DAHARUSMO 2 - Biblía Axweesantá Hhohho' ar Mungú 2004

¹ Aníng ana baraeéní oó', «Lakiít, ti kilooeé' qwal/aás.» Ala ngay tsaáhh adoorí bara tleéhh a tawór huwisha sleeme.

² Aníng ana tsaáhh qaseengw a pungahhama, nee qwala/ gár kuwa slay a milá?

³ Aníng ana baraeé' oó', adór slaqwa ngir qwal/aas ar xufta, slám amooqaáqae inslaway'eé' ku geeraharahaar nee sagalooa, nee adór nee daktu'uuma tir koomaan ngiri aldaákw, as gár hhoo' ngiwa ar, ar muu i aleeslay tleehhamoro gawaá daanduú yaamuwo har afiqoomár slafingw'ín kwí niinawe.

⁴ Gadiyér ur ana tleéhh, maraá uren ina tleéhh, qamaá sabiíbu ina doósl.

⁵ Asalmo una doósl, xaa'aá mamaá dimbadiimbé ina dahaás.

⁶ Tlahhesaá ma'aay ina tleéhh as xaaiidá' naa dahaás ngiwa eemiis.

⁷ Aníng lawaalér hhawaate nee /ameenaaro ina tlaxuúm, bahh alé nina dír dooeé' wa laqwaliné'. Slamí daqaari'iimár hikwa nee bee/aango heé i baá/ i kaahh dír kudá' naa baraá yaamaá Yerusalemúr wa hooti'i.

⁸ Aníng peésa nee sahaábuú hhohhoe ina burumbuúr baraá daqaari'iimár waawituú hatlá' wa ale, nee baraá yaamuueé' kudá' naa sawaawuti'iím. Daauusér hhawaate nee ar /ameenaaro ana burumbuúr sleeme, nee /ameenár yaariir ar quturmo waslen, tidá' hhawaate i waatlakweemisiya'.

⁹ Eeít, aníng ti úr, xirfuuwo múk baraá Yerusalemu i dirií' una baá/ nee sagalooar'eé' iga wa /aruriiká.

¹⁰ Umuúqo gár ilaaeé' naa ilatleeruusiyé' aga mawiiká, muunaáeé' ugwa qwal/uú /itiiká, asma muunaáeé' gadiyeédá' naa tleéhh gana saqwalalaá/, nee tí sleémeero an qeemuú naa sláw as gadiyér'eé'.

¹¹ Aníng gadiyér'eé' sleémeero ar naa tleéhh ar dabaaeé' ana alqaytsiít, nee adoodá' hame ngira xiínts as gadiyeérí ngari tsaáhh adór muruuwí sleémeero tar tawór huwisha, nee a adór heé fur'a gaa alta'aain, nee slaasláwár dáw i káhh baraá yaamuwo.

¹² Aníng baraeene sagalooa nee pungahhama nee daktu'uuma ina aldaákw as ngiwa paraatl. Nari oó', Waawutmoó /abén gár i tleehhi a milá? Aqo har tidá' taa tleéhh nee waawitaádá' aa giirin.

¹³ Aníng ngari tsaáhh adór sagalooa kar afhhamít ta daktu'uumaro, adór gwa/aateema kir afhhamít ta giwtiiro.

¹⁴ Heé sagaloó' ilaá xumsi gi kón, ala heé daktani in baraá giwtír wá hi'iimiit. Tam adoorihe ngari tsaáhh adór alhhe'eesoó heé sagaloó' nee oo daktani tar wák.

¹⁵ Aníng nay baraeé' oó', «Gár heé daktani gu slaw aníng sleeme i sleér. Xáy sagalooár adór tí gár ngis koom a milá?» Aníng nay baraeéní oó', «Tí sleeme a tawór huwisha.»

¹⁶ Asma heé sagalooár koóm nee oo daktanto heé gi inslasláw i kaahh. Asma de'emaá hi'iitaa'a sleémeero kin gunqarees, adoodá' heé sagaloó' ir gwaai tam daktani sleeme.

¹⁷ Gawaá adoorihe aníng slafiingw nguri aáhh, asma umuú gaaro ar tleehharumiit baraá yaamuwo gurhaami ngi huwahúp, asma umuú gaaro a tawór huwisha, nee a adór heé fur'a gaa alta'aain.

¹⁸ Muruudá' sleémeero naa tleéhh baraá yaamuwo ngway aáhh, asma uqo geexáw dír heedaádá' aluueé' wa hardáh.

¹⁹ Xáy, heé ga xuú' adór heedaádá' tar heé sagaloó' laqaá daktani? Tam adoorihe muruudá' aníng naa tleéhh ar sagalooar'eé' baraá yaamuukae inós gun aal. Tí sleémeero a tawór huwisha.

²⁰ Ala aníng muruudá' sleémeero naa tlehhiít baraakaá yaamuwo nguwa aldaákw baraeene, nari mune sií'.

²¹ Asma qoomarkaaro heé gadiyeérós gaa tleehh ar sagalooa nee xu'uti, nee fuquraangw, aluuwo gari dír heé hatlá' i geexáy, as ngiwa saqwalaala/i gár aa hamér wa xiintsiiká. Tí sleeme a tawór huwisha nee a gár kángw kilá' wa tlaakw.

²² Xáy, hee slaasláwár i slay baraá gadiyeérós sleémeero a milá, nee baraá ilakaaharuuwose baraakaá yaamuwo?

²³ Asma slafiingós sleémeero gár iwa haáts a slahh'amaaye, nee gadiyeérós sleémeero a daawitame kilós, tam xweeraawo inslawaywós i hungu/uusiiká. Tí sleeme a tawór huwisha.

²⁴ Gár dír heewo hhoo' ar gu gaa wa buu' i káhh aqo har /ayma nee wahaangw nee gadiyeérós ngiwa saqwalalaa/i. Aníng aga tsaáhh tí sleeme amór i dahh a amór Mungú.

²⁵ Asma Mungú bir kaahh, heé /ayma ga asláw laqaá oo ti kilós qwal/atís a heemá?

²⁶ Mungú sagalooa, nee fuquraangw nee qwal/amaaye gan haniis dír heé inós gu sla'atimís, ala heé tlaákw guna gadiyér gawídií haniís ar bu'uungw nee buruumburiingw, nee tidá' taa sláy kari haniis dír heedá' Mungú gu sla'atimís. Tí sleeme a tawór huwisha, nee a adór heé fur'a gaa alta'aain.