DAHARUSMO 11 - Biblía Axweesantá Hhohho' ar Mungú 2004

Adór heé sagaloó' i tleehhiiti

¹ Kuúng masók tu gurhhoó', asma alaá deelór niinawe tu buu'.

² Qasiseek múk faanqwí ale laqaá dakaát, asma baalár gár tlaakw ni barakaá yaamií hardat a xu'ká.

³ Huunkáy bira ilu'uu'úy, tluwaay i tluuw gawaá daanduú yaamu, xa'ano bira baskwí huú' laqaá bira /iíkwí huú', didaádá' aa i huú' an dír i qaati.

⁴ Heé fur'ár ga/áw i baloó dahasiiká. Heé faakamaá huunkoó daamaraám gár i fiiqi i káhh.

⁵ Adoodá' na/aay baraá guruú aayooro ir hinslasliti kar xu'uká, an adoodá' gadiyér Mungú kar aleesleeraaká tsaahharo, inósuudá' mura' sleémeero gu tlehhiít.

⁶ Matlaatleero dahaasingók dahaaseek, tam tsiindoowo mu mawaar. Asma dahaasíngw ti'iít u xu'uká tam oo matlaatle laqaá oo tsiindo, laqaá sleémeero ni ti'iit.

⁷ gwa/aateema i ló'wa tsuuiyá', slám tsee/amá i ilaá sla'atimis.

⁸ Hee kureeraá yaariir birnga hoót, ngi saqwalaa/i, ala masók in inslawín adór deelór slahh'amaaye kar úr. Muruú aluú wa hi'iít sleémeero a tawo.

Gurbu'uungw as masoomba

⁹ Kuúng masoómo, masoombi'iimarók sa qwalaala/eek, nee muunaáwók qwala/aseek baraá masoombaimaroge. Adór ta sla' baraá muunaáwoge eehareek, nee adór ilaawoge taqo ga/eera. Ala ka xú' baraá muruuwí sleémeerowo Mungú kuúng u huuw baraá sakwasleema.

¹⁰ Ma baraá muunaáwók i gurhamuutaar, ti ila/, nee slaqwtók ma slahh'eemisaar, asma masoombi'iima a tawo nee tla/aa tsaraaro.