DANIELI 11 - Biblía Axweesantá Hhohho' ar Mungú 2004

¹ «Kurkú geera oo waawutmo Dario, heé Medi iwa waawuti'ín, ala bartaeene aníng Dario una alee/iís iwa gawduy, nguri /uurií qaás.

² Hám daxta looeemaá kangwdá' ngi dirógí i oó'.» «Ga/aaweek, waawituú hatlá' tám yaamaá Persia gi sawaawuti'ín. Aluuine waawutmoó tsiyáhh oo daqaari'iimaro gi baá/ yaamaá Persia gi sawaawuti'ín. Qoomár /uuru burngwa sláy ar daqari'iimarós i haraatláy amór waawutmoó Griki.

Waawituú bihhaá /iya nee Ugriki

³ Naagáy waawutmoó hatlá' /uuruú koóm pihhusmo, inós yaamaá yaariir gi sawaawuti'ín, nee adoodá' i slai gan tleehh.

⁴ Ala tam adoorihe, qoomár bira ló'wa iia tleerúy as aleesleemuuwós, waawuti'iimarós i hú' iri qasít badu tsiyáhh awa yaamu. Baraá na/iiwose oo waawuti'iím i kaahh, tam baraá yaamuudá' inós aa sawaawuti'ini heé waawuti'iím i kaahh, asma waawuti'iima ka hayoh nee múk hatlá'.

⁵ «Waawutmoó bihhaá basa /uuru gu sláy, ala geeraharusmoó wák oo slaqwaruuseerós /uuru gu ak sláy ta inose. Nee waawuti'iimarós iri ló'wa wa tláhh.

⁶ Alaá kureeraá niina birna waarahhiyé', waawutmoó basa al'axweesantá mulqi'iima ga tleehh nee waawutmoó /iya, nee dasiirós gari haniis dír waawutmoó /iya. Ala mulqi'iimar'ín i tlikká gwa'araro. Asma dasiirós nee na/oó aa xwayluúr, nee hhawaatuwós nee sagadiyuseerós tidá' nee inós taa alkone' kin tsuu/.

⁷ Baraá xwaylár dasiirihe heé wák waawuti'iima ga sláy. Heewí in haraatláy baraá yaamaá /iya nee maray'ín kudá' koo/i gawden giri haradah giri baal slaqwararo.

⁸ Munguii'ín kudaá hatlá' giri gagaar ay Misri, nee kudá' taa weeqatisi nee xoosladá' taa tleéhh ar peésa nee ar sahaábuwo. Kureeraá hhawa'aakahe waawutmooduú basa i haratlayká amór waawutmoó /iya.

⁹ Aluuwo waawutmoó /iya i haraatláy amór waawutmoó basa, ala inós i alií kii/ amór yaamuuwós.

¹⁰ «Daaqoó waawutmoó /iya slaqwaruusér yaariir ngi burumburiyá' nee slaqwararo tari amoohhe'eesiyá'. Slaqwaruuseedá' iri geerií kumít adór alwuór ma'aay nee tari slaaqw ay dír koo/idá' gawit ar wakuuser'ín.

¹¹ Aluuwo waawutmoó basa i haraatláy ar buhhta nee slaqwaruusér yaariire ay amór waawutmoó /iya, iri baalín.

¹² Inós iri dara/uut as baalidá' aa sláy nee slaqwaruusedá' kumér yaariir ar /iya ngiwa tsuú/, ala baali sleemuuwo i baloó ki/iiká.

¹³ «Naagáy waawutmoó /iya slaqwaruusér yaariir ar tidár geera ga baa/ gari amohhe'ees. Alaá kureeraá niina birna waaraahhiyé', nin hardah nee slaqwaruusér yaariir ar taa qaroó amohhe'eés ar xoslaá yaariír koom awa slaqwara.

¹⁴ Aluuwo múk yaariír waawutmoó múk basa gu sii'. Muu bahh'alé oo xaraásl baraá xoorooroge ngu si'iyá' as iigu'utu iwa boo/i, ala inooín gár i buiya' i káhh.

