DANIELI 12 - Biblía Axweesantá Hhohho' ar Mungú 2004

De'emaá alhhe'esaay

¹ «Qoomaarihe Mikaeli, malaykamoó úr kuduú xuumusmoó mukók ni hardah. Qoomaadae slahh'amuú ló'wa yaariír i iimu/ún baraá yaamuwo oo aa baloó deerutiiká iimír xoordu niwa iimu/uné'. Ala qoomaarihe baraá mukoge, mukdá' taa ume gooín baraá kitaábuú slafiingw ku ba/amis.

² Múk yaariír kudá' aáng aa qaro qaatl, nin waaslee/, bahh'alé slafíngw alhhe'eesay wásl ngu slayá', nee bahh'alé mure nee waqaaqa' ngin slayá' ay alhhe'eesay wasle.

³ Mukdá' sagalooár koóm ta gwa/aat adór doori, nee kudá' muu ngwa geerahariye' baraá hotaá ganaa'á' i suwaahamitiyá' adór tsatse/ ay alhhe'eesay wasle.

⁴ «Ala kuúng hám Danieli, muruuwí qaaseek baraá lu/aaráy, kitaábuuwí tseegeek nee ku dugunó i qás ay dír qoomár alhhe'eesay i hardat. Múk yaariír i ta'aaín amorqá' nee taqae, nee fuquraangw i ló'wa doogín.

⁵ «Aluuwo anuú Danieli ana qaytsiít, múk tsár aa sihhiít dír gangeefír yaae, oo wák i bartí nee oo tsár i gayuuqá' i dirii'.

⁶ Heedaádá' aa bihhaá gáwtí sihhiit awa yaae, kudá' tlabaá neewór kitaánidá' hhohho' ngaa tsiit, nguri yaahaás nguri báw, ‹Muruuwí i kumamiti ay xaylá iwa faakiiká?›

⁷ «Heedaádá' aa sihhiit bihhaá gawa awa yaae, kudá' tlabaá neewór kitaáni gaa dahaas, dabaawós tsaraawo giri gáwtí tleés, nguri axaás i lo'ór /aay ar umuú Munguúdá' hotatiím ay kureeraá kureér, ‹Baala i xeér ar afiqoomadaá tám nee tlaqi qoomár slahh'amuú múk hhohhó' bira faák, muruuwí sleémeero daqaní i boo/.›

⁸ «Aga mak tawo axaás, ala gár naa tsaáhh i káhh, ngway male yaahaás, ‹Aakooeé', alhhe'eesoó muruuwí sleémeero a adoomá?›

⁹ «Iri mu/aywaáts, ‹Daniéli, hám daxta tláw, asma axweesantí a naaqo nee slám kaa tseék kay dugunó i qaás ay qoomár alhhe'eesaay.

¹⁰ Múk yaariír slasla/aruín ku hingees, ki hhohhoees nee kin hamaatl. Ala múk tlákw tan kumiit tlakweema tlehhtuuwo. Tam heé wák i kaahh dír múk tlakwe oo gaarí ga tsaahh. Ala múk sagalooár koóm an múk adoorí ga tsaáhh.

¹¹ «Iimidár qoomár ilahhooár da/a/aangw kawa hingeés, tidár umuú daqi, iimír qoomár gadaádá' ta waki kawa sihhtís, a afiqoomár deelo kumuú wák nee tsiire tsár nee mibeeraá gwaleél.

¹² Múk amohhoó' a kudá' aa qiitl ay deelór kumuú wák nee tsiire tám, nee mibeeri tám nee kooán i waarahh.

¹³ «Ala kuúng, aá Danieli, tláw, hoót ay dír tay gwa', ta hungu/ús baraá /aanta, nee qoomaadá' birna xeér, tu waslee/atis, nee turi aalirók i haniis.»