Ebrania 7 - Biblía Axweesantá Hhohho' ar Mungú 2004

Kaahamusmo Melkisedeki

¹ Melkisedeki a waawutmoó Salemu. Slám inós a kaahamusmoó Munguúdá' gáwtí dirií'. Melkisedeki Abrahamu guna al'áy qoomaadá' Abrahamu iwa slaqwarár dahhi, waawitá nguwa tsuú/. Abrahamu kuri tsuúq nee Melkisedeki.

² Abrahamu ilahhooa gari haniís dír Melkisedeki. Gár aa haniís a gár wák baraá umuúqo muruú mibaango kudá' i kona. Umuú Melkisedeki gídaabárós ar geera a «Waawutmoó Gan'amu.» Nee slám inós a waawutmoó Salemu, gídaabárós an «Waawutmoó Wayda».

³ Inós i baabuú konká, slám i aayór konká, slám tlahhaywós i kaahh. Iimu/úngw deeloorós i kaahh, slám alhhe'eesoó slafiingós i kaahh. Ala inós a adór Garmoó Mungú. Inós a kaahamusmoó Mungú ay alhhe'eesay wasle.

⁴ Ga/aawaak heewí adór kur úr. Asma baabuúrén Abrahamu ilahhooa gana haniís amór heewií alé. Baraá muruudá' naa haasaáng wa huwi, gár wák gana haniís baraá muruú mibaango.

⁵ Baraá na/aá Laáwiwo bahh'alé a kaahamuuse. Inooín hara'aya gaa ádbeér ilahhooa kawa ohin, gár wák baraá umuúqo muruú mibaango, dír múk wa ale. Muruuwí dír kuwa ohin a dír hhaeeín, ala tam inooín a xwaylár Abrahamuwo.

⁶ Melkisedeki a heé baraá tlahhaydá' dahhaaká. Ala tam adoorihe inós ilahhooa gana óh dír Abrahamú wa ale, gár wák baraá umuúqo muruú mibaango. Slám inós Abrahamu guri tsuúq, kudá' al'axweesantá Mungú gaa slay.

⁷ Ala gaarí a gár taa si'iiká asma kudá' tsuuqa gi hanmiís ku úr ta kudá' taa tsuuqi.

⁸ Na/aá Laáwi inooín i ilahhooár ohiná' ar gár wák baraá umuúqo muruú mibaango. Ala tam adoorihe inooín a múk qaátl. Ala Melkisedeki inós a heé ta lamabu'un nee Gooi iwa kat inós tam hamí i slaaf.

⁹ Slám i ya/aán ooaro adór Laáwi sleeme, kudá' ilahhooár ohaahiím, inósuú kilá' ilahhooa ngira haniís sleeme, gár wák baraá umuúqo muruú mibaango, qoomár Abrahamu ilahhooa ngiwa haniís.

¹⁰ Asma qoomár Abrahamu kuwa al'áy nee Melkisedeki, Laáwi qoomaadae i baraá slaqwtá Abrahamú i kaahh.

¹¹ Ala hám daxta hara'aya sleémeero, tidá' taa amór múk i haniís, iimu/uungós a hara'ayaadá' taa haniís daanduú kaahamusi'iimár Mungú ar tlahhoó Laáwi. Ala gár yaahasár slaa' i deer diirihe. Barnaxes kahamuusi'iimarír Mungú ar tlahhoó Laáwi bir gan'amuú huwahúp, kaahamusmoó adór hatlá' gár nisa hardáh a milá? Asma kaahamusmoowí a adór Aroniwooká, ala a adór Melkisedeki.

¹² Asma kahamuusi'iima bira warqeér, hara'aya sleeme gár kawa hariím aqo in warqeér.

¹³ Heé taa axweesantí káh an Aako Yesu. Nee inós a heé tlahhoó hatlá'. Slám baraá tlahhaywose heé gadiyér kitángw sluufaay gaa tleehh i kaahh.