¹⁵ Naagáy waawutmoó múk /iya gixsadaá koo/i gawden gin harweer giri hayoh. Slaqwaruusér waawutmoó basa mukdá' gu sangw daandaaká tam kudá' taa tsawaár, asma inooín /uuru ku slayká.

¹⁶ Waawutmooduú /iya i haraatláy, adór inós i slai gan tleehh, heé slaqwarár nee inós ga qiítl i kaahh. Iri sihhiit baraá yaamaá xirfuú koomá', giri sawaawuti'ín.

¹⁷ «Waawutmooduú /iya oo haratleemu gwaa ístí tsaat ni hardah nee slaqwaruuseerós sleémeero, inós al'axweesani ga tleehh nee ga boo/ees. Dasiirós gari haniis as kawa duuxi as waawuti'iimár wakusmoowós ngiwa hhaamisi, ala adoorós tidá' i slai i ya/andaaká nee gár nguwa bu' i káhh.

¹⁸ Aluuwo iri warqáy yaamaá yaariir awa afaá tlawi giri i haratláy nee giri baal. Ala slaqwarusmoó dahaaymo inós gu baal nee daara/aangós iri furguu/, waawutmoó /iya tsi'itós guri i kí/.

¹⁹ Inós iri kii/ baraá gixsadaá ayaawós, ala inós ti sadukuuts nee kuri baal baraá slaqwararo, gaarí an alhhe'eesaywós.

²⁰ «Inós kunguri aluhaar nee waawutmoó hatlá', inósuuwí heewós gu ya/aaw oo ohmér uhiím as daqaari'iimarós ngiwa doogi. Waawutmoowí ku gaas alaá deelór niinawe ala ku gaasiiká baraá slaqwara laqaá ar geehhooeema.»

Waawutmoó /iya oo tlakusmo

²¹ «Waawutmoó aluú wa hardáh ku ló'wa tlaákw tam waawuti'iimaro i harinká, inós nin hardah ar al/ayma nee waawuti'iima gari tláy.

²² Slaqwaruuse dinkwa nee kaahamuusér Doó Mungú gi slururu'uus.

²³ Inós al'axweesantá mulqi'iima ga tleehh nee xoordaá hatlá' ar loohír al/ayma. Inós /uuru gu ló'wa sláy, tam handá' inós xoorór niina ga sawaawuti'ina.

²⁴ Inós yaamuudá' diihhoo' gi qawti i haraatláy, nee muruú i tleehhi baraá taati'iiwose heé gwa tleehh i kaahh. Inós haasaáng gu qasiis dír múk inós gwa eehar. Inós ga ístí tsaát gixsadaá gawden ngiwa hhitin, ala a har qoomár niina.

²⁵ «Inós slaqwaruusér yaariir ga amohhe'ees ar pihh'uuma, iri haratláy amór waawutmoó basa. Ala waawutmoó basa iri fi'iit ar slaqwaruusér yaariir nee ar /uuruú koom ló'wa alé. Ala waawutmoó basa gár i bui i káhh asma inós ku gewaqaat.

²⁶ Mukdaádá' nee inós dinkwár wa /ayimá' an mukdá' gu gaás. Inós kun gaas, nee slaqwaruuseerós ar yaariir kari slururu'uus.

²⁷ Waawitaáwí tsár tari dinkwár i iwiit tawa /ayin, ala dir'ine umuú heewo muruú tlákw gun aldakuut daanduú heé hatlae nee tin kilooín al/aginá'. Ala gár tleehharo i aleeslaya' i káhh asma qooma aa xeeriiká.

²⁸ Waawutmoó /iya iri waátl baraá yaamuuwós ar daqaari'iimár yaariir, ala baraá muunaáwose gár i aldakuuti a adór alqadór hhohho' ngiri warqeesi. Adoodá' inós i slai gari tleehh iri kií/ baraá yaamuuwós i aleeró.

²⁹ «Qoomaadá' taa qaás bira bó/, inós yaamaá basa gi i haratláy wa'aá hatlae, ala waiikae ado gu alxir'imít.

