DANIELI 8 - Biblía Axweesantá Hhohho' ar Mungú 2004

Iigu'utuú tsár a daanduú gwaanda nee gurta

¹ «Kurkú tám iimír waawutmo Belshasa iwa waawuti'ín, anuú Danieli iigu'utuú hatlá' una ár alaá kuduú geeraawo.

² Baraá iigu'utuuwihe naxés aníng a dír Susa, gixsár ur ar ayaá Elamu. Aníng aga sihhiít dír yaaér Ulai.

³ Naxés niwa qaytsiít, gwaanda una ár aa sihhiít dír afaá yaeerí. Gwaanduwí xareemaá tlet tsár gi kón, ala xarmoó wák ku ak tleér, nina ti'iít dír alaá kuduú hatlá' wa aleeró.

⁴ Gwaanduwí una ár i slaaqw bihhaá /uwa, nee /iya nee basa. Tam makiito'ór gwa tlaampa'as i káhh, laqaá ar aa kotsqot dír /uuruuwose i káhh. Inós adoodá' i slai gana tleéhh, tina kilós xirfayeés.

⁵ «Qoomár niwa kaangwí aldakuut naxés gurta una ár bihhaá /uwií alé i gaanslár ti'ii'ín, slám yaamu gi kwatmitiiká. Baraá gineerose i xarmoó wák kón oo yangaariír ló'wa alé.

⁶ Iri haraatláy amór gwaanduudá' sihhmiít naa ár afaá yaae, kudá' xareemaá tsár koóm, guna haraa/akuút ar /uuruuwós sleémeero.

⁷ Gurtuudá' una ár gwaanduudá' guna hara suruúk. Gwaanduudá' guna i buúhh ló'wa ale, guri haraa/akuút ar /uuruuwós sleémeero, xareemidá' tsaraawo giri giqáy. Naxés gwaanduudá' sihhtanór geeraá gurtuudá' gaa aleeslayká. Ala kuna yaamií daáhh, kuri kal/aa/án, hee tumu wák i kaahh oo gwaanduudá' gwaa tuu/ dír gurtuudae.

⁸ «Aluuwo gurtuudá' tiri kilós xirfayeés ló'wa alé. Ala qoomár iwa ló'wa /uuruú kon xarmoowós kudá' úr iri qeét. Kitángw xarmoodae xareemaá ninakw awa tsiyáhh niri ti'itiyé' awa gehho', umuú xarmoowo ina bartós xuú' badu tsihhaawo awa yaamu.

⁹ Baraá tla/ángw xareemiwós kudá' tsiyahhe, xarmoó wák ina ti'iít oo niiná, iri ló'wa uráy, iri kumiít bihhaá baskú wa alda/aáw nee ina kumiít amór yaamuudá' ló'wa xiríf.

¹⁰ Xarmoowí ina ló'wa uráy tam iri hardáh ay tla/ángw múk Mungú tam slaqwaruusér tsatse/ bahh alé gari yaamií daraáhh nee gari yaamií kala/án.

¹¹ Xarmoowí tiri ló'wa xirfayeés kilós ale tam dír geeraharusmoó úr oo múk Munguhe. Ilahhooadá' ta da/aa/an umuú deelooro dír Kudá' Úr oo gawaá doori gari qwaareés, nee do'ós kudá' hhoohhoó' guri yaamií slaáx.

¹² Múk Mungú kuri dirós i haniís dinkwa nee ilahhooadá' ta da/aa/an umuú deelo ar loohidá' qoomaaká. Looeema kiri yaamaá hara adáh. Inós umuú adór i slai gan tleehh nee gan aleesláy.

