DAHARUSMO 5 - Biblía Axweesantá Hhohho' ar Mungú 2004

Al'axweesani bar ó' ma hara/akutaar

¹ Bar amór doó Mungú keér daanqamiís. Asma a gár hhoo' tawa tseewuur nee iia kay qás, ta ilahhooár muruú ta tsu/i adór tidár múk daktana kawa hanisa. Inooín gár hhoo' nee ar tlaakwe ngi partlitiaaká.

² Afkók harmagahheek axweesanoó daktu'uumaro, tam ma gaanslutaar gaa ooaro dír geeraá Munguhe. Asma inós i gawaá doori nee kuúng a baraá yaamu, ala axweesantók masók kan ureeká dír Munguúwoge.

³ Hee in tlatiitín asma gadiyér yaariir tidá' aa tlehhiít, heé daktani axweesanoó yaariír gun tawoó booroo'.

⁴ Kuúng al'axweesani bara ó' dír Mungú i alé, ma tligaar boo/eesaro, asma inós ku qwal/atimisiiká nee múk daktana. Gimáy al'axweesantadá' boo/eeseek.

⁵ A tsiní al'axweesani baraá qaská ta al'axweesantá taa qás kawa meer boo/esaro.

⁶ Afkók harmagahheek muwa dahaás baraá tlakweemáy ale, aluuwo malaykamo kuri beer, «Gám afa iga baá/.» Asma milá gár Mungú is buhhi as afkók, nee gadiyér dabaawók gari hhitín.

⁷ Tlata birna tlahhiyé', axweesanoó tawo a gar'ín, ala kuúng Mungú na ilaiwaa/eek.

Slafiingw a tawór huwisha

⁸ Ala ma waa/oo/amór wa araar baraakaá yaamuwo bara aán múk liitlakwén ku baramaanuus nee hariímar'ín kaa hayóh dir'ine. Umuú heé múk litlaakwén /aytiím, heé úr dír inose i deer, tam dír múk urene múk dir'ine uren i deer.

⁹ Gawaá tí sleémeerowo waawutmoó gadiyuús an kudá' muu gu ale/iís.

¹⁰ Heé peésár slaá' i baloó hhe'esiiká peesaaro. Laqaá heé daqaari'iimár yaariir ga slaá' tam ngi slaya i baloó hhe'eesiiká daqaari'iimaro, tí sleeme a tawór huwisha.

¹¹ Daqaari'iima barka ur, múk ta /aymis ku úr. Ala heé daqaari'iima loó' slaaslawár i slay a milá, aqo gan ilár ga/áyke kilós?

¹² Heé bu'utuú tlaatla/ángw wák gu'uteerós i tsú', guruuwós tim hatsiiká laqaá tim haáts. Ala daqaarmo tim aaxi gu'ute a ma/iís asma ku daawitimiis nee daqaari'iima.

¹³ Gár tlaakw baraá yaamuwo ar naa ár a tí, hee daqari'iima ga tleéhh ar ilakaahaara, alhhe'eesaywo guri baraá tsaxwáy dahás.

¹⁴ Gitsa/aá tlakwe daqaari'iimadá' bira hhiturút iri fák, gár aa dakós i met i káhh, slám inós a heé na/oó koóm.

¹⁵ Hee adoodá' kura laqwaál ir tlabaá konká aqo adoodá' ganar kii/, gár i huwi i káhh tam ar wák baraá muruudá' aa tleehhi.

¹⁶ Tí sleeme a gár ló'wa tlaakw baraá yaamuwo, adoodá' hee nira hardáh an adór ir tlay, inós ina dawimamiít as fur'a ngiwa gusiisin, hameerós gari tawó xiints.

¹⁷ Deelo sleémeero hotaawós an baraá giwti nee gurhaami, baraá wayaqaamu nee tiqtír slahh'emiis nee iwa buhhaabuhhi.

¹⁸ Naagáy tí an tidá' aníng naa tsaáhh, gár wák ar slahhaa' ar hho' dír heewo a /ayma, nee wahaangw, nee gadiyeérós tidá' aa tleéhh ar hame ngiwa duúx ngiwa saqwalaala/i baraakaá yaamuwo, harqoomaarír deelorí niina ar Mungú aa haniís dirós i aleeró. Asma gaarí an qeemuú Mungú ngway haniís.

¹⁹ Umuú hee kudá' Mungú aa daqaari'iimár i haniís nee pa/ángw ngiwa saqwalalaa/i, daqaari'iimarós tidá' a dabaawós ar tleéhh, sluufay ngu ooi as slaasláwarí, tí an qeemuú Mungú.

²⁰ Hee deelór hotaawós ga inslayká, asma Mungú gwa qwal/amaayér i haniís baraá muunaáwose.