DANIELI 7 - Biblía Axweesantá Hhohho' ar Mungú 2004

Iigu'utuú Danieli oo makaá urén awa tsiyáhh

¹ Kurkú geera oo Belshasa waawutmoó Babuloni iwa waawuti'ín, Danieli ina tlatiitín nee iigu'utu guna ár qoomár iwa qaát gawaá qatantós. Tlataawós kudá' giri ququmareés gooiro.

² Danieli iri oó', «Aníng iigu'utu una ár xweeraawo, naxés fur'a i fukuukú' bihhe sleémeerowo nee i tlawtá /eeragaamís.

³ Makaá diren awa tsiyáhh niri ti'iitiyé' baraá tlawtá wa alé, umuú makiito'ooro a dimbé nee ar hatlá'.

⁴ Makiito'ór geera a slaqmís nee diraangw, slám i hhaampa'aá koón adór kuqaá gwareesi. Qoomár ngiwa adoorí wa ga/aw, hhampi'iiwós kina tu/ún, inós kari gáwtí tleés iri sihhít ar ya'aá tsár adór heéwár aleeró. Kari fuqurángw heéwí haniís.

⁵ «Naxés makiito'ór hatlá' ar tsár ngiri ár. Inós a adór duúbu, inós kaa sihhitís ar ya'aá alu. Afkose gweehhaamaá tám gaa kíhh. Aforka iri ó', ‹Gimáy, fu'unaá yaariir /ayeek qoomoó ta asleesleer.›

⁶ «Alaá tihe naxés makiito'ór hatlá' nina malé ti'ít, ar adór du'uma oo hhaampa'aá tsiyáhh koóm gawaá daanduuwose. Inós sage ngi koon tsiyáhh, nee inós kari baalírí haniís.

⁷ «Alaá tihe baraá iigu'utueene naxés makiito'ór tsiyáhh ngiri ár, a makiito'ór waa/oo/amo nee ar dae tlaaq, ar ló'wa /uuruú koom. Makiito'oorí sihhnaá diren awa muqsla gi koón, awa ir /ayiin. Nee fu'unaydá' naa meetiyé' giri feehhamís, giri yaamú i kal/aán ar tsa/aá ya'aawós. Inós a slaqmiseeká nee makaydaá hatlá' tám naa geerií ár, inós xareemi ngi koon a mibaangw.

⁸ Qoomár niwa xareemiwós aldakuut, naxés xarmoó wák oo niiná i ti'imiit baraá tla/ángw xareemidá' mibángw wa alé. As xarmoodá' pa/aangw nguwa slay xareemidá' awa tám kina dee/aruuín altu/ún. Ilaá makiito'oodá' a adór kuqaá hee, nee afkose /ayma'aá taqanaa/i ginar axwés.»

Iigu'utuú kudá' hotaatiím ay alhhe'eesay wasle

⁹ «Qoomaadár kilá' aníng niwa xumiis, kiteeraá waawuti'iima kina qaás. Naagáy aakoodá' daadáw kureerisleém, iri iwiít gawaá kitaangós oo aleesleemu, tlabaá /awak nga dahaás adór tlaa/aá tluwaay, se'eengós a adór se'éngw /awák oo bee/aangw. Kitaangós oo waawutmi'iima a adór tsángw asla, nee /angeegeuwós i oh aslto.

¹⁰ Baraá kitangwdae duxuú asla niri waá/, dír geeraawós wa ale. Múk kumér Inós kuri sagadiyuús, slám múk kumér kúm ina geeraawós i sihhiít. Doó kwasleema kawa tleehhi kuri amoohhe'eés nee kitaabi'i kiri gweér.

¹¹ «Qoomaadár kilá' niwa xumiis as /aymi'iidaá daara/aangw awa xarmoodá' niina i kaahi, hamtidár kilá' makiito'oodár tsiyáhh kari gaás, kari hhitín, nee kari daá/ baraá asla.

¹² Makaydaá hatlá' naa meetiye' aleesleemuín kuri hayóh, ala inooín har afiqoomár deelór niinawe kina slafíngwí máy.

¹³ «Baraá iigu'utuú xweeraawo naxés, hee una ár oo slaqás adór garmoó Hee, naa hardáh ar gawaá huunkáy, iri hardáh dír aakoodá' daadáw kureerisleém, nguri dír geeraawós huwiyé'.

