DAHARUSMO 10 - Biblía Axweesantá Hhohho' ar Mungú 2004

¹ Ba'aruú aa qaatl di/tá mooyángw koom ga dixis, daktu'uumár niina sagalooa nee ilaiwa/ame gan hhitiín.

² Muunuú heé sagaloó' gun geerahaar baraá muruú ganaa', ala heé daktani ku qwaarees nee inslawoó muunaáwós.

³ Heé daktani bir hi'iimiit gár i xui i káhh, umuú heewo gun babay, «Aníng a daktani.»

⁴ Waawutmo bar kuúng ugwa i buúhh, didá' tay dir'a ma tlawaar, asma axweesantá fur'ár tsá' buhhtaá yaariir gi hingés.

⁵ Gár tlaakw ar naa ár i deer baraá daanduú yaamuwo, an dakuúsár waawutmo.

⁶ Daktana kan geeraharuusér wa qaas nee daqaare kan alií ki/is.

⁷ Aníng lawaale ana ár faras gwa i tsa/aán, nee geeraharuuse tawa adór lawaalér ya'ár hi'iimiit.

⁸ Bohoongw bura fól kuúnguú kilá' a baraadí /ét, nee heé koo/ír fe/iít ku kiihh nee dayshamo.

⁹ Heé tlaa/aá tu'uút ku slahh'ees nee tlaa/e, heé migíruú feehhamiís ku hariáy nee migír.

¹⁰ Ala muqsli bira mutshhút nee barka duqiiká, heé tlaáq aqo /uuru gun ar gadiyuus, ala bir sagalooár gadiyuus ado ga sláy.

¹¹ Daqsaní u gaa wa bu'uká, bar dayshamo ugwa hhe'eés kihhto.

¹² Axweesantá heé sagaloó' inósuú kilá' gun /ís, ala axweesantá daktani slafiingósuú kilá' gun qwaarés.

¹³ Heé daktani axweesantós gan iimu/ún ar xuaawasle, gari alhhe'ees ar slarhhamkú tlákw.

¹⁴ Daktani in tawo booró'. Tam hee gár aluúwaá tleehharuut ga xuiiká. Heé gu ádbáw kángw aluuwós wa tleehharuuta.

¹⁵ Daktani kan slaaqatis nee gadiyeérós, tam loohír ir amór dóií watl iri qwát.

¹⁶ Yaamaá ta sawaawuti'ii'in nee na/aay a tsaxwaaín, nee yaamuudá' geeraharuuser'ín muruú /aymár úr gwa matlaatlér qas.

¹⁷ Yaamuudá' taa sawaawuti'ii'in nee na/oó doó waawutmo a yaamaá amohhooá', nee geeraharuuser'ín muruú /aymár úr gun qamiín qoomár hariima, in /ayiná' as /uuru nguwa slaya' nee tawa oonimitiiká.

¹⁸ Doó heé tli/usmo in baanqún nee do'ós in tluwiit as saangareei.

¹⁹ Muruú /ayma kun qamín as qwala/ nee difaái muu gun qwal/atimís nee peésa muruuwí sleémeero ngun slasleér.

²⁰ Waawutmo mu /ooslimaar tam baraá inslawaywoge, tam daqaarmo mu /oosliimaar tam kilók baraá do'oge. Asma tliinta i axamís, nee kangwdá' guri ó'.