Ebrania 8 - Biblía Axweesantá Hhohho' ar Mungú 2004

Yesu a Kaahamusmoorén oo Úr

¹ Gár ak ur baraá muruuwí taa axweesani a tí, atén kaahamusmoó úr oo adoorí hamí u koomaán. Inós aa iwiít dákw doó /iyáy oo kitángw aleesleemu oo Munguúduú aleesleemuú koóm dooriwo.

² Inós an kaahamusmoó úr oo Mungú. Dír iwa gadiyuusi an didá' ak hhoohhoo', baraá heémaadár ló', tidá' hee aa tleehhiiká ala Aako gana tleéhh.

³ Umuúqo kaahamusmoó úr oo Mungú kuna qaás as Mungú nguwa qeemií haniisi, nee hikwa ngiwa tsu/i ilahhooár wa ale. Gawaá adoorihe tam kaahamusmoorén kwí oo úr sleeme gár kus hariím masók gár i ilahhooár wa haniisi in deer.

⁴ Inós geera barnaxes in baraakaá yaamuwo, geera alók inós a kaahamusmoowooká. Asma kaahamuuse i deer, ar ilahhooár hanmamiis ar adoodá' hara'ayár Mose i kat.

⁵ Inooín gadiyeé ngin tleehhiyá'. Gadiyér'ín tidá' an adór slaqsaay nee hhaantamo oo muruú gawaá doori. Gawaá adoorihe inooín an adór Mose. Asma Mose heéma ngiwa tleehhamór wa slaá', Mungú guna báy, «Ga/aaweek, umuúqo gaaro tleehheek ar adór slaqsaydá' tinda kuúngií laqán gawaá tloomár wa ale.»

⁶ Ala hám daxta gadiyér kahamuusi'iima tidá' Yesu aa sláy, ka ló'wa hhoo' ta tooine. Sleeme alqadoodá' Yesu aa tleéhh tla/ángw Mungú nee muko ka ak hhoo' ta tidár geeraawo, asma alqadoorí kaa qaás gawaá al'axweesantá ak hhoo'.

⁷ Alqadoodár geera barnaxes i dakuúsár koondaaká, geera alók alqadór hatlá' gár kas leelehhiiti nee Mungú i káhh.

⁸ Asma Mungú adór mukós ira dakuús gaa ár, iri oó', «Aako i kaahi. Ga/aawaak, deelo i hardát ar aníng alqadór /aben ngiwa tleehh nee múk Israeli, tam nee múk tlahhoó Yuda sleeme.

⁹ Alqadoorí a adór tidár aangeeká, tidá' naa alqadiím dír baabi'iihúng, qoomár ngiwa duúx ar dakw'eé' baraá yaamaá Misrír wa ale. Asma inooín alqador'eé' kaa eeharahariiká. Gawaá adoorihe aníng inooín ngiri máw sadaawimituuwo. Axweesanaywí Aako guna káh.

¹⁰ Aako i malé kaahi. Hám daxta, alqadoorí an tidá' ni tleehh nee múk Israeli alaá deeloodá' sleémeerowo iwa kaahi. Aníng hara'ayar'eé' an qaás baraá inslaway'ín, nee ngiri gooiím baraá muner'ín. Slám aníng tari Munguúín nee inooín tari muk'eé'.

¹¹ Hee i kaahh oo inslaawmoowós gu intsaahhatimís, laqaá hhiyaawós, nguwa bay, ‹Aako na xueek.› Asma sleémeero án ti xuu', iimír heé niiná tam ay heé úr.

¹² Asma aníng tlehhmi'ii'ín awa tlakw i gurtláw, nee tlakweemaaín ngiri baloó inslawaaká.»

¹³ Diirihe Mungú kángw alqadór /aben gwa axweés. Gawaá adoorihe gár i laqaqaan a alqadoodár geera ina diín. Ala gaa barnaxes aa qaruúr, nee aa diín, gadaádá' qwanaywo aa naká/.