DANIELI 3 - Biblía Axweesantá Hhohho' ar Mungú 2004

Tlehhmuú murslaaqatuú sahaábu

¹ Waawutmo Nebukadnesa murslaaqatuú yangaariír guna tleéhh oo sahaábu, tlenaangós a miíta mibeeri tsár nee dakaát. Uroó bihheero a miíta tám, guri sihhtís baraá tlapár Dura ar baraá yaamaá Babuloni.

² Naagáy waawutmo Nebukadnesa geeraharuusér slaqwaruuseerós gari i ya/abín iwa burumbuuritiya', nee sageesihhtuuseero nee ga/aawuuseero nee kwasleemuseero nee múk tlakwa'aá peésár amohhe'eemisa nee har'ohuseero nee múk kwasleemadaá tlaaqa nee geeraharuuse sleémeero ar ayeemo, as murslaaqatuuwós nguwa xu'utisi dír muu, nee kuwa iimu/un i tumbarara'amituuwo.

³ Aluuwo sagesihhtuuse nee ga/aawuuse nee kwasleemuuse nee múk tlakwa'aá peésár amohhe'eemisa nee har'ohuuse nee múk kwasleemadaá tlaaqa nee geeraharuuse sleémeero tari burumburiít as murslaaqatuudá' kuwa iimu/un, kudá' waawutmo Nebukadnesa aa tleéhh. Tari sihhiít dír geeraá murslaaqatuudá' Nebukadnesa aa sihhitís.

⁴ Heedaádá' ilaaharmiís amór muu, iri tseé', iri oó', «Gimsé' múk tlahh'i nee tsifri sleémeero tundu babay,

⁵ ‹Qoomár afór xareemi nee ar filiímbiro nee ar gidaandoori nee ar seéseero nee ar mariímbaro nee ar oowiro, nee ar umuúqo xooslár daa'aango bara axasé' aqo gitsee/erhúng an yaamúr otá', nee murslaaqatuú aáng Nebukadnesa aa tleéhh ar sahaábu, guri sihhitís, un ii tumbararaa'atá'.

⁶ Heé aa tumbarara'atiiká nee oo gwa sluufisiiká aqo siiwadár kilae kun kwaahh baraá bohóngw asla iwa ot.› »

⁷ Naagáy qoomaadár kilae múk tlahh'i sleémeero afór xareemi nee ar filiímbiro nee ar gidaandoori, nee ar seéseero, nee ar mariímbaro, nee ar oowiro, nee ar umuúqo xooslár daa'aango kawa axaás muu sleémeero nee xooro tsifriro tana tumbararaa'aát dír geeraá muslaaqatuuduú sahaábu as kuwa sluufmiisi, kudá' taa tleéhh nee Nebukadnesa.

Mulqér Danieli kawa sakwasleemuút

⁸ Gawaá adoorihe mukko Kaldayo iri tláy as múk Yahudi kuwa sakwasleemuuti.

⁹ Waawutmo Nebukadnesa kuri báy, «Aá waawutámo, kuúng sagók fur'a ngu laaleer,

¹⁰ kuúng hara'aya ana ó', umuú heewo oo afór xareemi nee ar filiímbiro nee ar gidaandooriro nee ar seéseero nee ar mariímbaro, nee ar oowiro, nee ar umuúqo xoolár daa'aango, i tumbararaa'ati dír murslaqatuuduú sahaábu as nguwa sluufmiisi.

¹¹ Nee umuúqo heewo oo aa tumbarara'atiiká a kwahha baraá bohóngw asltá gufteeri.

¹² Mukko Yahudi kuúng taa qás baraá waawuti'iimár yaamaá Babuloni, ín Shadraki, nee Meshaki nee Abednego, axweesantók ngaa iialooeesiiká, nee sleeme munguiiwók ngaa sagadiyusi'iiká, tam ngi sluufmisiaaká.»

¹³ Naagáy Nebukadnesa iri ló'wa daa/atúy buhhtawo iri oó', «Shadraki, nee Meshaki nee Abednego dir'eéní huwaare'.» Inooín kiri huúw.

¹⁴ Nebukadnesa iri oó', «Aá Shadraki nee Meshaki nee Abednego, xaysé', axweesantí tawa kaahi murslaaqatuueé' kuduú sahaábu naa sihhtís ugwa ilaiwaa/i'iiká nee ugwa sluufisi'iiká ar lóe?

¹⁵ Gimsé', hám bar aga ya/aandé', afór xareemi nee ar filiímbiro, nee ar gidaandoori, nee ar seéseero, nee ar mariímbaro, nee ar oowiro, nee ar umuúqo xooslár daa'aango, bar aga axasé', nee bar muslaaqatuudá' naa sihhtís ugwa ii tumbararaa'até' nee kuri sluufisé', daqaní adór hhoo' nee ar qoom aga tlehhé'. Ala adoorí bar aga sié', siiwarír kilae tundu kwahhtá áy baraá bohongwduú asltá gufteeri. Axáy a Mungú gaalá oo nu ba/amís gawaá dabaaeene?»