¹³ «Aluuwo malaykamoó wák una axaás iwa axweesi, malaykamoó hatlá' kudá' axweés guri yaahaás, ‹Xáy, muruuwí ta ooiin nee iigu'utuwí i kumaamitiya' ay xaylá? Xáy ilahhooár da/a ar umuú deelo tidá' taa hhitín waaqa'a'ati ay xaylá? Xáy, hhitiru'umarí ar umuú gaa kawa hhaamimiisi i kumaamit ay xaylá, nee didá' hhoohhoo' dinkwa nee múk Mungú kuwa yaamaá hara'adararahi ay xaylá?›

¹⁴ Iri oó', ‹Ar har afiqoomár tsiindo nee matlaatlér kume tsár nee tsiire tám. Ala aluudae daqaní hotaaín Mungú gi adoodár aáng i ki/is.› »

Malaykamo Gabrieli iigu'utu nguwa waagweér

¹⁵ «Qoomár anuú Danieli iigu'utuwí nguwa ár nee nguwa aldakuut, naxés slaqsoó adór hee nina gaanslár hardáh iri sihhiít geeraaeé'.

¹⁶ Afór hee ana axaás i atetiín tla/ángw yaaér Ulaír wa ale, i kat, ‹Gabriéli, heesíng xu'utisek kángw iigu'utuudá' aa ari›

¹⁷ Gabrieli niri tseewúy didá' aníng nay sihhiít. Aníng niri da'ayuút ló'wa aleeró, niri gurúr qaát. «Ala aníng iri báy, ‹Aá heewí, iigu'utudá' taa aán gár i kaahi a daanduú muruú deelór alhhe'eesaay.›

¹⁸ Qoomár iwa amor'eé' axweesi, aníng ana xopiít gu'uteero amooqae aga gurúr qaát yaamií ale. Ala inós aníng iri taataáhh iri sihhtís.

¹⁹ Aníng iri báy, ‹Iia qaaseek, aníng buhhtá Mungú ngi oó' adór i laqiya'. Iigu'utuwí a daanduú qoomár alhhe'eesoó yaamu.

²⁰ «Gwaanduudá' xareemaá tsár koóm, kudá' kuúng taa aán, a waawituú múk Medi nee oo Persia.

²¹ Nee gurtuudá' taa aán oo se'éngw yaariír koóm a waawutmoó Griki. Nee xarmoodá' wák oo gawaá gineerós a waawutmoó geerií waawuti'iím.

²² Xarmoodá' aa qeet kitangose xareemaá hatlá' awa tsiyáhh nina ti'iitiyé', gídaabárós a tí: Waawuti'iimarí i qasít, tari waawuti'iimár ninakw tsiyáhh, ala waawuti'iimadár hatlá' tsiyahhaawo /uuru gu ak sleeraaká, adór waawuti'iimadár geeraá wa aleeró.

²³ «Qoomár waawuti'iimarí bar alhhe'eesaywós gwa eér, nee tlakweemaaín naa bu'uutiyé' alhhe'eesay ngwa ayé', waawutmoó wák oo fuqurángw koóm oo /uuruú koóm ni hardah.

²⁴ Inós i ló'wa aleesleemuú kón, nee muruú yaariír gu ló'wa hhitín, umuú gaaro ar i tleehhamór wa slai ga aleesláy. Múk yaariír oo iia tleér nee múk hhohhó' oo Mungú gu hhaamiis.

²⁵ Asma inós tawa fuqurusmo baraá muruú tlakwe i ló'wa waaraahh nee tiri xirfayees. Múk yaariír gu naaqo tsuu/ nee sleeme inós nee geeraharusmoó geeraharuuse ti tlaampa'aasiyá', ala inós ku suqúy nee Mungú tam dákw hee gur gadiyusiiká.

²⁶ Iigu'utudú ilahhooár tsiindo nee matlaatle tinda kuúngií oó' oo ló'. Hamí ala maweek baraá naaqórí ale, asma hardahamuuwós ku baloó tseeweeká oo iwa boo/i.

²⁷ «Anuú Danieli ana /araám, niri tiíq deelo alé. Niwa huunguú/ niri kumiít gadiyeedá' waawutmo iga bayi. Ala iigu'utudá' aníng ina waa/o/amórár áy, ala aníng ugwa tsaahhiiká.»