¹⁴ Inós kuri baalírí haniís, nee xirif nee waawuti'iima, as múk tlahh'i sleémeero, nee oo xoordu sleémeero, nee tsifri sleémeero kuwa sagadiyuusi. Waawuti'iimarós ar alhhe'eesaay wasle, i baloó waarahhká, nee waawuti'imarós ka baloó hhitinká.»

Alki/ituú iigu'utu

¹⁵ «Iigu'utuudá' anuú Danieli iri dae tsaát, niri amoqwaqwadiím.

¹⁶ Heé wák una i tseewúw dír mukdá' aa amorqá' i sihhiiti, nguri yaahaás, ‹Gár muruuwi sleémeero i laqaaqan a milá?› Gawaá adoorihe gár muruudá' i laqaaqan inós ngiri oó'.

¹⁷ ‹Makaydá' tsiyáhh diren a waawituú ni ti'iít baraá yaamuwo.

¹⁸ Ala mukdá' hhohhó' oo Munguú Gawa, inooín waawuti'iima ngi ilaoohiyá', inooín waawuti'iima ngiri aaliyá' ay alhhe'eesay wasle.›

¹⁹ «Aluuwo aníng ana ló'wa slaá' daanduú makiito'oodár tsiyáhh nguwa axaás, tidár hatlá' dír makaá hatlae, tidár waa/oo/amo nee dae tlaaq, tidá' sihhnaawós handá' a muqsla nee fuqeeniwós a muqslír sirdaa/aat. Sihhnaaká' ginar /ayiín nee ginar feehhamís, muruudá' aa meetís gun yaamií kal/aán ar tsa/aá ya'aawós.

²⁰ Aníng sleeme ana slaá' kángw niiná kunguwa alki/iiti daanduú xareemidaá mibaango, daanduú xarmoó naa aluúwaá ti'iit, slám dír nira ti'iitiká xareemaá tám nina tu/umitiyé'. Xarmoodá' ilaá koóm nee afko, kuduú axweesanoó daara/aangw gwa axwees, nee handá' ku ak úr dír xareemaá hatlae.

²¹ «Qoomár ngiwa adoorí wa ga/aw, xarmoodá' nee mukdá' hhohhó' oo Mungú tina muxiyé', inós mukdá' guri baál.

²² Ala aakoodá' daadáw kureerisleém iri sihhiít, mukdá' hhohhó' oo Munguúduú Gawa guri hariímar'ín i haniís, nee qooma iwa xeér, mukdá' waawuti'iima gari ilaaóh.

²³ «Inós aníng iri báy, ‹Makiito'oodár tsiyáhh a waawuti'iimár tsiyáhh, ar ti'iit gawaá daanduú yaamuwo. Waawiti'iimarí a dimbé nee waawuti'iimár hatlá', inós yaamu sleémeero gi qwaarés. Inós yaamu gi kal/aán giri feehhamís.

²⁴ Xareemidaá mibaangw taa aán, a waawituú mibaangw oo waawuti'iimadá'. Aluuwo waawutmoó hatlá' oo dimbé ni ti'iit inós waawutuú tám gu daraahh.

²⁵ Kwí Munguúduú Gawa gu /ooslislín nee mukdá' hhohhó' oo Munguú Gawa guri baramaanuús. Inós ado gan leeleehh ar qooma ngir warqeesi nee dabeero, nee múk hhohhó' ku gawaá dabaawós i qaas har afiqoomár kureeri tám nee tlaqi.

²⁶ Ala kwasleemár gawaá doori ka iwitiis, nee baalír waawutmoodá' kan hayoh as kawa fiitsi nee kawa tsumumu'uusi.

²⁷ Nee waawuti'iima nee aleesleemu nee uraay sleémeero oo gawaá daanduú yaamu ku haniís dír múk hhohhó' oo Munguúduú Gawa. Waawuti'iimar'ín in hotaatiín ay kureeraá kureér, nee baaluuse sleémeero gin sagadiyús nee giri ilaiwawá/.›

²⁸ «Gaarí a alhhe'eesoó kaangwí. Anuú Danieli niri daanda feehhiís, tam kalay'eé' iri warqáy. Ala kaangwí una alhooreés baraá muunaáeéní aleeró.»