³⁰ Meélír Kitimúr daahh gu i haraatleér, inós iri daanda feehhiit iri alií kii/ ar mune, alqadoodá' hhohho' gari hhitín. «Inós gurbu'úngw mukdá' aa dee/anuut dír alqadór hhohhoe guri eehár.

³¹ Slaqwaruuseerós muruú ta waki kun dahaas baraá Doó Mungú nee baraá gixsa. Ilahhooadár da/aa/aangw ar umuú baala kan ilaa/. Gadaádá' ta waki gan sihhtis baraá Doó Mungú.

³² Mukdaádá' alqadoodá' hhohho' gaa sii' gun afa /aasl. Ala mukdá' inkihhimú koóm dír Munguúine tan sihhtano hhe'ees, ado kay warqees.

³³ Múk sagalooár koóm múk yaariír ku intsaahhatis. Tam adoorihe inooín ki tsuu/ ar paánga nee ar asla deelór hhaawakahe, kiri haasaáng wa ar tláy nee daqaari'iimar'ín kari hayóh.

³⁴ Qoomár barki tsuu/ inooín alee/isoó niiná ngu slayá', múk yaariír i dír inooín i haragwaa' ar hhahhafiingw.

³⁵ Muu bahh'ale kuduú sagalooár koóm ku tsuu/ as inooín kiwa hhoohhooeesi, nee kiwa hamaatli ay qoomár alhhe'eesaay, asma alhhe'eesaay hamí aa xayká.

³⁶ «Waawutmoó /iya adoodá' i slai gan tleehh. Inós ti kilós xirfayees nee tiri gáwtí tleés iri ooi inós ku úr dír mungui sleémeero. Munguú mungui guri /oosliislín. Iri kumiit ay dír har afiqoomár buhhtaawós i fakiya'. Asma qoomaadá' taa qaás iwa bo/ i hariín.

³⁷ Waawutmoowí munguaá baabi'iiwós gi gaárí xuiiká, laqaá tam Munguúdá' /ameena i sla'. Inós munguiiká' sleémeero aqo gin waqaa', asma inós ngi xui ku ló'wa úr ta munguidae.

³⁸ Kitangw'ine inós Munguúduú gixsadu gi xuúm gun ilaiwawaa/ kudá' aáng tam baabi'iiwós na harahhifiká, guri ilahhooár sahaábu i haniis, nee peésa nee muruú tlaxo gawdén, nee qeemuú tlaxo gawide.

³⁹ Gixsaduwós gin xún ar alee/isoó munguú /eetusmo. Mukdaádá' sleémeero waawuti'iimarós ngi ilaiwawa/á', gin qeemií haniis, nee uraay, giri yaamií qasimiis.

⁴⁰ «Qoomár alhhe'eesaay birna xeér waawutmoó basa i haratláy amór waawutmoó /iya, ala waawutmoó /iya iri fi'iit ar /uuru adór bambaao ar gaardaá faras, nee mukdá' faras gwa i tsa/an, nee miriingér yaariir. Yaamaá yaariir giri haradah iri waaraahh adór alwuór ma'aay.

⁴¹ Tam yaamuudá' xirfuú koomá' gin haradah nee múk yaariír guri ló'wa tsuu/. Ala yaamaá Edomu nee awa Moabu nee yaamaá yaariir awa Amoni ni kotsqotiyá' gawaá dabaawós wa alé.

⁴² Qoomár yaamuuká' birnga i haraatláy, tam yaamaá Misri i /uy'aaká.

⁴³ Inós sahaábu yaariír gu aal, nee peésa nee tlaa/aá tlaxo uren awa yaamaá Misri. Múk Libya nee múk Kushi sleeme giri harahuuw.

⁴⁴ Ala inós kángw da/aá daáhh nee oo /iko gu dae tsaat. Inós muuna guri gaas, múk yaariír guri slururu'uus.

⁴⁵ Ak ale inós heemaduuwós awa uren giri sihhtis dír tla/ángw tlawi nee tloomadá' hhoohhoo' xirfuú koom. Ala daqaní adoorihe inós afiqoomarós ar alhhe'eesaay gaa áy, nee hee tumu wák oo gu alee/iís i kaahh.»