DAHARUSMO 12 - Biblía Axweesantá Hhohho' ar Mungú 2004

¹ Baraá masoombi'iimaroge tlehharusmoowók inslaweek, dír qoomár tlaakw nira hardatká, laqaá kureeraá tawa o', «Aníng qwala/ u koomaaká baraá kureerikae.»

² Adoorí tleehheek qoomár tsee/amá ira giwiiká nee gwa/aateemawo nee slahhaango nee tsatse/uwo. Dír huunkoó tluwaay ira malé tleehharutiiká.

³ Dír dabaadá' slaqwtók ngi xuumá' nira daaraxati'iiká, nee dír ya'aawók kudá' hamí /uuruú koomá' nira slaaqati'iiká. Dír sihhnaawók kudá' xooslimá' nira faakisi'iiká, nee ilaawók xumsi ngira si'i'iiká.

⁴ Deelór afór baraá lohdaá uren kawa axamiská nee afór xoosliingw bira harsawés, nee hee bar afór tsir/i nga axaás iwa da'ayuuti, nee dasuú daá' afor'ín iwa alqwaares.

⁵ Deelór /aantani tsa/amtooro kawa da'ayut nee muruú dae tlaáq iwa baraá loohi. Deelór saga iwa adór pungaanír wa /awaakuy, nee tsaxwaay iwa huwa tleehhiti, nee ilatleeri sleémeero iwa fak. Asma hee in amór do'ós kuduú alhhe'eesay wásl i tláy, múk tsuunqumiís iri baraá loohír wá hi'iimiit.

⁶ Tleehharusmoowók inslaweek dír taamír slafiingók ira tsatitiiká, laqaá dír isaangaaír sahaábu ira gwa'aká, laqaá dír sirwi ira bihhaá hhalángwí gwa'aká, laqaá dír himuú ihheekamo ira baraá hhalángwí tsatitiiká.

⁷ Dír kuúng tara baraá hhapeérí ki/iká, nee dír qeeru ira ki/iiká amór Munguúdá' ngwa haniis.

⁸ Daharusmo i kaahi, «Tawór huwisha, tawór huwisha umuúqo gaaro a tawór huwisha!»

Axweesantá alhhe'eesaay

⁹ Daharusmoodá' dinkwa nee sagalooár i kona inós muu guna intsaahhatimís xu'utiro. Inós axweesantá sagalooa ar yaariir gana alqaytsimiít nee gari aldakuút, nee gari qoomeemeés ar magahhto.

¹⁰ Daharusmo /ayma'aá sla'atimiisá' gina leelehhahhiít nee axweesantá looeema gari gooín ar inkihhimu.

¹¹ Axweesantá sagaloo' a adór hhartá de'eemusmo, nee adór kik'ár taa yaamií slaáhh, an adór axweesanoó taa burumburaarín oo de'eemusmoó wák.

¹² Garmaaeé', hara'aya iiárií qaaseek, alhhe'eesoó kitaabi'i gooi i kaahh, nee soómár yaariir i slaqwtá hhaslít.

¹³ Alhhe'eesoó /aymi'i sleémeero awa taa axasi, gár ni oo' a tí, Mungú ilaiwaa/eek, nee hara'ayaarós na ooheek, asma an gár afhhamít dír heewo.

¹⁴ Asma Mungú tlehhmi'iirén sleémeero gin sakwasleemuut, tam kudá' taa naaqo tlehhiitaán, tam ki hhó' laqaá ki tlákw.