¹⁶ Shadraki nee Meshaki nee Abednego waawutmo kuri báy, «Aá waawutámo, gawaá /aymuusinge atén gár ni ooaan i káhh.

¹⁷ Bar adoosíng Munguúrén kudá' atén ta sagadiyusaan tiqo ba/amis baraá bohongwduú asltá gufteeriwo, inós atén ti ba/amis baraá dabaá waawutmoowo.

¹⁸ Ala bar adooriheeká, xueek waawutámo, atén a ya/amanaaká munguiiwók kiwa sagadiyusaan, laqaá murslaaqatuusíng oo sahaábu kuwa sluufmiisaan.

Sakwasleemár mulqér Danieli

¹⁹ Naagáy Nebukadnesa iri qa/iít, gitsee/aawós niri warqayé' asma ín Shadraki nee Meshaki nee Abednego. Iri oó', «Asla ló'wa slaxaak sagaáwa faanqw ta tidár /iisirkohe.»

²⁰ Hhawaataá /uuremaá koomá' baraá slaqwaruuseerose gari i axweés Shadraki nee Meshaki nee Abednego kiwa tsegiti nee kiwa kwahhi baraá bohóngw asltá gufteeri.

²¹ Naagáy kiri tsegiít, inooín surwaánay'ín ngwaa dahaasiyé' nee shaátay'ine nee kofyaduuwo nee tlabaá hatlae, kiri kwaáhh baraá tla/ángw bohongwduú asltá gufteeri.

²² Asma waawutmo iwa xarasleemár ilawaáts, asladá' kana lo'wa slaax, adoodá' ira ót ka ló'wa hatlá' tam mukdá' ín Shadraki nee Meshaki nee Abednego ngaa kwahhtá aye' asltadá' giri tsú/.

²³ Mukdaádá' tám Shadraki nee Meshaki nee Abednego tana paáhh baraá asltadár gufteeri, amorqae kaa tsegiít.

²⁴ Aluuwo Nebukadnesa iri waa/oó/, iri sihhiít ar gaanslaay, mukós kudá' gu gurbu'uúm guri báy, «Xaysé' mukdá' taa kwahhaán a tameekáhe oo taa tsegiít?» Tari oó', «Eeit waawutámo, a ló'.»

²⁵ Iri oó', «Qaytsité' án baré muu ngu ga/aw a tsiyáhh, slám kwa gweér, i baraaqá' wa hi'imitiyá', gár gi a'aw i káhh. Nee slaqsoó kuquú tsiyáhh a adór malaykamo.»

Mulqér Danieli kawa gweér

²⁶ Aluuwo Nebukadnesa iri saáp dír afkú bohóngw asltá gufteeri, iri oó', «Aá Shadraki nee Meshaki nee Abednego, sagadiyuusér Munguú Gawa, ti'iitaré', qwalaasé' amoorí.» Aluuwo Shadraki nee Meshaki nee Abednego tari ti'iít baraá asltadá wa aleeró.

²⁷ Geraharuusér slaqwaruuse iri burumburít, nee sagesihhtuuseero nee ga/aawuuseero nee kwasleemuuseero, ngiri ariyé' adór daaqaydá' asla ngura kwatitká, tam se'éngw sager'ín gwa slohhká, tam tlabaaín asla gaa tsaara'aská, tam quui sleeme i tlatleeraaká gawaá slaqooine.

²⁸ Nebukadnesa iri oó', «Munguú Shadraki nee Meshaki nee Abednego i xirfuuti, kudá' malaykamoowós ngwa ya/aaw as sagadiyuuseerós tidá' gwaa haratlinti' ngiwa ba/amisi. Hara'ayar'eé' tidár anuú waawutmo naa oó' ngiri tawo tleehhiyé' as haratlintaaor'ín, tari ya/án slaqooín kiwa slahh'eemisi ta mungú tawo nguwa sagadiyuusiia, ala aqo har Munguúín kilós.

²⁹ «Gawaá adoorihe aníng hamí an kah, umuú tlahhaywo nee umuú xoorooro nee umuú tsifriro ar múk /aymuú harimaaká gu oo' daanduú Munguú Shadraki nee Meshaki nee Abednegowo, xoorór adoorí mukós kun supín tay kaeemaá dimbadimbé, maray'ín tay taangu. Asma Munguú hatlá' oo hee gu aleesláw ba/amisaro ar loohír adór tí i kaahh.»

³⁰ Aluuwo waawutmo ín Shadraki nee Meshaki nee Abednego giri uráy haniís baraá yaamaá Babuloniro.