Ebrania 5 - Biblía Axweesantá Hhohho' ar Mungú 2004

¹ Umuúqo kaahamusmoó úr oo Mungú kun tsawaar baraá tla/ángw múk wa ale. Kuri qaas tawa heé Mungú sagadiyuús daandeemooín wa ale. Inós muruudá' muu naa qeemuú wa huúw nee ilahhooár muruú ta tsu/i, guri huuw dír geeraá Mungú as tlakweema.

² A gár ya/aam inós tawa heé tsatsa'aár dír mukdá' liitlakwene nee oo aa dakuus. Asma inósuú kilá' ku liitlaákw baraá muruú yaariire.

³ Gawaá adoorihe gár inós kuwa hariím, slér ilahhooa gan gaas as tlakweemaawós sleeme, ala a as tlakweemaá muu kilooineeká.

⁴ Hee i kaahh oo ilaiwa/ameerí ga sláw, tawa kaahamusmoó úr oo Mungú. Ala aqo har kudá' taa ateét nee Mungú, adoodár Aroni kura ateét.

⁵ Gawaá adoorihe tam Kristo sleeme taa kilós xirfeesiiká tiwa kaahamusmoó úr oo Mungú tleehhi. Ala a Mungú guna ilaiwa/ameerí haniís, iri oó', «Kuúng a Garmaaeé', aníng kuúng laarí una laqwaál.»

⁶ Slám dír hatlae i malé kaahi, «Kuúng a kaahamusmoó Mungú ay alhhe'eesay wasle, ar adór Melkisedeki.»

⁷ Qoomár Yesu iwa baraakaá yaamuú wa hoót, Mungú guna i /aa/amín ar afór ur, nee ar hhirhheeri, guri firiirín nee nguwa ateetin. Asma Mungú inós gu aleesláy nguwa ba/amisi baraá gwa'araaro. Inós kuri iiárií qaás nee Mungú asma adoodá' tiwa niinaweés, nee adoodá' Mungú nguwa ilaiwawaá/.

⁸ Inós a Garmoó Mungú. Ala tam adoorihe inós iialooemis guna intsaatsaáhh, as adoodá' kuwa slahh'eemiís.

⁹ Gawaá adoorihe inós kuri bu'uutiís nee Mungú. Bu'uutisaro kuwa hhe'eés, inós tari heé ba/amár alhhe'eesay wásl ngaa huuw dír mukdá' sleémeero inós ngu iialooemisa'a.

¹⁰ Nee slám Mungú guri kaahamusmoó úr wa qaás ar adoodár Melkisedeki.

Gurbu'uungw daanduú dee/aana

¹¹ Gawaá daanduú kaangwihe atén /ayma'aá yaariir i koomaán awa ni dirhúng i kaahaan. Ala ooaro a gár gawit, asma kuungá' tundu hargawdén gaa tsaahharo.

¹² Dirhunge geera a gár hariím kuungá' tawa intsaahhatuuse, asma deelór yaariir aa waaráhh iimír kuungá' tunduwa ba/amís. Ala kuungá' tam hamí a intsaahhatuusér sla'á' malé ale, ar nu intsaahhatimis muruuduú geera daanduú axweesantá Munguhe. Ala tam hamí gár kuungá' tunduwa hariím a ilwa, ala a muruú /aymár gawdeneeká.

¹³ Umuúqo heewo oo ilwaá wa hariím a na/aay, gár ganaa' nee ar tlaakwe paratlaro ga aleeslayká.

¹⁴ Ala muruú /aymár gawdén a oo múk urén. Asma inooín muruú hhó' nee oo tlákw kwaa intsaáhh partlituuwo.