiká.›

²³ Muu baweek, Aníng Aakoó MUNGÚ a kah, ‹Axweesantí bo/ aa fák nee ka malé axweesiiká baraá yaamaá Israeliro.› Ki beer, qooma naa xeér ar iigu'utu sleémeero iwa boo/i.

²⁴ «Asma iigu'utuú lama laqaá múk tlaa/aá xuú' i baloó ki/iiká baraá yaamaá Israeliro.

²⁵ Anuú AAKOÓ MUNGÚ kilá' tidá' tlehharuut ngi geerií oó'. Tí ni hardát i baloó tligaká. Kuungá' múk aa dee/anuut qoomár slafingwhunge axweesantí naa káh a boo/eés. Anuú Aakoó MUNGÚ tí aga oó'.»

²⁶ Axweesantá AAKOÓ MUNGÚ ana axaás, i kat,

²⁷ «Heewí, múk Israeli ngi xui iigu'utuuwí oo deelór alaá saawá', nee aaru'uumarók qoomaarós ka ló'wa aluú i saaw.

²⁸ Gawaá adoorihe, ki beer, Anuú Aakoó MUNGÚ a kah, Axweesante'eé' tí i tligaká ala iqo bó/ sleémeero deeloorír kilae. Anuú Aakoó MUNGÚ tí aga oó'.»