DANIELI 6 - Biblía Axweesantá Hhohho' ar Mungú 2004

Danieli kuwa geewaqaát

¹ Ala Dario tawa waawutmo inós geeraharuusér slaqwaruuse ar tsiiru nee mibeeri tsár gana qaás baraá yaamuuwós sleémeero.

² Múk urén oo tám sleeme guna qaás oo mukdá' gu geeraharahaár. Baraá mukwihe Danieli a heé wák. Kina qaás as muruú waawutmo nguwa harmagahhiya' nee badeé munguwa /ák.

³ Alaá deelór niinawe Danieli kuri tsaáhh tawa heé inkihhimuú koóm baraá gadiyeede ta ak mukduú hatlá' sleémeero, kudá' taa geeraharu'uumár wa qaasi, asma Danieli inós a heé hhoó'. Gawaá adoorihe waawutmo guri slaá' nguwa waawuti'iima sleémeero ii haniisi.

⁴ Mukdá' urén dinkwa nee ga/awuuse adór Danieli ngur lámtí tsatiya' ngiri leelehhitiyé' baraá muruú waawuti'iimaro, ala nga slay'iiká, asma Danieli i ló'wa inkihhimuú kón, asma dakuusár Danieli aa tleéhh i káhh. Laqaá insarehhamoó taa ár i kaahh.

⁵ Aluuwo niri kilooín axweesiyé' tari oó', «Gár Danieli kur slawaan i káhh, barnaxés u sakwasleemár wa sla'aán, ala aqo un sakwasleemutaán ar kángw Munguúwós.»

⁶ Aluuwo geeraharuusér uren nee ga/awuuse tari kaahi slayé', tari dír waawutmoó káy, kuri báy, «Aá waawutámo Darío, sagók fur'a ngu laaleer.

⁷ Ateékaá geeraharuusér uren taa qás, nee sagesihhtuusero, nee ga/aawuuse, nee hara'ayuusero nee geeraharuusér ayeemowo, sleémeero taa kaahi slawaán, asma aga araán i qoón kuúngú waawutmo, hara'aya kawa o' nee masók aqo kan eehar adoodá' kas hariím. Masók har afiqoomár deelór mibeeraá tame, hee tam gaalá gaa mingiwa firín, tam dír mungú gaalá, laqaá tam dír heemá, ala masók aqo dirók kuúngú waawutmo. Hee barnaxes hara'ayaarí gaa sií' ku kwahhi baraá mar'ír direeri.

⁸ Gawaá adoorihe, gimáy waawutmo Darío, hara'aya ooeek, nee ka dugunoowók i qás as makawa warqeés. Daqaní a dabér múk Medi nee oo Persia, dabér ta baloó warqesiiká.»

⁹ Gawaá adoorihe waawutmo Dario dabeedá' gari dugunií qaás.

¹⁰ Danieli ngiwa tsaáhh waawutmo duguno gwaa qaás, inós iri kií/ amór do'ós kuduú qorofa, baraá kutuwirós tidá' pa/eeriwós taa kiís i amór Yerusalemúr ga/ayá'. Danieli umuú deelooro in tumbarara'amamiit looár wake sagaáwa tám, as Munguúwós nguwa firiirin nee nguwa sluufmiisi adoodá' /iisí i /imaamisi.

¹¹ Aluuwo mukdá' Danieli gwa geewaqaat niri dahiyé' baraá dó' i alé, naxés Danieli i Munguúwós firiirín nee gun i /aa/amín.

¹² Aluuwo inooín nay tlayé' ay dír waawutmo as Danieli kuwa sa fooli as dabeedá' ngiwa ar gadiyusiya', tawa kaahi, «Waawutmo Dario, kuúng gooidá' aga dugunií qasikáhe, as hee baraá deelór har afiqoomár mibeeri tame munguú hatlá' munguwa firín, laqaá hee, aqo har kuúng waawutmo. Aá waawutámo nee barnaxés, heé dabeerí gaa warqeés ku kwaahh baraá mar'ír direeri.» Waawutmo iri oó', «Umuú gaaro i didií káhh adoosír kilá', adoodá' dabér múk Medi nee oo Persia kar warqemaamisiiká.»

