DANIELI 5 - Biblía Axweesantá Hhohho' ar Mungú 2004

Muruú /aymár úr oo Belshasa aa qaás

¹ Looarka wake waawutmo Belshasa muruú /aymár yaariír oo múk kumér yaariir guna qaás, nee difaái ngiri xufiyé' dinkwa nee mukdá' didií dirií'.

² Qoomár tawa xufiiti Belshasa iri oó', «Xoosladár sahaábu nee tidá' taa peésár tleehhi tidá' baabuúeé' naa haasaáng wa huúw baraá Doó Mungú kuduú baraá Yerusalemúr wá ale huwaare', as difaái kawa xufaan ar xoosluusíng, aníng nee bariisero nee tlaaway'eene nee /ameenar'eé' tidá' qutúr wasle.

³ Naagáy xoosladár sahaábu nee xooslaadár peésa, tidá' tinda huúw amór Doó Mungú wa ale baraá Yerusalemu, kingiri huúw. Waawutmo nee bariiseerós tidae nee tlaawaywose nee /ameenarós tidá' qutúr wasle, xooslaadá' ngiri difaáírár xufiyé'.

⁴ Difaái ngina xufiyé' amooqae i munguaá hatlá' xirfayemisiyá', kudá' taa tleéhh ar sahaábu nee peésa nee ar muqslár sirda/aten, nee muqsla nee xaai nee tlaa/e.

⁵ Naxés hamtidár kilae, ditsaá dákw hee niri ti'iitiyé' niri gooíné' gawaá na/amisuú koo/ír doó waawutmo, didií ló'wa gwa/át, nee a afiqoomár tsa'aasi. Waawutmo dakwdá' qoomár iwa gooin guna ár.

⁶ Gitse/aá waawutmo niri warqayé' inós iri daanda feehhiít, diqiyawós niri tsatiitiyé' nee gurunge'eeriwós niri kitlkitliitiyé'.

⁷ Waawutmo Belshasa iri tseé' ar afór ur as qwaslaare kawa huwi nee da/aluuse nee qwaslaarér tsatse/uwo. Qoomár niwa hardihiyé', waawutmo giri báy, «Heé gooirí soómaro ga aleesláw nee gár i kat ngiri oó', ku tlabaá hhohhó' í dahaas awa sirda/aten, nee kun isa himtuú sahaábií dahaas, nee kun heé tám wa qaas baraá waawuti'iimaro.»

⁸ Naagáy múk sageeloén oo waawutmo sleémeero niri hardáh, ala gooidá' soómaro nga aleeslay'iiká, tam gooidá' gár i kat ooaro kaa aleeslayká dír waawutmowo.

⁹ Naagáy waawutmo Belshasa iri ló'wa daanda feehhiít nee kalaywós iri warqáy tam bariiseerós iri amooqwát.

¹⁰ Tsimaahhír waawutmo nee bariiseerós aayór waawutmo ngiri kwáhh iri dát baraá matla/angwdá' tawa xufiiti, iri ó', «Waawutámo, sagók fur'a ngu laaleer, adoosíng i gana'ká inslawaywók uwa daanda feehhisi nee kalaywók iwa warqay.

¹¹ Waawutámo, baraá ayaawoge heeko wák oo qeeruú Munguúdá' hhoohhoó' gu koóm i deer, qoomár waawuti'iimár baabuúwoge heewí una tsaahhaán inós tawa heé fuqurángw koóm, nee tsaahha nee sagalooár adór tiqár mungui. Baabuúwók waawutmo Nebukadnesa heedaádá' guna qaás tawa heé úr oo qwaslaare nee oo da/aluuse nee xu'utuusér tlata nee xu'utusér tsatse/uwo,

¹² asma inós i qeeruú ganaá' kón, tlata gi waagweer nee tsaahharo nee xu'utiro. Inós tlata waagweeraro gi aleesláy. Umuú heewí a Danieli. Baabuúwók guna umií tsaát ku bay Belteshasa. Gimáy heewí ateetaak, inós gár gooirí i kat daqaní ngi oo'.»

Danieli gooi ngiwa waagweér

¹³ Naagáy Danieli kuri huúw dír geeraá waawutmo, waawutmo guri yaahaás, «Xáy, kuúng a heedaádá' ta báya Danieli, kudá' baabuúeé' waawutmo naa baraá yaamaá Yuda wa húwi?

¹⁴ Aníng aga axaás adór qeeruú Munguúdá' hhoohhoó' ir baraawók nee adór kuúng sagalooa nee fuquraangw nee inslawoó ganaá' kur koón.

