DAHARUSMO 4 - Biblía Axweesantá Hhohho' ar Mungú 2004

¹ Aluuwo aníng ana qaytsiít, malguuse ngari ár baraá yaamuwo, naxés mukdá' ta malguús i /aa/amín, ala heé gi gurkwa/ás i kaahh. Asma malguuse i /uuruú koón bartaine, gaarí an gár mukdá' gurkwa/asa ngisa slayi'iiká.

² Aníng nari baraaeéní oó', «Múk amohhoó' a kudá' aa qaatl ta kwí slafa.»

³ Ala heé ak amohhoó' ta múk aa qaatli nee kudá' slafa a heedaádá' taa laqwaliiká, asma tlehhmi'iiká' tleehharumiitá' baraakaá yaamuwo gaa ariiká.

⁴ Aníng ana malé qaytsiít gadiyér muu i tlehhiiti ngari ár, nee umuú heé aa geerií kumiiti, muruuwí dír i dahhi a muu tiwa da/tá araa'ari. Tí sleeme a tawór huwisha, nee a adór heé fur'a gaa alta'aain.

⁵ Daktani dabaawós gin da/eewií ót alhhe'eesayo fu'unaá slaqwtós giri sakí/ /aymaro.

⁶ A tsiní gár niiná bar koón dinkwa nee wayda baraá muunahe ta mura' sleémeero kuwa koonda dinkwa nee diitsakwa, tí a adór heé fur'a gaa alta'aain.

⁷ Aníng nari malé qaytsiít baraakaá yaamuwo gár wák ana ár ar tawór huwisha.

⁸ Heeko wák oo múk koomaaká una ár, na/aay i kaahh, tam hhiya' i kaahh, tam adoorihe gadiyeé ga baloó maamayká daqaari'iima ga kón, ala ilaawós i hheeriimamitiya', slám inós i yaamií iwawiitiiká as tiwa yaahasi iwa ooi, «Heé nis gadiyuus a heemá oo tiwa muruú hhó' /itaa/iit?» Tí sleeme a tawór huwisha, a daawitamér gurhaamír koom.

⁹ Múk tsár a tsiní ta heé wake, asma baraá gadiyér'ine qeemuú hhoó' ngu slayá'.

¹⁰ Asma binda huiiyé', heé wák kuqá' gu tlees, ala tsaxwaawós kuduú wákleelí, asma bira huú' heé gu tleés i kaahh.

¹¹ Slamí múk tsár bira qaát dinkwár i ale axwnáy ku sláy. Ala heé wákleelí dír axwnáy nguwa kilós slay a diimá?

¹² Tam heé wák kuqá' ngur ba/i, ala múk tsár heé wák kun arbaa/ ar gaanslaay, hhutleemaá tám awa ta dinkwaárí hhuútl ki gawit.

¹³ A tsiní masoomoó narkutmo oo sagalooár koóm ta waawutmoó aako oo daktani oo gurbu'utá ya/a/amaaká.

¹⁴ Tam inós aáng kwa tseegi nee hamí a waawutmo, laqaá tam kwa baraá narkwí laqwali, ala hamí waawuti'iima gay sláy.

¹⁵ Muu sleémeero oo baraakaá yaamuú wa hoót una ár, inooín ta dinkwa nee masoomoowí aa sihhiit dír kitángw waawuti'iima.

¹⁶ Mukdá' sleémeero faaror'ín i káhh, inós sleémeero gina sawaawuti'ín. Tam adoorihe mukdá' taa aluú wa laqwaál ngu saqwalalaa/iaaká. Looeemá kilae tí sleeme a tawór huwisha, nee a adór heé fur'a gaa alta'aain.