Ebrania 6 - Biblía Axweesantá Hhohho' ar Mungú 2004

¹ Gawaá adoorihe intsaahhasadá' sleémeero ar iimu/uuma daanduú Kristowo masók an alií geexawaán, nee tari geerií kumiitaán baraá intsaahhasadá' hee gu kwa/as baraá slafíngw qeeruuwo. Atén a sla'aanaaká intsaahhasadár iimu/uuma kawa malé inki/aan, tidá' hee iwa hhu'u'un nee tlehhma'aá slafa'aaká ngiwa may, nee Mungú nguwa haratlintii'i;

² nee intsaahhasár daanduú baatiísmo nee ar dákwií qaasa; nee i intsaahhasár daanduú waasle/ nee sakwasleemár alhhe'eesay wasl.

³ Ala ta tihe, atén gár tiwa hariím an geerií kumitaán. Adoorí an tleehhaán, bar Mungú ngaa slaá'.

⁴ Asma múk aa qaroó alií kii/, adór kungur ki/isi baraá hhu'u'úngw i alé a adoomá? Asma inooín kingina dahaás baraá gwa/aateemaá Mungú, tsuuqaá Mungú kudá' gawaá dooraá dahhá' kiri tsaáq, Qeeruú hhoohhoó' oo Mungú kuri én,

⁵ axweesantá Mungú kari tsaáq adór kar hhoó', nee /uuruú yaamuudá' xaawá' kuri tsaáq.

⁶ Aluuwo baraá haratlintaaor'ine tari alií kií/. I ya/aandaaká múk adoosíng kuwa ki/isi baraá hhu'u'úngw i alé, asma inooín Garmoó Mungú ku malé kiki'ín gawaá msalaába ar fahhari, nee ku geeraá múk wa mureekeemiis.

⁷ Yaamaá ta du'umiís nee tluwaay daqtá yaariire, nee bu'úngw hhó' nguri laqwaaliyé', oo slaasláwár huwahuúw dír dooslusmoowo, yaamaá adoorí tsuuqaá Mungú ngi slayá'.

⁸ Ala yaamuudá' gár naa laqwaliyé' bar laqaya' nee fuquráy, gár i buiya' i káhh. Yaamaá adoorí kaa nak/aás lu'usaro nee Mungú. Alhhe'eesaywo ki daa/ ar asla.

⁹ Ala atén tam adoorí kaahana, sla'aaruuser'eé', atén daandeemoohunge harahhifo a koomaán asma kuungá' tsuuqaá ba/ama iga sleeré'.

¹⁰ Asma Mungú i ganaa'. Slám gadiyérhúng tidá' taa tlehhé' ga gunqareesiiká, nee sla'aarirhúng tidá' taa dirós i geehhooesé' ar loohír múk hhohhó' oo Mungú kuwa sagadiyusé' nee slám tam hamí a kumitá' kuwa sagadiyusa'.

¹¹ Gár atén ta ló'wa sla'aan masók umuúqo heewo dirhunge ilakaaharuudá' gun ar kumiit ar inkihhimu ay alhhe'eesaay, as muruudá' ta harahhifa' kuwa sleera'.

¹² Atén a sla'aanaaká kuungá' tawa tli/uuse, ala kuungá' masók a adór mukdá' aa haratlintii', kudá' qiqtliím, as kahhó' muruudá' aa al'axweés kuwa ala'.

Al'axweesantá Mungú a ló'

¹³ Qoomár Mungú al'axweesani ngiwa oó' dír Abrahamu, lo'o gari /aáy adór tidá' aa oó' ir tleehharút. Lo'oodá' gari /aay ar umuuwós inósuú kilá', asma oo úr oo inós gu baá/ i kaahh, oo lo'o ngir huwi.

¹⁴ Ina oó', «Ar ló', án kuúng u tsuúq, nee u xwaylár yaariír i haniís.»

¹⁵ Gawaá adoorihe Abrahamu iri qiqtlín, nee gadaádá' Mungú aa al'axweés, gari sláy.

¹⁶ Hee barnaxes lo'o ga huuw, lo'oodá' gan huuw ar umuú kudá' úr oo inós gu baá/. Gawaá adoorihe kaangaani sleémeero dír muko gár ga tsaat a lo'o.

¹⁷ Gawaá adoorihe Mungú sleeme lo'o gana /aáy qoomár al'axweesantós ngiwa gawdeesár wa slaá' dír mukdá' al'axweesnatadá' ga aál, adór inós ir baloó warqayká baraá tidá' aa al'axweesi.

¹⁸ Gawaá adoorihe Mungú muruuwí tsár gwa oó', al'axweesantós nee lo'o. Muruuwí i baloó warqayká, nee Mungú lama ga baloó ooiiká daanduú muruuwihe. Ateéká' inós ugwa i guwaan, muruuwí atén tin ló'wa gurkwa/amis, as harahhifoodá' taa geeraarén i qaás kawa slawaan.

¹⁹ Harahhifoorí a toorén. Haraxu'utirí muneerén gaa ló'wa ót as miwa qwát. Adoodá' miringamo kur baraá ma'áy ila/aa/an ar tlaa/a, as mukuwa tliw/ín nee gwaanduú ma'aay. Harahhifoorén tí alhhe'eesaywós dír kway tseék a gawaá doori, dír ira waaráhh a dír baquú baraá doó Mungú i dirií'.

²⁰ Yesu ina dáh baraadí alé tawa heé giiriím dír atene, nee tawa saayusmoorén. Asma inós an kaahamusmoorén ar adoodár Melkisedeki ay alhhe'eesay wasle.