¹³ Waawutmo nguri bayé', «Heedaádá' ta bay Danieli, kudá' tinda huúw baraá yaamaá Yuda wa alé, kuúng u iiárií qaminká, laqaá hara'ayaadá' kuúng taa dugunií qás ga iialooeesiiká. Asma inós umuú baalaaro firo ngi hhe'eemisi ay sagaá wa tám.»

¹⁴ Waawutmo adoorí ngiwa axaás ina ló'wa gurhamuút. Inós ilakaaharu guna tleéhh as Danieli nguwa tu/i. Ina kumiít iiarto as Danieli nguwa /iisi ala gwaa aleeslayká. Ina karkarimamiít looa gar wa dát.

¹⁵ Aluuwo mukdá' tina alkón sleémeero ay dír waawutmo Dario nee nguri bayé', «Aá waawutámo, kuúng a xú' dabér múk Medi nee oo Persia ar waawutmo aa dugunií qaás ka baloó warqemaamisiiká.»

¹⁶ Aluuwo waawutmo Dario hara'aya gari oó', Danieli kuri kwaáhh baraá mar'ír direeri. Danieli kuri báy nee waawutmo, «Munguúwók kudá' ta sagadiyumaamis umuú daqto u tu/i.»

¹⁷ Tlaa/ano kuri afkudár tuuntuúk. Waawutmo dugunoowós guri qaás gawaá tlaa/anoodá' nee geeraharuusér hatlá' dugeeni'ín giri qás. Adoorí kana tleéhh as kahhó' Danieli mukuwa /iís tam nee hee gaalá.

¹⁸ Naagáy waawutmo iri kií/ baraá do'ós, xweera sleémeero ina dal'aa'aát, tam muruú /ayma gwaa afkwár kayká nee gu'ute gaa ilií qaasiiká.

¹⁹ Matlaatlér boo/e waawutmo Dario ina tseewa tláy qatuuwo, iri amór mar'ír direeraá káy ar gaanslaay.

²⁰ Iwa tseewúy bihhaá mar'i, Danieli guri ateét ar afór gurhaami, iwa kaahi, «Daniéli, sagadiyusmoó Munguú slaáf. Xáy Munguúwók kudá' ta sagadiyumaamis umuú daqto ugwa aleesláyi tu/to dír direeriwo?»

²¹ Danieli waawutmo guri báy, «Waawutámo, kuúng sakók fur'a ngu laaleer!

²² Munguúeé' malaykamoowós nguna ya/aáw afér direeri gari tsegiít, inooín aníng adór iga /iisiyé' i káhh. Asma inós ga xuu' aníng ti dakuús wásl dirose, tam dír geeraawoge gár tlaakw aga tleehhiiká.»

²³ Waawutmo iri ló'wa qwalaá/, muu guri ádbáy, Danieli kuwa duuxi baraá mar'iro. Naagáy Danieli kunguri duúx, naxés kwa gweehhiiká tam adór niiná, asma inós Munguúwós guna harahhiíf.

²⁴ Waawutmo hara'aya gari oó' ar mukdá' Danieli gwa safool kuwa uhin nee kiwa kwakwahhi baraá mar'idár direeri dinkwa nee tlaaway'ine nee na/ii'ine. Inooín kina gawa aleeáy nee direeri nee kiri faák dír nira hardihii'iiká faduuín kiri suwawa'án.

²⁵ Aluuwo waawutmo Dario barwiito'o gari gooín amór tlahh'aá muu sleémeero nee xoordu nee tsifri sleémeero, «Aníng kuungá' nu wayduú úr i slaá'.

²⁶ Hara'aya aga qaás as muu sleémeero baraá waawuti'iimar'eene, Munguú Danieli kuwa da'ayumiti nee kuwa ilaiwawa/i. «Asma Munguúwí an Munguú slaáf, kudá' hotatiím kureerisleém, waawuti'iimarós ka baloó hhitinká, waawuti'iimarós i alhhe'eesoó koondaaká.

²⁷ Inós i tu/ún nee i ba/amiimis, inós layu nee muruú waa/oo/amo gin tlehhiit, gawaá doori nee baraá yaamuwo. Inós an kudá' Danieli gwa ba/amis dir direeriwo.»

²⁸ Naagáy Danieli diihhooa gana sláy de'emaá waawutmo Dariowo nee sleeme de'emaá waawutmo Koreshi, heé Persiawo.