DAHARUSMO 3 - Biblía Axweesantá Hhohho' ar Mungú 2004

Umuú gaaro i qoomaarós koón

¹ Umuú gaaro i qoomaarós koón, nee umuú qoomaaro i gaarós koón baraakaá yaamuwo.

² Garka a qoomár hee kuwa laqwaál, nee ar hee iwa gwaai, qoomár dahasiingw nee qoomár bu'uungw.

³ Qoomár tsu/uta nee qoomár hungu/uumis. Qoomár fe/it nee qoomár tlehhma.

⁴ Qoomár /aa/e nee qoomár qaseengw. Qoomár tsuunqumis nee qoomár neeto.

⁵ Qoomár tlaa/e tlaqut nee qoomár tlaa/e kiwa dinkwaárí burumburin. Qoomár ma'amis nee qoomár ma'amisuwooká.

⁶ Qoomár leelehhit nee qoomár qwaareemis. Qoomár amohhe'eemis, nee qoomár kwakwahh.

⁷ Qoomár fehhaamis nee qoomár hirit. Qoomár xasliita nee qoomár axweesani.

⁸ Qoomár sla'aari nee qoomár aahhi. Qoomár slaqwara nee qoomár wayda.

⁹ Xáy, heé gadiyuús slaasláwár i slay a milá baraá gadiyeérose?

¹⁰ Aníng gadiyér yaariir ar Mungú aa haniís dír muu ana ár, as kahhó' inooín niwa gadiyuusiya'.

¹¹ Mungú umuú gár hhoohhooe gana qoomaarósí tleéhh ar kawa hhoohhoó' iwa xeer, nee baraá muunuú heewo muruú iimu/uungw wasle nee oo alhhe'eesay wasle nguwa xu'utír wa slai gana qaás. Tam adoorihe kwa pa/ángwií haniisiiká muruú Mungú aa tlehhiít iimír iimu/ungo ay alhhe'eesaay nguwa tsaahhi.

¹² Aníng ngari tsaáhh gár hee gu gaa wa buu' ar qwala/ gu baa/ i káhh, nee tiwa qwal/atimis baraá hotaawós sleémeerowo.

¹³ Gaarí sleeme a qeemu dír heewo, tí umuú heewo iwa /ayin nee iwa wahan nee iwa qwalaala/i as gadiyeerós tidá' hhohho' aa tleéhh.

¹⁴ Aníng a xuú' adór gadiyér Mungú ir hhitirutká. Gár ta doogi i káhh, laqaá ar ta /aareesi i káhh sleeme. Asma inós adoorí gana tleéhh as kuwa ilaiwawa/i.

¹⁵ Muruudá' dáw an kudá' aa qaroó tleehharuut, nee kudá' sa tleehharuút, an kudá' aa qaroó tleehharuut. Mungú an kudá' muruudá' aa waaraahh gu malé tlehhiít.

Gan'amu wasle baraá yaamuwo

¹⁶ Dinkwa nee tihe aníng gár naa tsaáhh baraaká daanduú yaamuwo a tí, didá' sakwasleemár ganaa' iwa deér tlakweema i dayá' nee didá' hotaá ganaa'á' iwa dayá', tlakweema iqo dayá' sleeme.

¹⁷ Aníng nay baraá muunaáeénií oó', Mungú múk hota ganaá' nee múk tlakwe sleémeero gin sakwasleemuut, asma umuú qoomaaro Mungú gana qaás as gaarós nee as gadiyeérós.

¹⁸ Aníng nay baraá muunaáeénií oó', gawaá daanduú muko Mungú inooín gin iiaraa'ar as ngiwa tsaahhiya' adór inooíná kilá' tar makaay.

¹⁹ Muu nee makaay a wak, asma gadaádá' tlehharuut dír muko an tidá' tlehharuut dír makaywo sleeme. Muu in qaatl, makaay in qatliiyá' sleeme, sleémeero i hiinsliyá', hee makiito'o gár ngir ba/i i káhh, sleémeero a tawór huwisha.

²⁰ Inooín sleémeero amór ta kay a wak. Inooín sleémeero dír i dahhiya' a baraá hhape, nee inooín tan kii/ baraá hhape.

²¹ Xáy, heé ga xuú' a heemá qeeruú hee tam in tsa/án gáwtí alé, nee tam qeeruú makiito'o in /eét baráy alé.

²² Gawaá adoorihe aníng ngay tsaáhh gár ganaa' dír heewo ar tí ga baa/ i káhh, tí hee gadiyeérós ngiwa saqwalalaa/i, asma gaarí an hariímarós, asma gár hee gu slaw amór aluuwo heé ga xuú' i kaahh.