DABE 9 - Biblía Axweesantá Hhohho' ar Mungú 2004

Muu iwa iiawasleés

¹ «Aá xoorór Israeli, kuungá' iia qaasaak, laarí kuungá' aga naka/é' yaaér Yordani kawa waarahha', as yaamaá xoorduudá' uren nee awa /uureemaá koomá' ta kuungae kiwa ala'. Kudá' gixsaduuín ló'wa uren, nee koo/ír gixsaduuín ka tlet ay gawaá doori.

² Múk baraá yaamuudá' hoót ku ló'wa tlét, nee i ló'wa /uureemaá koná'. A xwaylár Anaki, kudá' kuungá' ta xua' nee kangw'ín taa axasé', ‹Xáy, heé nee mukduú Anaki ti tlampa'aasá' a heemá?›

³ Xuaak, AAKOÓ MUNGÚ, Munguúhúng, inós laarí yaaér Yordani gan geeraahúng wa waaraahh adór asltá xaa'aá /aay. Inós mukdá' gun hhaamiis, guri geerahúng wa baal. Gawaá adoorihe, in gusá', kiri wa'aá wák ar hhaamisá', adoodá' AAKOÓ MUNGÚ ngira al'axweés.

⁴ «Ala AAKOÓ MUNGÚ, Munguúhúng mukdá' burngwa hhe'eés geeraahúng wa guusaro, ma baraá gur'erhúng i ooara', ‹AAKOÓ MUNGÚ atén tina dahaás baraá yaamuuká' asma tawa gana'amuú koomaan.› Ala handá' AAKOÓ MUNGÚ, mukdá' guna geeraahúng wa guús asma tlakweemaaín.

⁵ Yaamuuín kuungá' i ala'aaká as kuungá' tawa hota gana'a', laqaá munerhúng kawa hhohhó', ala AAKOÓ MUNGÚ, Munguúhúng mukwí gun geeraahúng wa gusiisín, asma inooín kiwa tlákw, nee axweesantós tidá' aa lo'ór wa /aáy dír baabi'iihúng, Abrahamu, nee Isaka, nee Yakobo gan gawdeesár wa slaa'.

⁶ Naagáy xuaak AAKOÓ MUNGÚ, Munguúhúng yaamuuká' hhoohhoo' ngin kuungá' i hanisiiká kiwa ala', as kuungá' tawa hota gana'a', asma kuungá' a múk ló'wa sage gawdén.

⁷ «Tidá' ma baloó gunqareesara', adoodá' AAKOÓ MUNGÚ, Munguúhúng kura buhhtisé' baraadaá xaanxaywo. Iimidá' kuungá' tawa baraá yaamaá Misrír wa ti'ité', ay baalaarír laarí hám tawa diirí diria', kuungá' an kumaamitá' AAKOÓ MUNGÚ kuwa ahhahhita'.

⁸ Tam amoodár tloomár Horebuwo, kuungá' AAKOÓ MUNGÚ una buhhtisé', inós iri ló'wa buúhh tsaxwaá nuwa hhaamisi.

⁹ Qoomár aníng niwa tsa/ám gawaá tlooma, niwa tlaa/eedá' parereehhayen kudá' hara'ayár koomá' ngiwa leéhh dír Mungú, kudá' taa alqadoórí gooín, alqadoodá' AAKOÓ MUNGÚ aa tleéhh nee kuungá', aníng ana gawaá tloomár iwiwiít deelo deeloo mibeeri tsiyáhh xweera nee tlaatla/ango, aga /ayiimiiká tam gár naa wáh i káhh sleeme.

¹⁰ Naagáy aluuwo AAKOÓ MUNGÚ parhheemaá tsár awa tlaa/e ngiri haniís, awa aa diitsarós ar gooín. Gár taa gawaadá' i gooín a axweesani sleémeero ar AAKOÓ MUNGÚ aa baraá asltá wa káh dír mukdá' aa burumburiit dír gamuú tlooma.

¹¹ Alaá deeloodá' mibeeri tsiyáhh iwa waaráhh xweera nee tlatla/aangw AAKOÓ MUNGÚ parhheemaá tsár awa tlaa/e, kudaá taa alqadoórí gooín, ngiri haniís.

¹² «Naagáy AAKOÓ MUNGÚ aníng iri báy, ‹Tláw, aweér ar gaanslaay gawaá tloomaro, asma mukdaádá' taa baraá yaamaá Misrír wa dúx aa hhitruút. Loohidá' ngaa hara'ayiím eeharto ngaa gaanslár geexayé', slaqsoó taa kwahhuút ngwa tleehhiyé'.›

¹³ «Slám AAKOÓ MUNGÚ iri malé báy, ‹Mukwí ugwa tsaáhh, ku ló'wa sagegawdén.

