DAHARUSMO 7 - Biblía Axweesantá Hhohho' ar Mungú 2004

Intsaahhatisár daanduú slafiingw

¹ Tlehhma'aá hho' a tsiní ta di/tá mooyángw tsuú' kooma, nee baalaadá' tawa gwa' a tsiní ta tidá' tuwa laqwaali.

² Tsiní heé aa qaytsuú ay amór doó hee iwa gwaá', ta tawa daqeera amór doó deelór úr kawa qaás. Asma gwa'ara an alhhe'eesaay oo muu sleémeero, i ganá' múk slaáf tí binga insláy baraá muner'ine.

³ Gurhaami a tsiní ta qaseengo, asma gitsee/a bir gurhaamutiyá', muuná kun amohhe'eemiis as iwa qwalaala/i.

⁴ Muunuú heé sagaloó' doó hee iwa kahhuút gun sa slahhaa', ala muunuú heé daktani doó qwal/uú koóm gun slaa'.

⁵ Tsiní naanaqtá múk sageeloén bar iiárií qamiín, ta daa'ángw daktana kuwa iiárií qamiinda.

⁶ Adór laqaymo ir baraá asltá wá tsuufeelin an adór qaséngw daktani i dirii'i, tí sleeme a tawór huwisha.

⁷ Heé sagaloó' hee burngwa /aytín, taa kilós daktu'úy, slukma /ayma i sagalooár hingeemís.

⁸ Tsiní alhhe'eesoó gaa ta iimu/uungose. Tsiní heé qitluú xuú' ta heé daara/aama.

⁹ Ma gaanslár buhhaar baraawoge, asma buhhta i baraá munér daktana.

¹⁰ Ma kaahaar, waáy bál geera gár tas tsiní ta laarihe. Asma yaahasaarí ar heé sagalooeeká.

¹¹ Sagalooa ka ló'wa afhhamít adór aali, i slahhá' dír múk slafa.

¹² Heé sagaloó' sagalooarós gu xuún. Nee gár xu'uti kas hhoó' a tí, sagalooa slafíngw hee nguwa xuun.

¹³ Gadiyér Mungú aldakuteek, asma ar inós aa qwambatís heé gan'asaro ga aleesláw a heemá?

¹⁴ Baalár hhoo' bara sleér ta qwalá/, nee amotlakwe bara sleér aldakuuteek. Mungú qwala/ nee amotlakwe tsaraawo gina tleéhh, as hee gár aluúwaá hi'iit mingiwa xuú'.

¹⁵ Muruú yaariír ugwa ár baraá hotaeé' kuká' liitlakwe, heé hota ganaá i deer oo aa gwaa' tam inós i ganaai, heé tlaákw i deer oo hotaatiím tam inós ku tlaakwe.

¹⁶ Gan'amu mu tlehhaar kway harwarahhás, laqaá sagalooaro ma harwarahhaar, gár tis kilók hhaamis a milá?

¹⁷ Ma ló'wa tlakuwaar, laqaá ma ló'wa daktu'uutaar. Ahaá waáy gár slafiingók kus hartsat a milá?

¹⁸ Muruuwí tsaraawo ooheek nee mu baloó geexawaar. Asma heé Mungú gu ilaiwawaá/ ku adoorír gawdees.

¹⁹ Sagalooa i /uuruú hanmís dír heé sagalooe, ta waawituú mibaangw oo gixsár sawaawuti'ii'ima.

²⁰ Heé gan'amuú koóm tumu wák i kaahh baraá yaamuwo, oo hhooeema gi tlehhaahhiít tam tlakweema gari tleehhiiká.

²¹ Axweesanaay sleémeero oo muu i kaahi mu ya/aa/amaar, aluuwo adór sagadiyusmoó do'ók ura /ooslín a axás.

²² Kuúng sleeme baraá inslawaywoge a xú' adór kuúngú kilá' múk hatlá' kura /ooslaasliín.

²³ Aníng muruuwí sleémeero una alqaytsiít baraá sagalooar'eene, nay oó', «Aníng sagalooa a mak slaá'.» Ala sagalooa aa sawuúr dir'eene.

²⁴ Xáy, hee adór slafiingw kuwa hariím ngir tsaahhi a adoomá? Adoorí tsaahharo ka ló'wá gawit.

²⁵ Aníng baraá inslaway'eene mura' nguri xu'utír wa slaá', nee nguri aldaákw, sagalooa ngiri leeleéhh nee gídaabár umuúqo gaaro. Ngari tsaáhh adór tlakweema tar daktu'uuma, nee daktu'uuma tar slarhhama.

²⁶ Gár wák ar slahh'eemiis gwa'ara ba/a ana tsaáhh, a /ameenír ilaá muu gi uuruxuum. Inós a adór tsaxweeli nee baraatsufaay, dabaawós a adór minyoroóro. Heé Mungú gu sla'atimís /ameenirí arba/to ga aleesláy, ala heé tlakusmo /ameenirí gun naga'ás.

²⁷ Qaytsiít, anuú daharusmo muruuwí una niinawemamiís tsatsahhango, as ngiwa ar áx haragaasa ga ya/ána.

²⁸ Aníng daqtá yaariire ana slaá' gaarí wák ngiwa tsaahh ala aga aleeslawiiká. Baraá tla/ángw hhawataá kumuú wake, hhawaatuú wák oo ilaiwa/amér wa hariím ugwa sláw, baraá /ameenár faarór adór tihe /ameenír naa ár i káhh.

²⁹ Qaytsiít, tí kilós aga tsaáhh, Mungú muu nguwa tleéhh ku hhó', ala inooín tiri kilooín slasla/areesiyé'.