DANIELI 10 - Biblía Axweesantá Hhohho' ar Mungú 2004

Iigu'utuú Danieli aa dír afaá yaaér Tigrír wa ár

¹ Kurkú tám oo waawuti'iimár Koreshi, waawutmoó Persia, axweesantá Mungú kana geehhooeés dír Danieli, kudá' taa báy Belteshasa. Geehhooeemaaká' awa tsuwa ló', a daanduú slaqwarár ur. Inós geehhoeemaaká' giri tsaáhh nee iigu'utudá' guri xuú'.

² «Qoomaarihe anuú Danieli a tsuunqumiís har afiqoomár wiikidaá tame.

³ Muruú /aymár hhó' ugwa /ayiiká, fu'unaay laqaá difaái iga kwatitiiká nee sleeme di/i aga slikiiká har afiqoomár wiikidaá tame.

⁴ «Slahhángw geera bál tawa mibeeri tsár nee tsiyáhh, aníng aga sihhiít dír gangeefír yaaér Tigri.

⁵ Niwa qaytsiít, naxés heé tlabaá neewór kitaáni ngaa tsiit una ár, nee afeetloowose himuú sahaábuú Ufasír daáhh nguna tseek.

⁶ Slaqwtós in gwa/át adór sabarajadír hhoohhoo'. Gitse/aawós a adór mankari, nee ilaawós i gwa/aatiyá' adór tsángw asla. Ya'aawós nee dabaawose i mitsiihhiyá' adór muqslír sirdaa/aat ar taa ló'wa duúq. Afoorós a adór afór kwaara/ír múk yaariír.

⁷ «Anuú Danieli, kilooeé' iigu'utuwí una ár, mukdaádá' nee aníng dinkwa i diriiá' gár naa ariyé' i káhh, ala nina ló'wa da'ayutiyé', tari ta'aaín niri nahhaatiyé'.

⁸ Gawaá adoorihe tina kilooeé' geexáy a iigu'utuwí dae tlaáq ga/áw. /Uuruueé' iri faák, tam kalay'eé' iri warqáy niri tawo meét aga bus'umiít.

⁹ Afoorós ngiwa axaás niri gurúr yaamií qaát nay slar/aát gu'uteero.

¹⁰ Qoomaarihe dawa iri kwatiít, iri sihhtís nee diqoó ya'aeé' nee oo dabaawo guri kwa/ás.

¹¹ «Irí báy, ‹Daniéli, kuúngudá' ta sla'aa'an nee Mungú, sihhtanoro galala'aát axweesantí ni kah, iiárií qaaseek ló'wa alé, asma aníng taa amoorók i ya/aáw.› Qoomár iwa axweesantí babay aníng ana sihhiít a hara kitlkiítl.

¹² Naagáy inós iri báy, ‹Daniéli, ma da'ayumiitaar, Mungú firoorók gaa axaás iimír bál geera tiwa niinawés geeraawós i alé, as tsaahha kawa sleer. Aníng hamí nina hardáh as daanduú firoorók tidá'.

¹³ Heedaádá' úr oo waawuti'iimár múk Persia ina ilaá/ har afiqoomár deelo mibeeri tsár nee wake. Ala Mikaeli geeraharusmoó wák baraá geeraharuusér malaykeero, nina hardáh as iwa alee/iisi, gawaá adoorihe hám án ugwa didií geexáw nee geeraharusmoó múk Persia.

¹⁴ Aníng nina hardáh as uwa alee/iis gár mukók gu slaw de'emaá hi'iita'a kawa tsahh, asma iigu'utuú taa aán a daanduú muruú aluú wa hardáh.›

¹⁵ «Qoomár iwa axweesantadá' babay aníng ana yaamií qaytsiít tam /aymuú naa tlaáxw i kaahh.

¹⁶ Naagáy, slaqsayko wák una ár oo adór hee, slufoeé' gina kwatiít, aníng nay ilawaáts, heedaádá' aa sihhiit bihhaeé' nguri báw, ‹Aá Aáko, iigu'utuwí iga ló'wa slahh'eés tam án nay bus'umiít.

¹⁷ Anuú lawaalmo adór nee kuúngú aakooeé' tar axweesaan. As adoorí aga bus'umiít nee hiinsla tumu niiná oo aa meet i kaahh.›

¹⁸ «Slaqsayduú adór hee aníng iri malé kwatiít, /uuru nguri sláw.

¹⁹ Iri báy, ‹Aá heé ta ló'wa sla'aa'an nee Mungú, ma da'ayumiitaar, waydar iwiwiteek, migís nee muunahhe'eés!› Qoomár iwa amor'eénií axweesi, aníng /uuru nguri sláw, aníng nguri báw, ‹Aá Aáko, aníng iga /uurií qás, tidá' ta ooár wa sla' ooang.›

²⁰ «Inós aníng iri báy, ‹Xáy, gár án nisa amoorók i hardáh a xúa? Ala hamí daxta a kií/ niwa slaqwarár áw nee malaykamooduú múk Persia, nee qoomár aníng inós bura baál slaqwararo, malaykamooduú múk Yunani ni hardah.

²¹ Ala aníng kangwdá' taa gooín baraá kitaábuuduú looeema ngu dirógí xu'utís. Heé hatlá' i kaahh oo aníng i alee/iís slaqwararo aqo har Mikaeli, malaykamooduú xuumusmoó múk Israeli.› »