DAHARUSMO 9 - Biblía Axweesantá Hhohho' ar Mungú 2004

¹ Tí sleémeero aníng ana aldakuút ngay tsaáhh, tlehhma'aá múk sageeloén nee kudá' hota ganaá' Mungú gin geeraharahaar. Tlehhma'aá sla'aari laqaá awa aahhi hee gi xuiiká. Umuú gaaro dir'ine a tawór huwisha.

² Mura' sleémeero i adór wakár tleehharumiit dír muu sleémeero. Gadaádá' tleehharuut dír heé hota ganaa'a aqo tidá' tleehharuut dír heé tlaakwe, dír heé hhoó' nee dír heé hhooeekahe, dír heé daba' hhohhó' nee dír heé daba' tlakwe, dír heé ilahhooár muruú ta tsu/i ga hanmiisa, nee dír heé ilahhooár muruú ta tsu/i ga hanmisaakahe. Adór heé hhoó' i dirii'i an adór heé tlaákw i dirii'i sleeme, dimbé i káhh dír heé lo'ór /aáy nee oo ga /ayakahe.

³ Gaarí ka ló'wa tlaakw baraá mura' sleémeero oo ti'imiita baraakaá yaamuwo, tí sleémeero alhhe'eesaay tawa wak, slám malé ale, hee baraá hotaawose aa haáts tlakweema nee slarhhamko, aluuwo iri gwaa'.

⁴ Ala harahhifo i deer dír heé nee múk slaáf alhoota'a, asma seeoó slaáf a tsiní ta dirángw aa gwaai.

⁵ Múk slaáf gaqo xuu' adór inooín tar qaátl, ala múk aa qaatl gár ta xui i káhh tam ar niiná, nee qeemuú i slayá' i kaahh, inooín kaa gunqareés baraá inslawoó muko.

⁶ Sla'aarir'ín nee aahhir'ine nee ilatleeri'ine naa qwaariyé' dinkwa nee inooine, inooín gár iwa dinku'uusiya' i káhh baraakaá yaamuwo.

⁷ Tláw, /ayiím ar qwala/, wahaám ar muunuú qwala/, asma Mungú gadiyeérók gaa qaroó ya/án.

⁸ Tlabaawók umuú deélooro masók ki /awak, sagók di/tá slikiingw mingiwa dakuús.

⁹ Slafiingók saqwalaala/eek nee hareerók tidá' taa slá', deelór hotaawók kukaá taworo, kuká' Mungú naa haniís baraakaá yaamuwo. Asma tí an gár tinda kuúngí haniís baraá slafiingoge nee baraá gadiyeeduwoge barakaá yaamuwo.

¹⁰ Gár taa haraasliqít dabaawoge tleehheek ar /uuruwók sleémeero, asma bara gwá', baraá gi'iiwo gadiyeé i káhh, laqaá inslawaay, laqaá xu'uti laqaá sagalooa.

¹¹ Aníng ana malé ár barakaá yaamuwo, múk arba/ati ga slasláw baraá ti'iingo, a kudá' gu baalaaká. Baraá slaqwaraaro múk balaaliím a kudá' /uuruú koomaaká. Múk muruú /aymár koóm a kudá' sagaloeneeká, laqaá daqaare a múk fuqureraá koomaaká, laqaá daharusmo a geeraharusmowooká. Ala umuú heewo gitsee/a gi kón nee qoomaaro.

¹² Heé baalaarós ga xuú' i kaahh, aqo adór siyó kur ohaahin gitsa/aá tlaakwe nee baraatsufaay, nee adór tsir/i kar ohaahin nee naqfí, an adór muu kur haraxopiiti ila nee tí, nee qoomár tlaakw.

Inslawoó sagalooa nee oo daktu'uuma

¹³ Aníng sleeme slaqsoó sagalooa ugwa ár baraakaá yaamuwo, aníng slaqsaywí nguri ár dir'eene tawa gár afhhamít.

¹⁴ Gixsarka niina i deer ar múk niiná gu koom. Waawutmooko /uuruú koóm gixsadá' gari harweér ar slaqwaruuseerós adór kar haradahi ngari tleehhiyé'.

¹⁵ Ala heeko wák oo narkutmo oo sagaloó' baraá gixsadae i deer. Inós gixsadá' gari /iís ar sagalooarós, ala tam adoorí ngaa tleehhi, looaytleérós heé narkutmodá' gu inslasláw i kaahh.

¹⁶ Ala aníng an kah, sagalooa a tsiní ta /uuruuwo tam sagalooár narkutmo i waaqa'atita, laqaá tam axweesantós heé ga axamiís i kahhi.

¹⁷ Axweesantá heé sagaloó' ar taa tseegisár ar oó' ka axaas, ta tseeór waawutmo kawa dír dinku'uumár daktanár wá axamisa'.

¹⁸ Sagalooa xooslár slaqwara ga bá/, ala heé tlaákw oo wák hhoeemaá yaariir gin hhitín.