DABE 7 - Biblía Axweesantá Hhohho' ar Mungú 2004

Xoorór AAKOÓ MUNGÚ aa tsawaár

¹ «AAKOÓ MUNGÚ Munguúhúng nu hardahaas baraá yaamuudá' kuungá' tay hotaá eera', nee xoordaá yaariir awa baraadá' gi guus. Qoomár bara daté' baraá yaamuudá', inós xoorduudá' faanqw /uuruú koomá' ta kuungae gi guus. Inooín an xoorór Hiti, nee xoorór Girgashi, nee xoorór Amori, nee xoorór Kana'ani, nee xoorór Perisi, nee xoorór Hifi nee xoorór Yebusi.

² Slám qoomár AAKOÓ MUNGÚ, Munguúhúng birnga haniís gawaá dabaahúng mukdá' kway balé', ku hhaamisá', al'axweesani tam ar niiná ma qaasara', nee inooín mi baloó gurtlawaara'.

³ Dasuuhúng mukuwa duxuút nee daaqay'ín, laqaá daaqayhúng dasuuín munguwa duxuút.

⁴ Adoorí bara tlehhé', inooín na/iihúng ki qwaarees, nee AAKOÓ MUNGÚ inooín ngu eehariaaká, munguaá hatlá' ngiri eehariyá', AAKOÓ MUNGÚ iri daa/atúy buhhtaawo, aluuwo Mungú kuungá' nu hhaamiis ar wa'aá wák.

⁵ Ala adoorí ti tlehhe': Kiteeri'ín kudá' ilahhooa amór saaw tay fe/e', nee uheemi giqawaak. Slaqsi'iidaá Ashera amór saaw ti kwahhe', nee slaqsi'iidá' taa dakuút ar daba', da/aak.

⁶ Adoorí tleehhaak, asma kuungá' tunda paraátl as AAKOÓ MUNGÚ, Munguúhúng. Kuungá' AAKOÓ MUNGÚ nuna tsawaár baraá tla/ángw xoorduuwo as tawa mukós oo kilá'.

⁷ «AAKOÓ MUNGÚ kuungá' naa slaiiká nee naa tsawaariiká as kuungá' tunduwa yaariír ta xoordaá hatlae, kuungá' tundun ló'wa niiná ta xoordaá hatlae, kuká' gawaá daanduú yaamií diriiá'.

⁸ Ala AAKOÓ MUNGÚ kuungá' nuna slaá' asma al'axweesantadá' aáng aa alqadín dír baabi'iihúng, an gár nusa ba/amís ar /uuruuwós kudá' úr, nee nuri baraá lawaali'iimár wa tuú/, baraá dabaá waawutmo Farao oo Misri.

⁹ Gimsé, xuaak AAKOÓ MUNGÚ, Munguúhúng, inós an Mungú, a Munguú inkihhimuú koóm, kudá' alqadoorós gaa oh nee sla'aarír warqawaaká gan laqaaqán ay qari sleémeero, dír mukdá' inós gu slaá' nee hara'ayaarós gaa oh.

¹⁰ Ala mukdá' sleémeero inós gu ahhiít, muxtaaro i baabaqasiiká.

¹¹ Gawaá adoorihe ti harmagahhe' hara'ayaarós nee dabeerose, nee kaahirós tidá' aníng naa kuungií hara'ayiím laarí na iialooeesaak.

Tsuuqa dír mukdá' aa iialooees

¹² «Kuungá' kaahirí bara oté' ar ilakaahara, nee adoodá' kari tlehhé', AAKOÓ MUNGÚ, Munguúhúng alqadoorós ga oh daanduhunge, nee sla'aarirós ar warqawaaká ngin laqán, adoodá' aáng ngira lo'ór wa /aáy dír baabi'iihúng.

