DAHARUSMO 1 - Biblía Axweesantá Hhohho' ar Mungú 2004

Slafiingw a tawór huwisha

¹ Kaangwí a axweesanoó daharusmo, garmoó Daudi, kuduú waawutmoó Yerusalemu.

² Daharusmo i kaahi, Tawór huwisha, tawór huwisha, umuúqo gaaro a tawór huwisha!

³ Xáy, hee slaasláwár i slay a milá, baraá gadiyeeduwós kudá' sleémeero i tlehhaahhiti baraá daanduú yaamuwo?

⁴ Qari i waráhh, tiqá' nari iitleér, ala yaamu i warqaqay'aaká.

⁵ Tsee/amá nin ti'iit in dah, slám i kwahhmisiiká iwa ki/i amoodá' niwa tláy.

⁶ Fur'a in baskwí fukuukú', nari malé /iíkwár harweeriín. Fur'a aqo in harweraariín nee aqo baraá loohirós tidá' ganár harweriiriín.

⁷ Yau sleémeero amór i wa/amiina' a baraá tlawi, ala tlawi i baloó hatsatsiindaaká ma'aywo, ma'aay nin ki/iyá' amoodá' yau niwa tlatlaya', amoodá' i wa/amiina' an amoodá' niwa tlatlaya'.

⁸ Umuú gaaro i slaaqatimís, slaaqamaayér hee ooaro i aslayká, ila xumsooro i hhe'eská, tam iia axamisuwo i hhe'eská.

⁹ Umuú gaaro ar aa tlehharut an tidá' hardah, muruudá' aa tlehharuut an kudá' sa tlehharuút, gár /abén baraakaá yaamuwo ar sa tlehharuut i káhh.

¹⁰ Xáy gár /aben iqo deéro ar muu iwa ooi, «Ga/aawaak, gaarí ka /aben.» Laatí i daadeer iimír aange.

¹¹ Muruú aa waaraahh heé gu inslaasláw i kaahh, tam muruú aluúwaá hardáh ku inslayká nee qartá aluudá' gi haar.

Muruú daharusmo aa ár

¹² Anuú daharusmo, aáng a waawutmoó Israeli, oo baraá gixsár Yerusalemu.

¹³ Aníng baraá inslaway'eene mura' sleémeero oo ta tlehhiiti baraá daanduú yaamuwo una alqaytsiít, ngiri aldaákw ar sagalooa. Naxés Mungú wayaqamuú yaariír guna haniís dír muu, as inooín tawa hooti ar wayaqamu.

¹⁴ Mura' sleémeero oo muu i tlehhaahhiti baraá yaamuwo ugwa alqaytsiít, nee umuúqo gaaro a tawór huwisha, adór heé fur'a gaa alta'aain.

¹⁵ Gár aa gwaambit gan'aasa ga ya/andaaká, tam muruú kaáhh faaro ga ya/anká.

¹⁶ Aníng ana baraeéní oó', «Aníng sagalooár yaariir aga sláw, waawitá sleémeero kudá' aa giirin baraá Yerusalemuro ba/a, eeít, aníng aga intsahhaám baraá sagalooa nee xu'utiro.»

¹⁷ Aníng baraá muunaáeene ana slaá' sagalooa ngiwa xuu', nee pungahhama, nee daktu'uuma. Ala tlehhmuú adoorí una tsaáhh tawa adór heé fur'a gaa alta'aain.

¹⁸ Asma baraá sagalooár yaariire, xurér yaariir i deer. Nee heé tsaahhár yaariir gaa slay, inós gurhaamír yaariir gan dogiit.