¹⁴ A gár xu'utiit Aakoorén tlahhaywós a tlahhoó Yuda. Slám Mose kángw kaahamuuse nguwa axweés, gár aa oó' i káhh daanduú tlahhaywihe.

Kaahamusmoó hatlá' oo adór Melkisedeki

¹⁵ Gaarí kaa geehhooesa hhe'eés ar adoorí Kaahamusmoó hatlá' naa ti'iít. Inós a adór Melkisedeki.

¹⁶ Inós gár kusa kaahamusmoó wa qaás a hara'ayár mukooká, tidár daanduú tlahhaay. Ala gár kusa kaahamusmoó wa qaás a /uuruú slafingwdá' baloó warqawaaká.

¹⁷ Asma Gooi i kát, «Kuúng a kaahamusmo ay alhhe'eesay wasle, ar adór Melkisedeki.»

¹⁸ Gawaá adoorihe hara'ayaadár geera kaa hingeés, asma i /uuruú koondaaká, slám gár i bu' i káhh.

¹⁹ Asma hara'ayaadár Mose gár aa aleesleér boo/eesaro i káhh. Ala daanduú hara'ayaadae harahhifór ak hhoo' kingina haniís. Ar loohír harahhifoorihe a aleeslawaán Mungú kuwa i hardahaan.

²⁰ Gaarí iwa tleehharút, Mungú lo'o gana /aáy. Kaahamuuseedár aáng kawa qamín, Mungú lo'ór aa /aáy i káhh.

²¹ Ala Yesu kuna kaahamusmoó wa qaás ar lo'o. Asma Mungú guna adoorí báy, «Aako lo'o gana /aáy, slám ga baloó amohhu'unká, ‹Kuúng a kaahamusmo ay alhhe'eesay wasle.› »

²² Gawaá adoorihe alqadoorí ka ló'wa hhoo' ta tidár aange, as adoodá' Yesu tawa lamabu'usmoowós.

²³ Nee slám gár hatlá' ar dimbé i deer. Kaahamuuseedár aáng, inooín ki yaariir, asma inooín kumiita ngaa aleeslay'iiká as adoodá' tawa múk qaátl.

²⁴ Ala Yesu in slafaafín ay alhhe'eesay wasle, nee kahamuusi'iimarós ka baloó heé hatlá' i haniisiiká.

²⁵ Gawaá adoorihe kudá' Mungú ngu i daqaqawá' ar loohír inós, inós gi ló'wa aleesláy ba/amisaro, asma inós i slafaafín daqisleém as ngiwa aleefiriirin.

²⁶ Gawaá adoorihe Yesu an kaahamusmoó úr oo Mungú oo atén ti gaa wa buú'. Asma inós ku hhoohhoó'. Nee slám inós i tlakweemaá konká, nee i xaslxaanslír konká. Nee slám kwaa paraátl dír tlakuuseero, nee kwaa tsa/aás kway harwaarahhaás doori sleémeerowo.

²⁷ Inós a adór kaahamuuseedár hatlaeeká. Asma inós gár hikwaá ngis tsu/i umuúqo deelooro i káhh, adoodá' kaahamuuseedá' aáng ngira hanmís. Inooín ilahhooa kana geerií hanmiís, as tlakweemaaín awa kilá', aluuwo as tlakweemaá muu. Ala inós ilahhooár wák kilós ar bu'uut qooma sleémeero gana haniís sagaáwa wák wa ale as muu sleémeero qoomár inós kilós tiwa haniís.

²⁸ Asma hara'ayár Mose muu gun qamiín, tawa kaahamuusér uren, inooín tam a múk tlakweemaá kooma'a. Ala al'axweesantadá' taa oó' ar lo'o, slám kana oó' alaá hara'ayár Mose wa aleeró, al'axweesantí Garma guna kaahamusmoó wa qás, kudá' taa bu'uutiís ay alhhe'eesay wasle.