DAHARUSMO 8 - Biblía Axweesantá Hhohho' ar Mungú 2004

¹ Heé adór heé sagaloó' a heemá? Xáy, heé umuú gaaro adór i diri' ga xuú' a heemá? Sagalooa hee gu qwal/ás, nee gitsee/aá heé gurhaamuút giri warqés.

Waawutmo kuwa iialoeemisi

² Hara'ayár waawutmo iiloeseek, asma al'axweesantadá' lo'o kawa húp ar umuú Mungú.

³ Dír geeraawose tleemuuwo ma gaanslutaar, laqaá gár i slaiiká ma alkoomaar tlehhtuwo, asma waawutmo gár i tleehhi an tidá' i slai.

⁴ /Aymuú waawutmo i /uuruú kón, heé inós gu qiítl nguwa bay, «Kuúng gár ta tlehhit a milá?»

⁵ Heé hara'aya ga iialooemiís nee gár tlaakw ti doogiiaaká, nee heé sagaloó' qooma ga xuu' nee kwasleemár ganaa'.

⁶ Umuú gaaro i qoomaarós koón nee adoorós, tam hee muruú gawdén gwaa al'iilouyi.

⁷ Asma hee gár aluúwaá hi'iit ga xuiiká, xáy, heé kángw aluúwaá hi'iít dirósí xu'utisaro gu aleesláw a heemá?

⁸ Heé gwa'ara ila/aro ga aleesláw i kaahh, laqaá heé baalár gwa'ara pa/asaro ga aleesláw i kaahh. Qoomár slaqwaraaro heé kotsqoót i kaahh, nee heé tlaákw tlakweema ngu ba/amisiaaká.

Múk tlákw nee múk hota ganaá'

⁹ Baraá inslaway'eene muruú baraá yaamuwo ta tlehhiiti una aldaákw. Qooma i deer ar hee iwa aleesleemuú kon daanduú heewo as nguwa baramaanuusi nee nguwa slahh'eemisi.

¹⁰ Aníng múk tlákw una ár kuwa foliiti. Inooín a múk aa intsahhan amór doó Mungú kakango, nee kiri baraá gixsár wa xirfayeemiis, didá' tlakweema ngiwa tlehhahhitiyé'. Tí sleeme a tawór huwisha.

¹¹ Gár muu is kumamiti tlakweema tlehhtuwo, asma tlakweema ki gaanslár sakwasleemutiiká.

¹² Tlakuuse tlakweema gin tlehhahhít ay sagaá wa tsiiru, tam adoorihe i qatliaaká. Ala aníng a xuú' mukdaádá' Mungú ilaiwawaá/ a múk amohhoó', asma inooín Mungú ngu da'ayumitiyá'.

¹³ Ala amohhooa i káhh dír heé tlaakwe, slafiingós in adór mahhtír wá waraahh i tleereesiiká, asma inós dír geeraá Munguhe ilaiwa/ame ga konká.

¹⁴ Garka wák baraá daanduú yaamuwo aga ár ar tawór huwisha, sakwasleemár múk tlákw wá hariim múk hota ganaá' gun sleér, nee qeemuú múk hota ganaá' wa hariím múk tlákw gun sláy. Án a kah tí sleeme a tawór huwisha.

¹⁵ Aníng qwala/ una xirfayeés, asma hee gár gu qwal/aas i káhh baraá daanduú yaamuwo, aqo har /ayma nee wahaangw nee qaseengw. Tí kilós an gár hee i aleeslay tleehhamooro baraá gadiyeeduwose baraá slafingwí Mungú aa dirósí haniisi baraakaá yaamuwo.

¹⁶ Aníng tí ana aldakuút ar sagalooar'eé' nee ngay tsaáhh gadiyér tlehharumiit baraakaá yaamuwo. Naxés heeko i deer oo gu'ute ga ilií qamaamimaaká xweera nee tlaatla/ango.

¹⁷ Aluuwo gadiyér Mungú aa tleéhh ngay ár, tidá' hee arto i aleeslayká baraakaá yaamuwo. Asma hee leelehhtuuwo tim naagisi inós arto ga aleeslayká. Tam heé ti sagalooarós ar xirfayeemiís ga aleeslayká xu'utiro sleeme.