DANIELI 1 - Biblía Axweesantá Hhohho' ar Mungú 2004

Danieli nee mulqeerós ta dír doó waawutmo

¹ Kurkú tam iimír Yehoyakimu waawutmoó Yuda waawuti'iima ngiwa iimu/ún, Nebukadnesa waawutmoó Babuloni, gixsár Yerusalemu, gari haraweél.

² Aako Mungú Yehoyakimu waawutmoó Yuda guna máy kuwa oohi nee waawutmoó Babuloni, nee xooslaá Doó Mungú giri bahh ar tláy ay baraá yaamaá Shinari, ay baraá doó munguúwós. Xosluudá' gari baáts baraá doó munguúwós.

³ Waawutmo Nebukadnesa Ashpenasiduú sagesihhtusmoó múk taa karmuumúy guri i axweés, as baraá tla/ángw múk Israeliwo múk maraá waawitá daáhh nee oo maraá ta ilaiwawa/i ngiwa tsawaari nee ngiwa huwi amoorós.

⁴ Daaqoó xaslxaansli wásl, oo hhohhó', oo sageeloén, awa xu'utír koomá', múk isláhh intsaahhasaro, kudá' gadiyér baraá doó waawutmo ngi aleeslawá', nee ngiwa intsaahhatisi gooír múk Kaldayoro nee tsifrir'ine.

⁵ Waawutmo hara'aya gari oó' ar daaqaydá' kuwa /aymisi ar muruú /aymaadá' hhó' inós i /aa/ayi nee ar difaáidá' inós i wahaahan. Hara'aya gari oó' daaqaywí kuwa intsaahhatisi kureeraá tame, aluuwo kuwa huwi dír geeraá waawutmo.

⁶ Baraá daaqaywihe baraakarka a ín Danieli nee Hanania nee Mishaeli nee Asariya awa tlahhoó Yuda.

⁷ Sagesihhtusmoduú múk taa karmumúy daaqaydá' guri umér hatlá' i tsaát, Danieli guri báy Belteshasa, Hanania guri báy Shadraki, Mishaeli guri báy Meshaki, Asariya guri báy Abednego.

⁸ Ala Danieli ina tsabin baraá muunaáwós i ale muruú /aymadár waawutmo nguwa kwatitiiká, nee difaáirós tidá' i wahaahana, as dabaá tlakw mingiwa sláy. Iri tláy dír sagesihhtusmoduú múk taa karmuumúy, guri firín nguwa may as meetaawós mingiwa gaás.

⁹ Naagáy ala Mungú Danieli guri tsuúq, sagesihhtusmoodá' úr oo múk taa karmuumúy iri ya/án.

¹⁰ Sagesihhtusmoodá' úr Danieli guri báy, «Án aakooeé' oo waawutmo u da'ayumiít, inós muruú /aymarhúng nguna oó' nee muruú wahangwhunge. Gitsee/erhúng biringa ár aa hhitrút ta gitsee/ér masoombár qartuhunge, baré adoosinge slafingw'eé' u baraá tsaxwií dahasá'.»

¹¹ Danieli sagesihhtusmooduú muruú /ayma, kudá' taa qaás nee sagesihhtusmoó múk taa karmumúy, as ín Danieli nee Hanania nee Mishaeli nee Asariya ngiwa ga/ay, guri báy,

¹² «Xaa na'ás atén ti iiat baraá deelo mibaango. Muruú /aymarén masók a naanuú loo/o nee ma'aá wahaangw.

¹³ Daqaní gitsee/eerén ka xuuxú' nee ka alqoomés nee gitsee/ér masoombadá' muruú /aymadár waawutmo gu /aa/aay. Adór ta ge/eer tleehhang dír atén awa sagadiyuuseerók.»

¹⁴ Heedaádá' giri aleeya/án baraá kaangwihe, giri iiár baraá deelo mibaango.

¹⁵ Alhhe'eesoó deeloodá' mibaangw iwa fák naxés gitsee/er'ín ina ak hhohhou'uúr nee slaqooín nina ak wahhaditiyé' ta masoombadár hatlá' ar muruú /aymár waawutmo gu /aa/aya.

¹⁶ Naagáy sagesihhtusmooduú muruú /ayma, muruú /aymaadá' waawutmo aa oó' nee muruuduú wahaango guri hingeés, giri naanuú loo/órí hanmiís.

¹⁷ Mungú daaqaywí tsiyáhh guri fuqurángw i haniís nee xu'utír muruú yaariír nee sagalooa. Ala Danieli guri aleesleemuú í haniís oo igu'utu nguwa araa'ari nee tlataawo.

¹⁸ Deeloodá' masoombadá' kawa tit'isi iwa xeér, sagesihhtusmoduú múk taa karmuumúy giri huúw dír geeraá waawutmo Nebukadnesa adór waawutmo ngira oó'.

¹⁹ Tari axweés nee waawutmo, baraá masoombarí sleémeero oo adór Danieli nee Hanania nee Mishaeli nee Asariya i kaahh, as adoorí kiri tsawaár iwa gadiyuusiya' baraá doó waawutmoó wa alé.

²⁰ Nee baraá umuúqo gaaro ar waawutmo ngiwa yaahamiisi ar sagalooa nee xu'utiro, inooín giri tsaáhh adór tara harwaaraáhh sagaáwa mibángw wa ale ta qwaslaareerós tidá' sleémeero nee da/aluuseero, kudá' sleémeero awa baraá waawuti'iimarós.

²¹ Aluudae Danieli ina hoót ay kurkú geera oo waawutmo Koreshi.