¹³ Kuungá' nuri slaa' nee nuri tsuuq, kuungá' tari ló'wa tláhh, nee na/iihúng niri tlahhiyá', qamuuhúng giri tsuuq as kuungá' balaangw kuwa sleera', nee difaái, nee di/to, kuungá' nu tsuuq as hikwa nee bee/aangw ngiwa haniisi baraá yaamuudá' aa al'axweés.

¹⁴ Kuungá' tundun tsuuq ta muu sleémeero oo daanduú yaamuwo. Baraá tla/angwhunge hhawaata laqaá /ameenír xwayluwaaká i káhh, laqaá hikwaahúng.

¹⁵ AAKOÓ MUNGÚ tiqti sleémeero ga hingees dirhunge, nee kuungá' tiqtír nu slaw i káhh tam ar niiná ar dae tlaaq adór tidá' kuungá' naa sleer qoomár tawa baraá yaamaá Misrír i diria'. Ala inós wakuuserhúng ga tiqtidií tlees.

¹⁶ Xooro tam gaalá ar AAKOÓ MUNGÚ, Munguúhúng naa gawaá dabaahúng i haniís hhaamiisaak, ma baloó gurtlawaara'. Mungui'ín mi sluufmiisara', asma gár adór tí dirhunge a tsaaxweelír kuungá' nu ohiim.

¹⁷ «Ma baraá munerhúng i kaahara', ‹Mukwí ku úr ta atene. Xáy, guusaro adór ngir aslawan baraá yaamuukae a adoomá?›

¹⁸ Mi da'ayumiitaara', inslawaak adoodá' AAKOÓ MUNGÚ, Munguúhúng aa tleéhh dír Farao nee yaamu sleémeero awa xoorór Misri.

¹⁹ Inslawaak muxtaadá' tlakw ilahunge taa aandé', muruú waa/oo/amo nee layudá' uren, nee /uuruú úr nee aleesleemuú úr kudá' AAKOÓ MUNGÚ, Munguúhúng ira gadiyuús qoomár nuwa baraá yaamaá Misrír wa tuú/. Adoorí an adoodá' i tleehhi dír mukdá' kuungá' ta da'ayumiita'.

²⁰ Tam adoorihe AAKOÓ MUNGÚ, diwíl gwaa tleés amór mukdá' aa kuungá' wa goow aa nahhamiít as ngiwa hhaamisi.

²¹ Gimsé', mi da'ayumiitaara', asma AAKOÓ MUNGÚ, Munguúhúng i baraá tla/angwhúng i dirii'. Inós an Munguú úr nee kudá' dae tlaaq.

²² AAKOÓ MUNGÚ, Munguúhúng xoorduuká' gusisiingo gin tseegamiis har qoomár kuungá' tar geerií surkuunda'. Xoorduuká' gi wa'aá wákár hhaamisiiká, as kahhó' aluuwo kuungá' mutunduwa haradáh nee makaá sla/a.

²³ AAKOÓ MUNGÚ, Munguúhúng, wakuuserhúng ngi gawaá dabaahúng i haniis giri amoqwaarees ay dír ngay hhaamisi.

²⁴ Inós waawitaáín ngu gawaá dabaahúng i haniis, kuungá' kiri tsu/á', nee inooín kiri gunqarees. Heé inooín baqto gi aleesláw i kaahh, ay dír kuungá' inooín kay hhaamisa'.

²⁵ Slaqsi'ii'ín kudá' taa dakuút awa mungui, da/aak. Peésaadá' kira tleéhh, nee sahaábuwo, mi ilatleeruusara', laqaá muruuín kwí mu ar tlawaara' as tawa koohúng. Adoorí bara tlehhé' a tsaaxweeli dirhunge, nee AAKOÓ MUNGÚ, Munguúhúng ga waak.

²⁶ Slaqsi'iidá' mi ar watlaara' amór marayhúng, laqaá bar adooriheeká, kuungá' tundu adór slaqsi'iidá' wa lu'us. Kuungá' masók aqo in siá' nee kiri waaqaqa'á' asma tawa muruú taa lu'ús.»