ESEKIELI 11 - Biblía Axweesantá Hhohho' ar Mungú 2004

Tlakweemaá Yerusalemu

¹ Qeeruú Mungú iri gáwtí tleés, iri huúw ay dír afkú bihhaá da/aáw oo Doó Mungú. Didaádae múk mibeeri tsár nee kooán nguri ár, bahh alé a ín Ya'asaniya garmoó Asuri nee Pelatia garmoó Benaya, inooín a geeraharuusér múk Israeli.

² AAKOÓ MUNGÚ aníng iri báy, «Heewí, mukwí an kuduú muruú tlákw iimi/u/uúm, nee a múk hara'ayár qoomaaká hanmiís baraakaá gixsaro,

³ kudá' kaahá', ‹Qoomár do' tlehha aa xeeriiká. Gixsarí a adór hutlaay, nee atén a adór fu'unaay.›

⁴ Gawaá adoorihe, aariím daanduuine! Heewí gimáy, aariím!»

⁵ Naagáy qeeruú AAKOÓ MUNGÚ iri i hardáh iri báy, «Muu kubeeto, AAKOÓ MUNGÚ i kaahi, ‹Eeít, kuungaá múk Israeli gár ta aldakuta' a tí. Muruú baraá munerhunge ta kata' u xuú'.

⁶ Kuungá' múk yaariír ugwa tsu/é' baraá gixsarihe, nee lohuuwós iga dala/é' tu'uuine.

⁷ «Ala anuú Aakoó MUNGÚ a kah, Eeít, gixsarí a adór hutlaay, nee mukdá' taa tsuú/ a fu'unaay. Ala kuungá' a hariindá' tunduwa hingeesi baraá gixsarihe.

⁸ Xáy, kuungá' paánga a da'ayumitá'a? Gimsé', aníng paánga ngin huúw dirhúng i alé.

⁹ Aníng kuungá' nu duúx baraá gixsár wa alé, nee nuri qaás gawaá dabaá múk xoordaá hatlá', aníng kuungá' nuri sakwasleemuút.

¹⁰ Kuungá' tundu tsuu/ ar paánga, aníng kuungá' nu sakwasleemuút dír digimuú múk Israelír wa alé. Qoomaarí an qoomár kuungá' kawa tsahha' adór aníng tar AAKOÓ MUNGÚ.

¹¹ Gixsár Yerusalemu a adór hutlayhungeeká male alé, nee kuungá' a fu'unaay tleehhita'aaká baraá guruú gixsarihe. Aníng kuungá' nun sakwasleemuút dír digimuú múk Israelír wa alé.

¹² Daqaní kuungá' a tsahhá' adór aníng tar AAKOÓ MUNGÚ, kudá' kuungá' dabeerós taa eehadi'iiká, nee tidá' naa oó' aga boo/eesi'iiká. Ala kuungá' adoodár xoordaá hatlá', kudá' naa harweeriye' ir hotatina', ana tlehhé'.»

¹³ Qoomár niwa aaririim, Pelatia garmoó Benaya iri kahhuút. Aníng niri yaamií huú', niri gurúr qaát, niri /aá/ ar afór ur niwa kah, «Aá Aakoó MUNGÚ, xáy, paanaywí oo múk Israeli aa meet aqo un tsuwa fáka?»

Al'axweesantá Mungú dír múk baraá loohaay

¹⁴ Axweesantá AAKOÓ MUNGÚ ana axaás,

¹⁵ i kat, «Heewí, hhaeewók nee yaamuloouusér Yerusalemu kudaá hhaeewók daanduuwoge nee daanduú múk Israeli kuduú baraá loohaywo ta kaahi, ‹Kuungaákaá baraá looháy diriiá' tundu saáw dír AAKOÓ MUNGUHE, asma AAKOÓ MUNGÚ yaamuuká' nga atén i haniís tawa aaliirén.›

¹⁶ «Ala mukwí baraá looháy dirií' ku beer, Anuú Aakoó MUNGÚ a kah, Tam naa huwi baraá tla/ángw xoordaá hatlá', nee tam naa diyaa/i baraá yaamaá hatlá', tam adoorihe qoomaarír kilae aníng a dinkwa nee inooín, amoodá' i diri'iia'.

¹⁷ «Gimáy, daxta baweek, Anuú Aakoó MUNGÚ a kah, Aníng kuungá' nu burumbuúr amoodá' ta hota'a. Nu burumbuúr amór yaamuudá' nay diyaa/i, nuri ki/ís baraá yaamaá múk Israeli.

¹⁸ Kuungá' bar aga ki/é' baraá yaamuuhúng, aníng muruudá' slasla/arén un hingeés, nee kudá' sleémeero i buhhtamís un hingeés.

¹⁹ Aníng kuungá' nu muunuú /abén nee qeeruú /abén i haniís. Muunuúdá' gawít, adór tlaa/ano, un hingeés, nee muunuú wananaá' oo ilaiwa/ame nguri qaás,

²⁰ as kuungá' daber'eé' kawa eehada', nee tidá' naa káh kawa ilaiwa/a', kuungá' tari muk'eé', aníng tari Munguúhúng.

²¹ Ala kudá' muner'ín aldinkwa nee muruú slasla/arén nee oo i buhhtamís, i sakwasleemuút ar har qoomoó tlehhmi'ii'ín kudá' naa tleehhiyé'. Anuú Aakoó MUNGÚ tí aga oó'.»

Xirfuú Mungú Yerusalemu ngiwa geexáy

²² Qoomaarihe keruúbidá' hhaampi'ii'ín gina gwét as niwa /akumitiya' dinkwa nee /angeegéuudae, nee xirfuú Munguú Israeli i gawaaín i dirii'.

²³ Naagáy xirfuú AAKOÓ MUNGÚ iri tsa/án gáwtí alé amór tla/ángw gixsár wa alé, iri sihhiít gawaá tlooma, bihhaá da/aáw awa gixsa.

²⁴ Qoomár niwa baraá iigu'utuuwí dirii', qeeruú Mungú ina gáwtí tleés, iri huúw ay yaamaá Babuloni dír mukdá' baraá looháy dirií'. Naagáy iigu'utuuwí iri faák.

²⁵ Aluuwo mukdá' baraá looháy dirii' nguri kángw iigu'utueé' báw, kudá' sleémeero oo tinda laqán nee AAKOÓ MUNGÚ.