Efeso 1 - Biblía Axweesantá Hhohho' ar Mungú 2004

¹ Anuú Paulo, Ya/abusmoó Yesu Kristo as sla'aarír Mungú, barwaárí ngina gooiím amór múk Mungú oo baraá Efeso, kudá' Yesu Kristo ngwa haratlinti'iye'.

² Mungú Baabuúrén nee Aako Yesu Kristo kuungá' nu tsuuqi nee nu waydií haniisi.

Tsuuqaá qeeru awa baraá Kristo

³ Mungú i xirfuuti, Baabuú Aakoorén Yesu Kristo. Inós atén tina tsuúq ar baraá Kristo ar tsuuqa sleémeero awa Qeeru, awa gawaá doori.

⁴ Inós iimír yaamu ngiwa tleehhiiká, atén tina qaroó tsawaár ar baraá Kristo, as tawa múk taa hhoohhooeés oo xaslxaanslír koomaaká dír geeraawose asma sla'aarirós.

⁵ inós atén tina tsawaár iimír aáng wa ale tiwa na/iiwós tleehhi ar loohír Yesu Kristo. Adoorí an adoodá' inós aa slaá' baraá muunaáwose.

⁶ Adoorí gana tleéhh as atén tsuuqaawós kuká' xiríf kiwa ló'wa ilaiwawa/aan, as adoodá' inós tira ló'wa tsuúq, qoomár Garmaawós kuduú sla'aarusmo nguwa atén i haniís.

⁷ Atén tina gweér baraá lawali'iimár Neetlaango, hingeemisuú tlakweema kway slawaán ar loohír gwa'arár Kristo. Gawaá adoorihe gurtleemuuwós ku ló'wa úr direne.

⁸ Gurtleemuuwí nguna atén i tlahhás. Adoorí gana tleéhh ar baraá sagalooarós nee xu'utirós sleémeero.

⁹ Inós atén tina sla'aarirós i laqán, tidá' taa luú/, tidá' aa slaá' boo/eesaaro. Al'axweesani gana oó' adoorí ngiwa boo/eesi ar baraá Kristo.

¹⁰ Sla'aarirós iimír aange a mura' sleémeero nguwa haragaasi ar baraá Kristo, kuduú baraá yaamu nee oo gawaá dooriwo, qoomaadá' bál bira bó/, Kristo tay saga.

¹¹ Tam atén sleeme baraá Kristowo tina aaluuse tleéhh, adoodá' inós aa qaroó slaá', inósuudá' mura' sleémeero gu tlehhiít ar sla'aarirós.

¹² Asma a sla'aarirós atén tawa xirfuuwós tleehhitaan baraá Kristowo, ateédá' Kristo ugwa geerií harahhifoórí gaasaan.

¹³ Kuungá' sleeme baraawose kángw looeema ugwa axasé', kangwdá' hhó' oo ba/amarhúng. Slám inós ugwa haratlintié', Qeeruú hhoohhoó' oo Mungú kudá' aa diréní al'axweés, nuri dugunií qaás.

¹⁴ Qeeruuwí an arhaánír aalirén. Inós ngin xu'utimis dirén i aleeró adór ateédaá mukós tir gweeri. Gawaá adoorihe inós kuri xirfayees.

Firór Paulo

¹⁵ Aníng aga axaás adór kuungá' Aako Yesu kura haratlintié', nee adór muu sleémeero oo taa hhoohhooeés kur sla'á'.

¹⁶ Gawaá adoorihe án Mungú un sluufmiís umú deelooro as kuungá' baraá firor'eene.

¹⁷ Munguú Aakoorén Yesu Kristo, Baabuú xirfuú koóm, aníng un firiiriím, as kahhó' kuungá' nuwa qeeruú sagalooárí haniisi nee geehhooeema as inós kuwa xua'.

¹⁸ Aníng a firiiriím inós ilaahúng awa qeeru ngiwa gweeri, as harahhifór ateetmorhúng kawa tsahha', nee daqaari'iimár xirif ar aalirós adór i diri' baraá múk taa hhoohhooeesi.

¹⁹ Slám kawa xua' hhoohhooaarír uroó aleesleemuuwós baraá ateéká' haratlintatia'a.

²⁰ /Uuruudá' gadiyeé ga tleéhh baraarén wa ale an /uuruudá' Mungú ira gadiyuús qoomár Kristo nguwa waaslee/atís baraá múk aa qaátl wa ale, guri qaás dakós oo doó /iyáy gawaá dooriwo.

²¹ Guri waawuti'iimár i haniís daanduú geeraharuuse sleémeero, nee kudá' sleémeero aleesleemuú koomá', nee kudá' /uuruú koomá' nee daanduú kudá' sleémeero waawuti'ii'imá'. Inós kwaa qaás daanduú ume sleémeero ar mukdá' aleesleemuú koóm, kudá' baraá yaamuukií diriiá', nee kudá' baraá yaamaá hardahá' sleeme.

²² Mungú mura' sleémeero gwa gawaá dabaawós i qaás. Slám inós gun uráy haniis, as inós tawa ságw mukdá' inós gwa haratlintii',

²³ nee mukdá' tawa slaqwtós. Mukwí sleémeero aa haáts inose, inósuudá' umuúqo gaaro ga boo/eemiís baraá muu sleémeerowo.