Ebrania 9 - Biblía Axweesantá Hhohho' ar Mungú 2004

Heémár baraaká' yaamu nee ar doori

¹ Alqadoodár geera i dabeerós koón gawaá daanduú sluufaaywo. Slám dír hhoohhoo' ar baraakaá yaamu i deer.

² Heémarka i deer ar matla/eerdaá tsár koom. Matla/aangós oo geera a kudá' ta babay Didá' Hhoohhoo'. Muruú baraadí dirií' an tsaa'asi nee meésa, nee mikaáteedá' taa qaás as Mungú.

³ Alaá baquuwo matla/ángw hatlá' i deer, oo ta babay Didá' ak ló'wa Hhoohhoo'.

⁴ Baraadae kitángw ilahhooa i deer oo taa tleéhh ar sahaábu. Kitaangwí kun ilahhooár mooyángw tsuú í da/aa/an. Gár hatlá' baraadane a sandakmooduú alqado, oo taa ninkiriíts ar sahaábu umuúqo barto. Muruú baraá sandakmoowí a sirwír taa tleéhh ar sahaábu, tidá' muruudá' ta babay maána gu koom, nee hhartá Aroni, tidá' naa harma/, nee tlaa/eedá' tsár awa taa axweesantá alqadór i gooín.

⁵ Gawaá daanduú sandakmoowihe kitángw gurtleemu i deer, nee gawaawose slaqsa'aá tsár awa keruúbidá' xirfayen i dayá', nee kitángw gurtleemu gwa tuntuk ar hhampe'eeri'ín. Ala daxta daanduú keruúbirihe pa/aangw i kaahh oo umuúqo gaaro kawa wakeetimaan alki/ituuwo.

⁶ Adoorí an adór muruuwí sleémeero kura qamín. Nee kaahamuusér Mungú in dararát umuúqo daqto baraá matla/angwduú geera oo heéma, as gadiyér'ín ar kahamuusi'iima kawa tleehhi.

⁷ Ala baraá matla/angwduú tsár oo heémaro, heé daraaráh a kaahamusmoó úr oo Mungú kilós. Slám inós in dah sagaáwa wák wa ale baraá kurkú wake. Slám i dahiiká tawó alé barnaxes tseere i káhh. Tseereerí gan haniis dír Mungú as inós nee as tlakweemaá muu, kudá' taa xuiiká.

⁸ Gawaá adoorihe Qeeruú hhoohhoó' oo Mungú ga laqaaqán adór loohír tar dahi baraá matla/angwduú tsár oo heéma, oo ta babay Didá' ak Hhoohhoo' kara gweeriiká, asma ay hamí matla/angwduú geera oo heéma i kumiit.

⁹ Gaarí a slaqsaay oo qoomaarí ga laqaqaám. Gídaabárós a tí: Qeemuú ta hanmiisi dír Mungú i alé ar loohirí, nee hikwaá ta ilahhooár wa tsu/i munér mukdá' sluufmiís hhoohhooeesaro ngi aleeslay'aaká.

¹⁰ Asma hara'ayár loohirí an hara'ayár tlehhema'aá slaqo kilós, daanduú muruú /ayma nee wahaangw nee hamtlór slaqwa. Hara'ayaarí kana oó' ay dír qoomaadá' Mungú loohír /aben ngi qaasi.

¹¹ Ala Kristo naa hardáh. Inós an kaahamusmoó úr oo Mungú as muruudá' hhó', kudá' ni hardáh. Inós ina waaraáhh ar baraá heémaadá' ak ur, tidá' ak qoom, heémaadá' taa tleehhiiká ar dabaá muu. Gídaabárós a heémár baraá yaamuuwooká.

¹² Slám inós aa dahiiká baraá heéma i alé ar tseerér gurtaawe nee ar damaay, ala ina dáh sagaáwa wák kilós didár hhoohhoó' i alé ar tseereerós ar kilá'. Gawaá adoorihe ba/amár alhhe'eesay wasl gana tleéhh.

