ESEKIELI 1 - Biblía Axweesantá Hhohho' ar Mungú 2004

IIGU'UTUÚ GEERA OO ESEKIELI DAANDUÚ MUNGUHE Kitángw Mungú oo aleesleemu

¹ Bál slahhángw tsiyáhh tawa kooán, kurkú mibeeri tám, qoomár aníng nee mukdá' taa loohatís tawa baraá yaamaá Babulónírí diriiaan, bihhaá yaaér Kebari, doori nina gweeritiyé', iigu'utuú Mungú nguri ár.

² Bál slahhaangw tawa kooán, (gaarí a kurkú kooán alaá Yehoyakini kuwa huúw yaamaá Babuloni),

³ anuú kaahamusmo, Esekieli garmoó Busi, qoomár niwa baraá yaamaá Kaldayórí, dirii' bihhaá yaaér Kebari, axweesantá AAKOÓ MUNGÚ ana axaás, nee baraadaádae /uuruú AAKOÓ MUNGÚ i gawaaeé'.

⁴ Qoomár niwa qaytsiít, bambaaór tluwoó koom ar /iikú daahh ana ár. Huunkír ur kaa harweér nee mankarór wer'eliim, nee ar asltá bir'eeliim qooma sleémeerowo ana ár. Baraá tla/ángw asltadae naxés gár qwiirii/ adór muqslír sirdaa/aat i baraadií dirí'.

⁵ Baraadae muruú slaáf oo tsiyáhh nguri ár, slaqsoó muuruwí adór i dirii' a adoorí: Slaqsi'ii'ín a adór slaqsoó hee.

⁶ Umuú gaaro gitsee/e ngi koon a tsiyáhh nee hhaampi'i tsiyáhh.

⁷ Ya'aaín naa gananaiyé', tsa/aá ya'aaín a adór fuqeenaá dama. Inooín i ló'wa qwiirii/iyá' adór muqslír sirdaa/aat ar taa duúq.

⁸ Dinkwa nee gitsee/e tsiyáhh, nee hhampi'iidá' tsiyahhe, umuúqo gár wake gár i koon a slaqsa'aá tsiyáhh awa dabaá hee baraá guruú umuú hhampuwo.

⁹ Sagér hhampe'eeri'ín tina kwatimít umuú hhaampa nee kuqá'. Qoomár bir geerií surukiyá', aqo tin al koná', slam i warqaqay'aaká.

¹⁰ Umuúqo gaaro gitsee/aá dimbadimbé ngi koon a tsiyáhh. Amór geeraawo a slaqsoó gitsee/aá hee, bihhaá doó /iyayhe a slaqsoó gitsee/aá diraangw, bihhaá doó basayhe a slaqsoó gitsee/aá awu, nee intlarehhirós a slaqsoó gitsee/aá gwareesi.

¹¹ Hhampa'aá tsár awa umuú gaaro kaa gweér gáwtí alé, nee ti kwatimitiyá'. Nee hhampi'iidaá hatlá' tsare, slaqooín ngina tuuntukiyé'.

¹² Umuúqo amoodá' keemuuwo i slaiia kana káy, umuú gaaro aqo ina geerií kumít hi'iitanto, slaqwtós gaa warqeská.

¹³ Baraá tla/ángw muruudae gár adór slaqsoó gil'ór oh i deer. Gaarí a adór tsángw asla oo gwa/aát bihhe sleémeerowo. Asltí i ló'wa gwa/át nee mankaro ina baraadá' wa ti'imít.

¹⁴ Muruuwí slaáf ina amoorí nee taqá' xuaxuú' adór mankartá wer'eeliim.

¹⁵ Qoomár muruuwí slaáf nguwa ga/áw, bihhaá umuúqo gaaro i /angeegeamaá yaamaá kwatmitá' koná'.

¹⁶ /Angeegeuuwí sleémeero adór kura tleéhh a wak, i ló'wa qwiirii/ adór tlaa/anoó sabarajaádi, nee slaqsay'ín a adór /angegeeamoó taa qaás baraá guruú kuqá'.

¹⁷ Umuúqo bar ta tleemuú sla'a aqo in tawo tleér, i warqaqeeraaká.

¹⁸ /Angeegeamaká' ki ló'wa uren, slamí i waa/oo/amór koná'. Harweramor'ín i háts ilaawo.

¹⁹ Qoomár muruuwí bir hi'iimiít, /angeegeamaín i bihher'ín wá hi'iimitiyá' sleeme. Birna gáwtí sihhiitiyé', /angeegeama' sleeme nin gáwtií sihhitír yaamuú wá ale.

²⁰ Amoodá' ta slai keemuwo aqo kana al káy nee /angeegeuudae, asma qeereemaá muruudá' slaáf i baraá /angeegéuuwí.

²¹ Muruuwí slaáf qoomár bira tláy, /angeegéuuwí sleeme in tláy, barta sihhiít /angeegé' sleeme in sihhiit, bar taa yaamuú wá sihhiít, /angeegé' sleeme nin yaamuú wá sihhiit. Asma qeereemaá muruuwí slaáf i baraá /angeegéuuwí.

²² Gawaá sagér muruuwí slafa, gár slaqsoó adór doori i deer. Gaarí i ló'wa gwa/át adór looár gitsee/a xuxuua.

²³ Bihhaá baraay awa gaarihe muruuwí slaáf i sihhmiit. Hhampe'eeraá tsár awa muruuwí slaáf kaa gweér nee taa gur'ér xu'usiyé', nee hhampe'eeri'ín kudaá hatlá' tsare, slaqooín kaa tuuntuúk.

²⁴ Qoomár tawa tláy afór hhaampe'eeri'ín ana axaás. Xuuraír hhampe'eeri'ín a adór afór ma'aá yaariir awa hhaahheelimá', a adór afór /orootlo ar Munguú Aleesleemusmo nee adór tsimaahhír slaqwaruusér ur. Niwa sihhiitiyé' hhampe'eeri'ín ngina waageeqayé'.

²⁵ Afór gadaádá' gáwtí diri', tidár adór doori ar dír sager'ín ana axaás.

²⁶ Gawaá daanduú gaarihe gár adór slaqsoó kitángw waawuti'iima ana ár, kalaywós a adór kuduú yakútír sirboo/, slaqsoó adór hee aa gawaadá' i iwiít.

²⁷ Daanduú gawa oo slaqwtós adór i dirii'i a slaqmís nee muqslír sirdaa/aat ar mitsiihh, a adór asltá bihhe sleémeerowo gaa harwet, bihhaá baraay a adór asla, inós kuna harweér nee gwa/aateemaá gwa/aatá'.

²⁸ Adór ga/alér tluwaay, adoorí an adoodá' slaqsoó xirfuú AAKOÓ MUNGÚ i dirii'i. Adoorí ngiwa ár ana gurúr qaát, afór axwees ngiri axaás.