DABE 6 - Biblía Axweesantá Hhohho' ar Mungú 2004

Hara'ayár ak ur

¹ «Gaarí an hara'aya nee dabe nee kaahi tidá' AAKOÓ MUNGÚ, Munguúhúng aníng iwa ádbáy, kuungá' nuwa intsaahhatis, as kuungá' kawa tlehha' baraá yaamuudá' kuungá' tay hotaá eera'.

² Qooma sleémeero ar kuungá' tawa slafa', a hariindá' AAKOÓ MUNGÚ, Munguúhúng kuwa ilaiwawa/a' nee dabeerós sleémeero kawa iialooesa', nee hara'ayaadá' aníng naa dirhúng i hara'ayiím. As kahhó' kuungá' nee na/iihúng nee na/aá na/iihúng hotaá tleerá' kiwa sleera'.

³ Gawaá adoorihe, kuungá' múk Israeli, ilakaaharu tleehhaak, as diihhooa kawa sleera' nee tawa ló'wa doogiinda' baraá yaamuudaá diihhooár ilwa nee dane, adoodá' AAKOÓ MUNGÚ, Munguú baabi'iihúng ngira al'axweés.

⁴ «Gimsé' iia qaasaak, kuungaá múk Israeli! AAKOÓ MUNGÚ an Munguúrén, AAKOÓ MUNGÚ inós kilós an Mungú.

⁵ AAKOÓ MUNGÚ, Munguúwók slaeek ar muunaáwók sleémeero, nee ar qeeruuwók sleémeero nee ar /uuruuwók sleémeero.

⁶ Hara'ayaarí aníng laarí naa dirók i káh, baraá muunaáwók ti qas,

⁷ nee na/iiwók ki intsaahhatís ar inkihhimu. Kaangwí ku alki/ít qoomár bar do'ók i dirí', laqaá bar hi'iimít, laqaá bar qatuú eér, laqaá bar qatuuwo naa tleér.

⁸ Axweesantí ka tsék gawaá dabaawók nee dahás gawaá gitsee/aawók adór slamángw wa ale.

⁹ Gooimeek gawaá nahhár do'ók nee gawaá afér do'ók.

Gurbu'utá múk iiawaslén

¹⁰ «AAKOÓ MUNGÚ, Munguúhúng adoodá' lo'o ngira /aáy dír baabi'iihúng Abrahamu, nee Isaka, nee Yakobo, inós kuungá' nu dahaas baraá yaamaá gixsadu uren nee hhohho', kudá' kuungá' taa tlehhi'iiká.

¹¹ Maraay muruú hhohhooe i hatsiyá' oo kuungá' taa qasi'iiká, hhaleeraá ma'aay awa kuungá' taa foli'iiká i dayá', nee qamaá sabiíbu nee awa seituúni, awa kuungá' taa dahasi'iiká i dayá'. Qoomár AAKOÓ MUNGÚ kuungá' burna dahaás baraá yaamuudá', muruú /aymár umuúqo daa'awto un /agá' tari axá'.

¹² Tí ma baloó gunqareesara' adór AAKOÓ MUNGÚ kuungá' nura baraá yaamaá Misrír wa tuú/ qoomár tawa lawaale.

¹³ AAKOÓ MUNGÚ, Munguúhúng ilaiwawa/aak, inós kilós sagadiyusaak, nee lo'o /ayaak ar baraá umuuwós kilós.

¹⁴ Munguaá hatlá' mi sluufmisuú awaara', kudaá xoordudá' naa harweeriye',

¹⁵ as AAKOÓ MUNGÚ Munguúhúng munduwa i buúhh, nee inós kuungá' munduwa amór saáwí fiíts gawaá daanduú yaamuwo, asma AAKOÓ MUNGÚ, Munguúhúng inósuuwí baraá tla/angwhúng i dirií' a Munguú da/tá koóm.

¹⁶ «AAKOÓ MUNGÚ, Munguúhúng mu iiaraara' adoodá' kura baraá Masár wa iiadé'.

¹⁷ Tí na ló'wa harmagahhaak, dabér AAKOÓ MUNGÚ, Munguúhúng na ló'wa oohaak, nee lamabu'uungose, nee kaahirós tidá' naa hara'ayín.

¹⁸ Gár AAKOÓ MUNGÚ gu sla'atamis na tleehhaak, daqaní kuungá' diihhooa a sleerá'. Kuungá' daqaní yaamuudá' hhoohhoo' AAKOÓ MUNGÚ aa lo'ór wa /aáy dír baabi'iihúng i ala'.

¹⁹ Nee kuungá' daqaní wakuuserhúng a gusá' adoodá' AAKOÓ MUNGÚ ngira al'axweés.

²⁰ «Deelór hardaha, na/iihúng burna yaahasiyé', ‹Lamabu'ungwí nee hara'ayaarí, nee dabeero, tí AAKOÓ MUNGÚ, Munguúrén naa atén i oó' gár ti babay a milá?›

²¹ Daqaní kuungá' na/iihúng ki adoorír mu/aywatsá', ‹Atén aáng a lawaalér waawutmo Farao oo yaamaá Misri, ala AAKOÓ MUNGÚ atén tina baraá yaamaá Misrír wa ba/amís ar dakós kuduú /uuruú koóm.

²² Atén ilaarén awa kilae laydu nee muruú waa/oo/amo nee oo dae tlaáq una araán, qoomár AAKOÓ MUNGÚ nguwa tleéhh dír múk Misri, dír waawutmooín nee geeraharuuseerós.

²³ Atén tina baraá yaamaá Misrír wa tuú/, tiri dír yaamuuká' i huúw adoodá' aáng ngira lo'ór wa /aáy as ngiwa haniisi dír baabi'iirén.

²⁴ Naagáy AAKOÓ MUNGÚ atén tina hara'ayín, dabeerí sleémeero kawa iialoeesaan nee AAKOÓ MUNGÚ, Munguúrén kuwa ilaiwawa/aan as atén awa kilá' hotaá hho' kiwa slawaan, nee as kahhó' atén tiwa de'en umuú daqto adoodá' tira de'én tam ay laarí.

²⁵ Atén ilakaaharu bura tleehhaán dír geeraá AAKOÓ MUNGÚ, Munguúrene, hara'ayarós sleémeero bara boo/eesaán adoodá' inós ngira hara'ayín, atén daqaní ti gan'amií harafaar.› »