ESEKIELI 10 - Biblía Axweesantá Hhohho' ar Mungú 2004

Xirfuú Mungú aa quútl dír do'ose

¹ Aluuwo niwa gawaá doorií qaytsiít, gawaá sagér hhampe'eeraá keruúbi, gár sir/awaak ar slaqmís tlehhemko nee kitángw waawuti'iima ana ár.

² Mungú heedaáduú tlabaá neewór kitaáni guri báy, «Tláw baraá tla/ángw /angeegéuuduú bihhaá baraay awa keruúbi, tsa/aá dabaawók dalaa/eek gil'ór asltadá' baraá tla/ángw'íní diriia, daqaní ka tsaafís baraá gixsa.» Aníng nguri ár iwa tláy.

³ Qoomár heedaádá' iwa dáh, muruudá' ta bay keruúbi aa sihhiít bihhaá basa awa Doó Mungú, huunki afeenidár do' gari hatsís.

⁴ Xirfuú AAKOÓ MUNGÚ iri tláy dír keruúbír wa ale, iri hardáh ay gawaá maandár do'odá', nee afeeni iri háts gwa/aatemaá xirfuú AAKOÓ MUNGUHE.

⁵ Afór hhaampe'eeraá keruúbi kari amór afeenidár tsee/aá wá axaás. Afoodá' a adór axweesantá Munguú Aleesleemusmo.

⁶ Qoomár Mungú heedaáduú tlabaá neewór kitaáni gaa tsiit nguwa ádbáy, gil'ór asla ngiwa taataahhi didár tla/ángw /angeegeuú keruúbi, heedaádá' ina tláy iri sihhiít bihhaá /angegeeamoó wák.

⁷ Kerubumoó wák dakós guri loolooqós, gil'ór baraá tla/ángw keruúbi gari taataáhh, gil'o bahh'alé gari qaás gawaá dabaá heedaáduú tlabaá neewór kitaáni. Inós ngiwa ilaaóh iri tláy.

⁸ Keeruúbi slaqsay'ín an adór dákw hee bihhaá baraay awa hhaampi'ii'ine.

⁹ Ana qaytsiít, /angeegéuú tsiyáhh nguri ár, /angegeeamoó wák i bihhaá keruúbi. /Angeegéuuwí i ló'wa qwiirii/ adór tlaa/anoó miislír /awaak.

¹⁰ /Angeegéuuwí tsiyahhawo a slaqamiimís, nee umuú /angegeeamo kwaáo kuna qaás guruú kuqá' i alé.

¹¹ /Angeegeéuuwí sleémeero ina hi'iít bihhe sleémeerowo, sleeme aa warqayká, amoodá' /angegeeamoó geera aa xuú', aqo /angeegéuú hatlá' sleeme gana xuú'.

¹² Keruúbidá' daandemooín, dabaaín nee hhaampi'iiwo, dinkwa nee /angeegéuudae, bihher'ín sleémeero i hats ilaawo.

¹³ Afo ana axaás ar /angeegeuú ateetiim, ar kah, «/Angeegeuú harweeririím.»

¹⁴ Umuúqo kerubusmowo gitsee/a ngi kon tsiyáhh. Gitsee/aá geera awa keruúbi, gitsee/aá tsár awa hee, gitsee/aá tám awa diraangw, nee gitsee/aá tsiyáhh awa gwareesi.

¹⁵ Keruúbi iri gáwtí /akumít. Muruuwí slaáf an kudá' naa ár qoomár iisapoó yaaér Kedarírí ale.

¹⁶ Qoomár keruúbi iwa /akumít, /angeegéuudá' sleeme ina eeharín bihhaadá' wa aleeró. Keruúbi hhaampi'i ngiwa gwét as iwa gáwtí kumit, /angeegéuudá' aqo ina kumiít nee inooín.

¹⁷ Keruúbidá' iwa sihhít, /angeegéuudá' sleeme ina sihhiít, keruúbi iwa gáwtí tsa/aán, /angeegé' sleeme ina tsa/án dinkwa nee inooín. Asma qeeruú keruúbidá' i baraá /angeegéuudá' sleeme.

¹⁸ Naagáy xirfuú AAKOÓ MUNGÚ iri quútl dír maandár dó' wa alé, iri tláy iri sihhiít gawaá daanduú keruúbidá'.

¹⁹ Keruúbi hhaampi'ii'ín giri gwét, niri gáwtí /akumitiyé', aníng ina ár, slám /angeegeuudá' i bihhaaín i dirii'. Niri sihhiitiyé' dír geeraá afkú bihhaá da/aáw oo Doó AAKOÓ MUNGÚ, nee xirfuú Munguú Israeli i gawaadá' i dirii'.

²⁰ Muruuwí slaáf una tsaáhh, a kudá' naa ár bihhaá baraay awa Munguú Israeli dír isaapoó yaaér Kebari. Aníng ngiri tsaáhh adór tar keruúbi.

²¹ Umuú gaaro gitsee/a ngi koon a tsiyáhh, hhaampi'i tsiyáhh, nee bihhaá baraay awa umuú hhaampuuwo garkar adór dákw hee i deer.

²² Gitsee/er'ín sleeme ana tsaáhh, a tidá' naa ár amoodár yaaér Kebari wa alé. Umuú gaaro geera gina i ganaá' hi'iitanooro.