Ebrania 3 - Biblía Axweesantá Hhohho' ar Mungú 2004

Yesu ku ak úr ta Mosewo

¹ Hhaee'eé', kuungá' awa hhohho', kuungá' sleeme tunda ateét nee Mungú. Yesu ga/aawaak. Inós an ya/abusmo nee an kaahamusmoó úr oo Mungú oo haratlintaaoodá' ta lamabu'uumaan.

² Inós ku inkihhím dír Munguhe, kudá' inós gwa qaas baraá gadiyeérós i alé. Adoodá' Mose sleeme kur inkihhím baraá doó Mungú sleémeerowo.

³ Yesu ku ak xiríf ta Mosewo. Asma umuúqo heé doó tleéhh, xirfuuwós ku úr ta xirfuú do'dá' aa tleehhi.

⁴ Umuúqo do'o i tleehharusmoowós kón, ala Mungú mura' sleémeero guna tleéhh.

⁵ Mose a sagadiyusmoó inkihhím baraá doó Mungú sleémeerowo. Inós muruudá' Mungú i aluú wa alki/iiti guna lamabu'ún.

⁶ Ala Kristo ku inkihhím asma inós tawa Garma. Inós kwaa qaás gawaá daanduú doó Mungú sleémeerowo as nguwa baali. Atén an do'ós, barnaxes a kumiitaán baraá pihh'uumarene nee harahhifoorene, harahhifoorén kawa diidi'iimisaan ay alhhe'eesaay.

Hungu/umaá múk Mungú

⁷ Gawaá adoorihe Qeeruú hhoohhoó' oo Mungú i kaahi, «Laarí bar afór Mungú aga axasé',

⁸ munerhúng ma gawdeesara', adoodá' taa tlehhé' qoomár aníng iwa sié', qoomár iwa iiara'adé' baraá xaanxáy wa ale,

⁹ Baabi'iihúng tlehhemi'iieé' ngaa ariyé', kudá' naa baraá xaanxáy wa tlehhiít kureeraá mibeeraá tsiyahhe. Ala tam adoorihe inooín aníng ina iiara'ariyé' nee iri daawitisiyé'.

¹⁰ Gawaá adoorihe aníng qartadá' ana i buúhh, niri oó', ‹Mukwí deelo sleémeero a múk muner'ín aa qwat, nee slám loohir'eé' kaa baloó xuiiká.›

¹¹ Aníng ana buúhh, lo'o ngiri /aáy niwa kah, ‹Inooín i baloó dahiaaká baraá amohhooar'eéní alé.› »

¹² Hhaee'eé', ti harmagahhe'. Tam heé wák baraá tla/angwhunge miwa deeruút oo muuná tlaákw nee oo haratlintaao wásl, tam iri qwaar as Munguúdá' slaáf nguwa geexáy.

¹³ Ala kuungá' umuúqo deelooro ti gurbu'uunde' dír /aymuuwí «laarí» ir kumiiti, as tam heé wák baraá tla/angwhunge miwa ya/án kuwa al/ayi nee tlakweema, iri saga gawdúy.

¹⁴ Asma atén sleémeero a alqaatuusér Kristo, barnaxés atén aga kumiitaán ar pihh'uumarén tidá' iimír iimu/uungo ta koomaan ay alhhe'eesaay.

¹⁵ Gaarí an gár Gooi is kat, «Laarí bar afór Mungú aga axasé', munerhúng ma gawdeesara' adoodá' taa tlehhé' qoomár aníng iwa sié'.»

¹⁶ Múk afór Mungú gaa axaas, inós kuri sií', a ín heemá? A mukdá' sleémeero Misrír dáhhaáke, kudá' taa geeraharahaár nee Mose.

¹⁷ Mungú múk aa i buhhabuúhh kureeraá mibeeraá tsiyahhe a ín heemá? A kudá' tlakweema gaa tleéhhiíke, kudá' aa qaatl baraá xaanxáy i alé.

¹⁸ Nee slám múk Mungú lo'o ngisa /aáy iwa oó' ta dahiiká baraá hungu/umaaeé', a ín heemá? Ar ló', a mukdá' inós gwa sii'.

¹⁹ Gawaá adoorihe aga araán adór dahmu ngura aleeslay'iiká, asma Mungú ngwa haratlinti'ii'iiká.