Efeso 4 - Biblía Axweesantá Hhohho' ar Mungú 2004

Wakleeli'iimár baraá Qeeru

¹ Aníng kuungá' nun ló'wa firiiriím, aniíwí taa tseék as Aako, hooté' ar adoodá' hariím as ateetamoodá' Aako kuungá' nura ateét.

² Umuúqo daqto masók ti niinaweemisá' nee tawa múk tsatsa'arén, nee oo qiqtliím, tam tiwa sa qiqtliinda' ar baraá sla'aari.

³ Wakleeli'iimarhúng ló'wa harmagahhaak, tidá' Qeeru naa haniís ar kuungá' kiloohúng tawa baraá wayduú wa hota'.

⁴ Slaqwa a wak, tam Qeeru a wak, adoodá' kuungá' tundura ateét nee Mungú, as harahhifór wák kawa sleera'.

⁵ Aako a wak, nee haratlintaao a wak, nee slám baatiísmo a wak.

⁶ Mungú a wak, nee inós a Baabuú muu sleémeero. Inós i gáwtí dirii' dír muu sleémeerowo, nee i gadiyuus baraá muu sleémeeró wa ale, slám i baraá muu sleémeeró i dirii'.

⁷ Ala umuúqo heewo direne kwaa tsuúq ar har qoomaydá' Kristo aa haniís.

⁸ Gaarí an gár Gooi is kat, «Ina tsa/án gáwtí alé, múk taa baál baraá slaqwarár wa ale, nguri ar tsa/án, muu guri tsuuqaá i hanmiís.»

⁹ Ala /aymuuwí gídaabárós a milá, kwí tawa kaahi, «Ina tsa/án». Gídaabárós a ina ala geerií aweér sleeme baraá yaamaá baraay.

¹⁰ Kudá' aa aweer an kudá' aa tsa/an sleeme. Ina tsa/án gáwtá kilá', doori sleémeero gay waaraáhh, as mura' sleémeero nguwa hatsiisi, as inós iwa deér.

¹¹ Inós aleesleemuú Qeeru ngwa haniís, bahh'alé tawa ya/abuuse nee bahh'alé tawa aaruuse, nee kookaariya' tawa múk Ya/abtór hhó' alki/iít. Nee slám awa hatlá' tawa de'eemuuse nee intsaahhatuuse.

¹² Gadiyér'ín a tí, múk hhohhó' oo Mungú kuwa amohhe'eemisi, as inooín Mungú nguwa sagadiyusiya', as slaqwtá Kristo kawa kwa/amisi.

¹³ Gawaá adoorihe atén sleémeero wakleeli'iima a i hardahaán as Garmoó Mungú nguwa haratlintiaán nee nguwa xu'uti hhe'eesaán, tam atén tari kwa/aán baraá heeuumarene, ar uraydá' ta slawaan as tawa ganaa'aan baraá Kristowo.

¹⁴ Daqaní atén a kumiitanaaká adór na/aá ninákw wa ale, tiwa kwakwaahhi nee gwaanduú ma'aay umuúqo barto, nee tiwa huwahuwi nee fur'ár intsaahhatimisuú dimbadimbé oo lama, oo mukdá' ti al/agiím. Inooín an kudá' atén ti qwaareesár wa sla'á' ar al/aymar'ín.

¹⁵ Ala atén gár tiwa hariím masók an hootaán ar baraá looeema ar loohír sla'aari. Gawaá adoorihe an uraarawaán ay dír Kristo ngway i hardahaan. Nee inós an saga.

¹⁶ Inós slaqwa sleémeero gan haragaas dinkwárií alé, gari dinkwárií nigihhitis ar kanuúdá' Mungú naa haniís. Inós umuúqo diqto gan aleesleemií hanmiis, gadiyeérós tidá' taa haniís ngiwa tlehh. Gawaá adoorihe slaqwa sleémeero in uraareér, nee tiri kwa/amís ar baraá sla'aari.

Slafíngw /abén oo baraá Kristo

¹⁷ Gawaá adoorihe án kuungá' nun baw, slám nun gurbu'uúm kángw kilá' wa ale ar baraá umuú Aako, ma kumiitara' tawa hota' adór múk xoordaá hatlá' ar alé. Asma inooín inslaway'ín a tawo,

¹⁸ nee fuqurangw'ín i baraá giwtír i dirii'. Inooín dir'ín i káhh baraá slafingwdá' Mungú i haniisi. Asma inooín gár i xuiya' i káhh, slám ta ilaiwa/amér konká.

¹⁹ Inooín mure kaa máy, baraá slafingw'ine. Tari baraá tlehhema'aá slasla/arén wa hoót, ilatleerir'ín kari eeharahaár, ala taa ilaa/ii'iiká.

²⁰ Ala kuungá' kángw Kristowo tunda adoosír intsaahhatimisiiká.

²¹ Kuungá' kángw Kristo ugwa axasé'. Looeemaadá' baraawósí diriiá' kingari dirhúngií intsaahhatimís, asma kuungá' tawa eeharuuseerós.

²² Gawaá adoorihe gár kuungá' tunduwa hariím a slafingwhúng kuduú aáng un meerá'. Munerhúng na warqesaak, ta adoodár aange, asma munerhúng aáng i baraá hhitiruumit as ilatleerír al/ayma.

²³ Munerhúng nee inslawayhunge ki /abeemií ki/isi.

²⁴ Munér /aben slawaak, ar taa tleéhh ar tlehhemuú Mungú, tidá' ti laqaqaam ar slafíngw ganaá' nee oo hhoohhoó', slafingwdá' looeemaá wa hariím.

²⁵ Gawaá adoorihe, lama mawaak. Kuungá' looeema kilooín na axweesaak baraá tla/angwhunge. Asma atén sleémeero a diqoó slaqwtá wák, tidár Kristo.

²⁶ Kuungá' bar aga buhhabuhhé', ti harmagahhe', tlakweema mi tleehhara'. Nee buhhtaasíng mindiwa baraá munerhúng wa kumiitiyé' looa gar wa dát.

²⁷ Neetlaangw pa/aangw ir baraahúngií dahi munguwa sláy.

²⁸ Heé fisaasiím, fiiso ngi may, ala inós gár kuwa hariím gadiyér hhoo' gan tleehh ar dabaawós awa kilá', as gaa ngiwa slay ar liitlakuuse ngir alee/iisi.

²⁹ Axweesanoó tlákw mu kaahara', ala masók a axweesanoó muu gu kwa/amís, nee kudá' amoqwaareemisaaká. Gawaá adoorihe axweesanayhúng i tsuuqaá huwi dír mukdá' kuungá' nu iiárií qamiima.

³⁰ Qeeruú hhoohhoó' oo Mungú mu gurhaamír ar awaara'. Asma Qeeruuwós an duguno direne oo atén tir tsaahhi adór tar mukós, bál deeloodá' inós atén tiwa gweeri.

³¹ Ala kuungá' magoódár baraahúng i dirii' hingeesaak, nee xarslamaaye sleémeero, nee buhhta, nee kaantiingw nee /ooslisliingw, nee tlakweema sleémeero awa hatlá' mindiwa deeruutiyé'.

³² Kuungá' masók a múk hhó' nee oo gurtleemuú koóm. Ti kiloohúng gurtlatleere' adoodá' Mungú kuungá' nura gurtláy baraá Kristowo.