DABE 8 - Biblía Axweesantá Hhohho' ar Mungú 2004

Yaamaá hhoohhoo' awa aali

¹ «Hara'ayaarí naa dirhúngí hara'ayiím ooharo harmagahhaak, as kuungá' daqaní hota kiwa sleera' nee tawa tlahha', nee daqaní ta datá' baraá yaamuudá' AAKOÓ MUNGÚ aa lo'ór wa /aáy dír baabi'iihúng.

² Inslawaak adoodá' AAKOÓ MUNGÚ, Munguúhúng, nura geerahaár aaiidá' tleere tawa baraá xaanxár oté', afiqoomár kureeraá mibeeri tsiyahhe, as kuungá' nuwa múk iialoén tleehhi, nee munerhúng ngiwa iiari, as tidá' kuungá' ta aldakuta' baraá munerhunge ngiwa xui, nee axáy hara'ayaarós aga otí'i, laqaá aasla'áy.

³ Nuna ala qwárkwí máy as tiwa niinaweesa', aluuwo muruú /aymaadá' ta bay maána nguri haniís, muruú /aymár kuungá' ta baloó xua'aaká, laqaá baabi'iihúng sleeme ngwa xui'iiká. Adoorí gana /iís asma nuwa intsaahhatisi, adór hee ir hootiiká ar muruú /ayma kilós, ala aqo ar axweesantá amór AAKOÓ MUNGÚ daahh.

⁴ Qoomaarí ar kureeraá mibeeraá tsiyahhe tlabaahúng naa slaxarumiti'iiká, laqaá ya'aahúng naa xir'imiti'iiká.

⁵ Tí inslawaak adór AAKOÓ MUNGÚ, Munguúhúng kuungá' nura nanaáq adór baabá na/aywós ngur naanaqaaqan.

⁶ Gawaá adoorihe, hara'ayár AAKOÓ MUNGÚ, Munguúhúng oohaak, as loohirós kawa eehada', nee inós kuwa ilaiwawa/a'.

⁷ AAKOÓ MUNGÚ, Munguúhúng inós kuungá' nu dahaas baraá yaamuudá' hhoohhoo', yaamaá yau, nee tsinqaá ma'aay, nee kutloó ma'aay, kudá' ti'imiít baraá xatsoó wa aleeró, nee gawaá tlom'i.

⁸ Yaamuuká' a yaamaá angaánoó shayirír koomá', nee xaa'aá sabiíbuwo, nee /aantsihe, nee xaa'aá ta babay komamaángaro, nee seituúniro nee danuhe.

⁹ Amoodaádae muruú /aymár yaariír u sleerá', nee kuungá' gár nuwa /aaruw i káhh. Tlaa/eewós i muqslár koná', nee gawaá tlom'iiwose muqslár sirda/atén an folitá'.

¹⁰ Kuungá' a /ayiindá' nee tari axá', AAKOÓ MUNGÚ, Munguúhúng kuri sluufisá', asma yaamaá hhoohhoo' nga kuungií haniís.

Munguúwók mu gunqareesaar

¹¹ «Ti harmagahhe' AAKOÓ MUNGÚ, Munguúhúng mu gunqareesara' as hara'ayaarós kawa meera' ooharo, nee dabeerose nee kaahirose, tí laarí aníng naa kuungá' i hara'ayiím.

¹² Ga/aawaak, qoomár bara /ayiindé' nee tari axé', marayhúng awa hhohho' bira tlehhé', tari baraadá' wa hoté',

¹³ qoomár hikwa, nee bee/angwhúng, nee sahaábuhúng nee peésarhúng, nee umuú gaaro tidá' ta koonda' bira doogiín,

¹⁴ ma daara/utara, AAKOÓ MUNGÚ, Munguúhúng kuwa gunqaresa', kudá' kuungá' naa baraá yaamaá Misrír wa duux, qoomaadá' kuungá' tawa lawaale.

¹⁵ Inós an kudá' kuungá' naa geerahaar baraá xaanxoó úr oo dae tlaaqa. Xaanxaydá' dayshér qarkú koom ga koóm nee xireeri, baraá yaamuudá' ma'aá kooma'aakahe. Inós ma'aay ngina baraá tlaa/ár gawít wa duúx.

¹⁶ Slám inós an kudá' kuungá' naa /aymiis maánaro qoomár tawa baraá xaanxaay, muruú /aymaadá' baabi'iihúng ta baloó xuiiká. Adoorí gana tleéhh as kuungá' nuwa niinaweesi, niwa iiari as nuwa xuxuui, nee alhhe'eesaywo nuwa hhooeemáy tleehhi.

¹⁷ Gawaá adoorihe ti harmagahhe' ma baraá munerhúngí ooara', ‹Atén taa kiloorén daqaari'iitisaan ar /uureemoorén, nee aleesleemurén oo kilá'.›

¹⁸ Inslawaak AAKOÓ MUNGÚ, Munguúhúng an kudá' kuungá' naa daqaari'iimár i haniis. Adoorí gana tleéhh as alqadoorós tidá' ngiwa gawdeesi, tidá' aáng aa tleéhh nee baabi'iihúng tam ay laarí.

¹⁹ Ala kuungá' AAKOÓ MUNGÚ, Munguúhúng bura gunqaaresé', nee munguaá hatlá' kiri sagadiyusé', nee kiri sluufmisé', aníng kuungá' laarí nun gurbuú' ar looeemawo, kuungá' a hhaandá'.

²⁰ Kuungá' AAKOÓ MUNGÚ, Munguúhúng bura iialooesi'iiká, a hhaandá', adór xoorduudá' inós aa hhaamiís geeraahúng wa aleeró.»