¹⁵ Hamí múk sageeloén nee da/aluusero kingina dír geraaeéní huúw as gooirí ngiwa soomusiya' nee gár i kat ngiwa ooiya', ala inooín ngaa harslaaqatiyé'.

¹⁶ Ala aníng aga axaás adór kuúng kaangwí gwa/aatisaro kur aleesleér nee slahh'amuuwós nguri ó'. Ala barnaxés gooirí soómaro aga aleesleér nee gár i kat ngiri ó', kuúng tu tlabaá sirda/atén i dahaas nee himtuú sahaábu kunguri dahaas baraá istók. Nee baraá waawuti'iimarihe kuúng tun heé tám wá qaas.»

¹⁷ Danieli waawutmo Belshasa guri báy, «Waawutámo qeemuwók koomeek, nee bu'utuuwók haniiseek dír heé hatlá'. Tam nee adoorihe waawutámo, aníng gooisíng ngi soomuús nee gár i kat ngi oó'.

¹⁸ «Aá waawutámo, Munguú úr baabuúwók Nebukadnesa guna waawti'iimárí haniís nee uraay nee xirif nee aleesleemuwo.

¹⁹ Asma uraydá' ngway haniisi, múk tlahh'i sleémeero, nee xoordu sleémeero nee tsifri sleémeerowo nguna sadaaraaxiyé' nee nguna da'ayumitiyé', Nebukadnesa heé i gaasár wa slai aqo guna gaás, nee kudá' i slafíngw ár slai guna slafíngwí máy. Heedaádá' aa urár slaá' aqo gun uráy haniis, nee kudá' i hingeesár wa slai baraá waawuti'iimaro aqo gun hingees.

²⁰ Ala as inós iwa daara/uút nee iwa sagagawdúy iri waahhamín, kuri hingeés gawaá kitángw waawuti'iimaro, tam xirfuuwós kuri hingeés sleeme.

²¹ Inós kuri guús dír muko, fuquraangós kuri adór kuquú makiito'ór sla/a tleéhh. Inós nee daqwaayér sla/a tari alhoót, gitso gari /aáy adór awu wa ale. Slaqwtós kari naa/amiís nee har'uú gawaá doori ay qoomár ngiwa tsaáhh adór Munguúdá' úr tar kudá' waawuti'iimár muu ga sawaawuti'i'iím, nee inós heedaádá' i waawuti'iimár ár slai gun waawutmoó wá qaas.

²² «Nee kuúng Belshasa, a na/aywós, tam tí sleémeero a xua, kuúng taa niinaweská.

²³ Tam muruuwí sleémeero ugwa xui. Ala kuúng kitángw Aakoó doori kuwa xirfayes, kuúng tina kilók urés, xooslaá Doó Mungú kiri léhh kiri difaáirár xúf, kuúng nee bariiseroge nee tlaawaywoge nee /ameenarók tidá' quturmo wasle. Kuúng munguaá taa tléhh ar peésa nee sahaábu nee muqslír sirdaa/aat, nee muqsli, nee xaai nee tlaa/e kiri xirfayemiís, munguaá xumisa'aaká, nee i axamisi'aaká laqaá gár i xuiya' i káhh. Ala Munguúdá' slafiingók gu taami koóm nee kudá' lohduuwók gi xuú', ugwa ilaiwa/amér i tlehhká.

²⁴ Ala Mungú dakós ngwa ya/aáw as gooirí ngiwa gooin.

²⁵ «Gooidá' a tí MENE, MENE, TEKELI, nee PERESI.

²⁶ Gaarí an gár axweesantí i kat, MENE, gár i kat a Mungú deelór waawuti'iimarók gaa faár nee gaa alhhe'eesáy hardahaás.

²⁷ TEKELI, a kuúng taa qoomeés ar qoomaay, naxés kuúng tu ló'wa inslaáhh.

²⁸ PERESI, a waawuti'iimarók aa qasít dír múk Medi nee múk Persia.»

²⁹ Aluuwo waawutmo Belshasa iri oó', «Danieli tlabaá sirda/aten ti dahase', nee istós himtuú sahaábu ti dahase'.» Kari oó' dír muu adór Danieli tar heé tám baraá waawuti'iimaro.

³⁰ Xweeraadaá kilae waawutmo Belshasa oo múk Kaldayo kuri gaás.

³¹ Waawutmo Dario oo múk Medi waawuti'iima gari óh, qoomaadae inós kureeriiwós a mibeeri lahhoó' nee tsár.