¹⁴ Xaa mawáng i hhaamiís, umuuín u fiíts gawaá daanduú yaamuwo, aníng kuúng un xoorór ur tleéhh ar /uuruú koom, nee ar yaariir ta inooine.›

¹⁵ «Naagáy niri alií warqáw, niri gawaá tloomár wa aweér, gawaá dabaaeene parhheemoodá' tsár awa tlaa/e u koóm, kudá' taa alqadoórí gooín. Slám asla i gawaá tloomár wa ót.

¹⁶ Aníng ana qaytsiít, naxés kuungá' tlakweema iga qaroó tlehhé' dír AAKOÓ MUNGÚ, Munguúhúng. Naxés kuungá' slaqsoó dama oo taa kwahhuút ugwa tlehhé'. Kuungá' loohidá' AAKOÓ MUNGÚ naa kuungií hara'ayín kari geexeeré'.

¹⁷ Gawaá adoorihe aníng parhheemoodá' tsár awa tlaa/e ngiri yaamií kwaáhh, ngiri dír geeraahúng i giqáw.

¹⁸ Naagáy niri yaamií qaát dír geeraá AAKOÓ MUNGÚ, adoodá' aáng naa geerií tleéhh, har afiqoomár deelo mibeeri tsiyáhh xweera nee tlaatla/aango, aga /ayimiika, tam ma'aá naa wáh i kahhiyá', as daanduú tlakweemaahúng kudá' taa tlehhé' dír ilaá AAKOÓ MUNGUHE, kuri buhhtisé'.

¹⁹ Aníng ana ló'wa da'ayuút as buhhtaá AAKOÓ MUNGÚ daanduuhunge, geeraawo naa hhaamiís, ala AAKOÓ MUNGÚ qoomaadae aníng ina malé iiárií qaás.

²⁰ AAKOÓ MUNGÚ Aroni sleeme guna ló'wa i buúhh, nee guri gaasár wa slaá', aníng ngway aleefiriím sleeme qoomaadae.

²¹ Gadaádá' tlaakw, damaadá' taa tlehhé', ana daá/ ar asla, ngiri tuu'uút, ngiri xoósl, tari adór teeri, teeridá' ngiri kwaáhh baraá duxuudá' gawaá tloomaadá' wa wa/amiím.

²² «Slám kuungá' AAKOÓ MUNGÚ, Munguúhúng una baraá Tabera wa buhhtisé', nee Masa, nee Kibrot-hata'afa.

²³ Qoomaadá' AAKOÓ MUNGÚ kuungá' nuwa Kadesh-barneár wa ya/aáw iwa kaahi, ‹Tlawsé', yaamuudá' aníng naa kuungá' i haniís i hotaá awaak!› Kuungá' tari sié', kuungá' tidá' inós aa oó' aga haratlinti'ii'iiká, laqaá aga iialooesi'iiká.

²⁴ Iimír aáng ilaaeé' niwa pa/iia, kuungá' aqo múk AAKOÓ MUNGÚ gu ahhahhiít.

²⁵ «Gawaá adoorihe, aníng ana gurúr qaát dír geeraá AAKOÓ MUNGÚ i aleeró, deelo mibeeri tsiyáhh xweera nee tlaatla/aango, asma AAKOÓ MUNGÚ aníng ina báy, ‹Xoororí a hhaamiís.›

²⁶ Aníng AAKOÓ MUNGÚ una firiím, niwa kah, ‹Aá AAKOÓ MUNGÚ, mukók kuduú aalirók mu qwaareesaar, mukdá' taa ba/amís nee taa baraá yaamaá Misrír wa dúx ar aleesleemu nee ar /uuruú úr.

²⁷ Inslaweek sagadiyuuseerók Abrahamu, nee Isaka, nee Yakobo. Kuúng sagagawduú mukwí mu gaárí xuaar, laqaá tlakweemaaín mi gaárí xuaar, nee dakuúsar'ín.

²⁸ Múk amoodá' atén tiwa dúx matawa oó', AAKOÓ MUNGÚ mukdá' guna duúx baraá yaamuudá' wa aleeró as nguwa tsu/utár ay baraá xaanxaay, asma gaa aleeslayká ngiwa dahaasi baraá yaamuudá' inós aa al'axweés, nee as mukdá' nguwa ló'wa aáhh.›

²⁹ Asma mukwí an kók oo kilá', múk kuúng taa dúx ar /uuruuwók nee aleesleemuuwók oo úr. »