DAHARUSMO 6 - Biblía Axweesantá Hhohho' ar Mungú 2004

¹ Aníng tlakweemakariya' iga ár baraá daanduú yaamuwo, nee muu ngwa al'iiloouyé'.

² Mungú bar hee ngwaa daqaari'iimár i haniís nee ilaiwa/ame dír geeraá muko, nee gár kuwa /aár i káhh baraá hotaawose ar i slai, ala Mungú gu aleesleemuú i hanisiiká daqaari'iimadá' ngiwa /ayi, aqo heé xuaawásl gan /aay. Gaarí a tawór huwisha, nee a gár ló'wa slahh'eemiis.

³ Barnaxes hee na/aá tsiiru gaa laqwaál, nee iri hoót kureeraá yaariire, iri hoót deelór yaariire, ala inós amohhooár hotaangw gaa slayká, nee iwa gwaá' kwaa fooliiká, aníng a kah, gurkwahhama a tsiní ta heewihe.

⁴ Asma na/oó aa baraá gurií gwaa', tam kwa laqwaali gaarós i káhh, inós aqo kun kwaahh, kuri gunqarees.

⁵ Slám malé ale, na/oó adoorí gwa/aateemaá looa gaa ariiká, laqaá gár aa tsaáhh i káhh. Tam inós hungu/uma gi sláy ta heedaádá' taa fooliikahe.

⁶ Na/aywí a tsiní ta heedaádá' amohhooár koomakahe, tam aa hooti kureeri kume tsare. Xáy, inooín tsaraawo amór ta kay a wakekáhe?

⁷ Hee in gadiyuus as muruú /ayma nguwa slay, ala hee ilatleeriro i baloó hhe'eesiiká.

⁸ Xáy sagaloousmo a tsiníhe ta daktanto? Nee heé liitlakusmo gár i slay a milá? Tam adór hotaangw ngi xui.

⁹ Gár hhoo' alók an bu'út ar muruú ta koon ta tawa daawimita as ilatleerír muruú hatlá', gaarí a tawór huwisha, nee a adór heé fur'a gaa alta'aain.

¹⁰ Umuúqo gár tleehharuuta kana iimír aáng wa qoomeés, nee adór hee i dirii'i i xu'utít, nee adór inós tir tlaampa'aasiaaká nee kudá' úr dirose.

¹¹ Axweesanoó yaariír a tawór huwisha, gár hee nguwa bui a milá?

¹² Asma heé ga xuú' a heemá gár ganaa' dír heewo baraá slafiingós kwí ququmaare, oo gaa wásl, kwí waaraáhh adór mahhtí wa ale? Heé baraá yaamuwo ga xuú' a heemá gár hee gu slaw alaá gwa'araro.