Ebrania 4 - Biblía Axweesantá Hhohho' ar Mungú 2004

¹ Tam hamí al'axweesantadá' i deer ar tawa dahaan baraá hungu/umaá Mungú. Gawaá adoorihe, atén ti harmagahhaán, as heé wák baraahunge miwa deeruút oo hungu/umaaká' gi dakuús.

² Asma Ya/abtór hho' direne kinga alki/iít adoodá' kara alki/iít dír mukduú aange. Ala Ya/abtoodá' inooín gár ngiwa gaa bú' i káhh. Asma kaa axaás, ala kaa haratlintii'iiká baraá muner'ine.

³ Ala ateéká' aga haratlintiiaan, atén a dahaán baraá hungu/umaadá'. Asma Gooi kángw hungu/umaaká gu kát, «Aníng aga buúhh, lo'o ngiri /aay niwa kah, ‹Mukwí i baloó dahiiká baraá hungu/umaaeene.› » Mungú adoorí gana oó', tam gadiyeérós sleémeero ngaa hhe'eesi iimír yaamu kiwa tleéhh.

⁴ Asma dirkaaro Gooi daanduú bál faanqwe i kat, «Bál faanqwe Mungú ina hungu/uús baraá gadiyeeduuwós sleémeerowo.»

⁵ Diirihe sleeme kaa gooín, «Mukwí i baloó dahiiká baraá hungu/umaeene.»

⁶ Gawaá adoorihe a gár xu'utír koom adór múk dáh baraá hungu/umaaká' ir deér. Ala mukdá' Ya/abtór hho' gaa geerií axaas, inooín dahmu ngwa aleeslay'iiká, asma Ya/abtór hho' nga haratlinti'ii'iiká.

⁷ Gawaá adoorihe Mungú deelór hatlá' gari qaás, deeloodá' gari báy «Laarí». Kaanguú deeloorí guna alki/iít ar afkú Daudi alaá kureeraá yaariir niwa waarahhiyé'. Kaangwí kwa gooín baraá gooirí taa qaroó ooaán tí kah, «Laarí bar afór Mungú aga axasé', munerhúng ma gawdeesara'.»

⁸ Yoshua geeraawo bar muu ngwa dahaás baraá hungu/umaá ló', Mungú geera kángw baalár hatlá' ngwa ooiiká.

⁹ Gawaá adoorihe hungu/umaá deelór Sabaáto i dayá', awa taa amohhe'eés as múk Mungú.

¹⁰ Asma heé aa dah baraá hungu/umaá Mungú, inós aa hungu/uús baraá gadiyeérose, adoodá' Mungú sleeme ira hungu/uús baraá gadiyeeduwose.

¹¹ Ala atén gár tiwa hariím a ilakaaharu un tleehhaán tawa dahaan baraá hungu/umaadá', nee umuúqo heewo dahmaá baraá hungu/umaadá' mingiwa dakuús as dee/aanu, adoodá' inooín tara dee/aanuút.

¹² Asma axweesantá Mungú i sláf. Nee slám i /uuruú koón. Nee i xarásl ló'wa ale tam paángár afe tsár ga bá/. Axweesantá Mungú in dát baraá heé i alé, qeeru nee muuná giri parátl, tam fadu nee waeemoowós giri parátl sleeme. Nee slám axweesantá Mungú inslawoó hee gu sakwasleemút, nee umuúqo gár i slai baraá muunaáwose.

¹³ Umuúqo gaaro ar Mungú i harslaaqati arto i káhh. Mura' sleémeero i kístí dirii', nee ku geehhoó' dír ilaawose, nee atén adór tara hootaán an dír geeraawósií kwalilimaán.

Yesu a kaahamusmoó úr oo Mungú

¹⁴ Gawaá adoorihe atén haratlintaaoorén tidá' ta koomaan masók an ló'wa oohaán. Asma atén kaahamusmoó úr oo Mungú u koomaán. Inós aa waaraáhh ar tla/ángw doori ay dír geeraá Mungú. Inós an Yesu, Garmoó Mungú.

¹⁵ Asma atén kaahamusmoó úr oo Mungú oo ta koomaan, atén ti gurtleemuú wa ara'ar baraá liitlakweerene. Asma inósuú kilá' kuna iiara'ár adór atén wa aleeró baraá mura' sleémeerowo, ala tlakweema gaa tleehhiiká.

¹⁶ Gawaá adoorihe atén masók an tseewuwaán ar pihh'uuma dír kitángw Mungú, didá' tsuuqaá Mungú kiwa slay, as tíwa gurtleemuú i haniisi, nee /uuru kuwa slawaan, kudá' atén ti alee/iimiís qoomár hariima.