Ebrania 1 - Biblía Axweesantá Hhohho' ar Mungú 2004

Mungú aa axweés ar Garmaawós

¹ Mungú aáng aa axweés dír baabi'iirén ar afér aaruuse ki/imaá yaariire nee slám ar adór dimbadimbé.

² Ala de'emaarén kuká' alhhe'eesayhe ina dirén i axweés ar loohír Garmaawós, kudá' aa aaliitmoó mura' sleémeero wa qaás, slamí mura' sleémeero guna baraá inós ar tleéhh.

³ Inós an miiraa/ór xirfuú Mungú, nee an slaqsoó Munguú kilá'. Inós mura' sleémeero gun amohhe'eemaamiis ar axweesantós tidá' aleesleemuú koom. Tlakweema hamaatlaro ngiwa hhe'eés, iri iwiít dákw doó /iyáy oo Munguú Aleesleemusmo gawaá dooriiwo.

Garmoó Mungú ku ak úr

⁴ Garma iri ló'wa xirfuút malayke ba/a, as umuudá' aa aál oo Garma ku ló'wa úr ta oo malaykeero.

⁵ Asma Mungú iimír aange tam malaykamoó wák gwa bayká, «Kuúng a Garmaaeé', án kuúng laarí una laqwaál.» Nee slám aa ooiiká, «Aníng a baabá tleehhiít dirose, nee inós dir'eene tari Garma.»

⁶ Nee malé alé qoomár Garmaawós oo baris nguwa huwtá wa slai baraá yaamií alé, ina oó', «Malaykér Mungú sleémeero ngu i tumbarara'at.»

⁷ Nee daanduú malaykeero i kaahi, «Malaykeerós gaa tleéhh ar adór fur'a, nee sagadiyuuseerós ar adór tsángw asla.»

⁸ Ala dír Garmaawo i kaahi, «Mungú, kitaangók oo waawuti'iima ku alhhe'eesay wásl, nee waawuti'iimarók a waawuti'iimár gan'amu.

⁹ Kuúng hotaá ganaa'á' ina slá', nee tlakweema iga áhh. Gawaá adoorihe, Mungú, inós a Munguúwók, kuúng ugwa iimbalaáx ar di/tá qwala/ ta hhaeewoge.»

¹⁰ Nee slám i malé kaahi, «Kuúng, Aáko, iimír iimu/uungo yaamu ina iihháf, nee doori a gadiyér dabaawók.

¹¹ Muruuwí i hhitiruut, ala kuúng a kumít. Muruuwí sleémeero i qarúy adór inqwaruú wa ale.

¹² Kuúng u mutuutúk adór inqwaruú wa ale. Muruuwí sleémeero ku kwaahh adór inqwaruú aa qaátl wa ale, as inqwaruú /abén kuwa tsiiti. Ala kuúng a baloó warqeeraaká, nee kureeriiwók hartsatangw'ín i kaahh.»

¹³ Asma Mungú iimír aange tam malaykamoowós oo wák gwaa bayká, «Iwiít bihhaá dakwe'eé' oo doó /iyáy ay dír wakuuseerók ngay qaas baraá dabaawók i alé.»

¹⁴ Gawaá adoorihe malayke sleémeero a qeeru. Inooín kaa ya/aáw nee Mungú as mukdá' ba/ama ga sláw nguwa sagadiyuusiya'.