¹³ Asma tseerér gurtaawe nee ar awe, nee da/arár damaay barnaxes kaa tsifaqamiís gawaá slaqwaá mukdá' ta harmeetin, mukdá' guri hhoohhooés,

¹⁴ xáy, tseerér Kristo tí ga ló'wa bá/áke? Asma inós tina kilós haniís dír Mungú ar /uuruú Qeeruú alhhe'eesay wásl as tawa ilahhooár xaslxaansli wasl. Tseereerós muneerén ga hamátl nee tlehhema'aá slafíngw kooma'aaká, as masók atén Munguúdá' slaáf kuwa sagadiyuusaan.

¹⁵ Asma aáng Mungú al'axweesani gana dír mukií haniís ar aalír alhhe'eesay wasl kawa slay. Ala muu Mungú guna sadakuús qoomár alqadoodár geeraawo. Kristo iri gwaá' as muu nguwa gweeri baraá tlehhemi'ii'ín kudae. Gawaá adoorihe Kristo an haraki/isusmoó alqadór /aben, as mukdá' taa ateét nee Mungú al'axweesantadá' Mungú aa oó' kawa slay.

¹⁶ Gídaabárós a tí, alqadoorí a adór alqadór aali. Alqadór aali bir deer, al'axweesantadár aali kawa haniisi i /uuruú koondaaká ay dír gwa'arár heedaádá' alqadoodá' gaa oo' i xu'utit.

¹⁷ Asma qoomár inós bir slaaf, alqadoodá' i /uuruú koondaaká.

¹⁸ Gawaá adoorihe tam qoomár alqadoodár aáng kawa alqadín, tseere kahhká.

¹⁹ Asma Mose adoorí gana tleéhh, gár har geera a hara'ayár Mungú sleémeero gana alki/iít dír mukdá' aa burumburiit. Aluuwo tseerér damaay nee ar gurtaawe gari taataáhh, dinkwa nee ma'aay, tseere gari hikimiís ar se'engw da/atén oo bee/aangw nee loo/ór hisoópo, gawaá Kitaábu nee amór muu sleémeerowo,

²⁰ iwa kaah, «Gaarí a tseerér alqadoodá' Mungú naa hara'ayín dirhúng i alé.»

²¹ Slám tseere gari malé hikimiís gawaá heémaadá' nee gawaá xoosla sleémeero ar tara gadiyuús baraá saaliingo.

²² Slám hara'aya i kat, mura' sleémeero kun hhoohhooeemiis ar tseere. Ala bar tseere aa ku'utiká, gurtleemu i kaahh.

Ilahhooár Kristo tlakweema gaa hingés

²³ Muruuwí a slaqsoó muruuduú gawaá doori. Gawaá adoorihe gár kuwa hariím aqo kun hhoohhooees ar ilahhooadá' ak hhoo'.

²⁴ Asma Kristo aa dahiiká baraá doó hhoohhoó' i alé, oo taa tleéhh ar dabaá muu. Asma do'wí taa tleéhh ar daba', an slaqsoó do'duú kilá' oo hhoohhoó'. Ala inós ina dáh gawaá dooraá kilá', as hamí iwa dír geeraá Mungú i dirii'i.

²⁵ Slám Kristo inós aa darahiiká daqtá yaariire as tiwa haniisi, adoodá' kaahamusmoó úr oo Mungú ir dararahi umuúqo kurko ar tseerér hikwaá ilahhooa.

²⁶ Asma geera barnaxes a adoorí, geera Kristo gár kuwa hariím a gwa'araarós gan inkaakii/ daqtá yaariire iimír yaamu kiwa tleéhh. Ala hamí qoomaarír alhhe'eesaywo inós nina hardáh baraaká' yaamu sagaáwa wák kilós as tlakweema ngiwa hingeesi ar gwa'araarós, tiwa kilós ilahhooár wa haniís.

²⁷ Muu gár kuwa hariím a in qaatl sagaáwa wák wa ale, nee alaá gwa'araaro tari sakwasleema.

²⁸ Adoorí an adoodár Kristo sleeme ku laqi. Inós kuna ilahhooár wa haniís sagaáwa wák wa ale as tlakweemaá múk yaariír ngiwa hingeesi. Inós nin malé ti'iit baraakaá yaamuwo sagaáwa tsár wa ale. Ala gár nis hardihi a tlakweema hingeesarooká, ala a mukdá' inós gu daamaaraám nguwa ba/amisi.