DABE 5 - Biblía Axweesantá Hhohho' ar Mungú 2004

Hara'aydaá mibaangw awa Mungú

¹ Mose múk Israeli guna dinkwárí burumbuúr, guri báy, «Kuungá' múk Israeli, kaahi nee hara'ayaarí iiárií qaasaak, tí laarí ni dír geerahúng wa kah. Tí intsaatsahhaak nee ka boo/esá' ar inkihhimu.

² AAKOÓ MUNGÚ, Munguúrén alqado gana tleéhh nee atén dír tloomár Horebú wá ale.

³ Inós alqado gaa tleehhiiká nee bariiserén kilós, ala alqado gana tleéhh nee ateéká' slafá' hám laarí.

⁴ AAKOÓ MUNGÚ nee kuungá' ana dír tloomár wa axwesé' ar afe adór hee nee kuqá'. Inós kuungá' nuna i axweés baraá tla/ángw asltá wa ale.

⁵ Qoomaadae aníng ana sihhiít tla/ángw kuungá' nee AAKOÓ MUNGÚ, nee tidá' inós naa káh, aníng ngiri dirhúng i ilaahanmiís, asma kuungá' asltadá' ana da'ayuté', nee aga gawaá tloomadá' i tsa/aandi'iiká. «AAKOÓ MUNGÚ ina oó',

⁶ ‹Aníng a AAKOÓ MUNGÚ, Munguúwók, kudá' kuúng ugwa duux baraá yaamaá Misrír wa ale, yaamuudá' lawaali'iima kawa /ák.›

⁷ «Munguaá hatlá' mi koomaar, aqo har aníng kilooeé'.

⁸ «Miti kilók slaqsa'aá munguaá hatlá' i tleehhaar, awa slaqás nee gár gawaá doorí dirii', tam slaqsoó gár baraá yaamu, laqaá tam slaqsoó gár baraá ma'aay.

⁹ «Kuúng slaqsi'iidá' mi i tumbarara'amitaar, laqaá mi sluufmisuú awaar, asma anuú AAKOÓ MUNGÚ, Munguúwók, a Munguú da/tá koóm. Kudá' li/oó tlakweemaá xwayliité' tidá' aníng i ahhiit gu dír na/ii'ín i buú' tam ay nángw sagaáwa tám laqaá ay tsiyáhh.

¹⁰ Ala kudá' aníng i sla'á' nee hara'ayar'eé' ngaa oohiye', in slaá' ar sla'aarír warqawaaká ay nángw sagaáwa kumér kúm.

¹¹ «Umuú AAKOÓ MUNGÚ, Munguúwók mu tawo axweesaar, asma AAKOÓ MUNGÚ, heé umuuwós gu tawo axweés, gu gana'amií harafaariiká.

¹² «Deelór Sabaáto harmagaahheek, ka hhoohhooés, adoodá' AAKOÓ MUNGÚ, Munguúwók ngira oó'.

¹³ Deelo lahhooe gadiyuús, gadiyeerók sleémeero tleehheek,

¹⁴ ala deelór faanqw a deelór Sabaáto ar AAKOÓ MUNGÚ Munguúwók. Baalaadae kuúng ma gadiyusaar, laqaá tam garmaawók, laqaá dasiirók, laqaá lawaalmoowók, laqaá lawaalo'oorók, laqaá tam sleerók, laqaá daqwaywók, laqaá tam umuúqo makiito'ooro, laqaá tam hoomoó dír do'ók, as kahhó' lawaalmoowók, laqaá lawaalo'oorók, iwa adór kuúng wá hungu/uusi.

¹⁵ Ala kuúng ma gunqarutaar adór kuúng aáng tar lawaalmo baraá yaamaá Misriro, anuú AAKOÓ MUNGÚ, Munguúwók uri baraadá' wa duúx ar /uuruueé' nee ar dakw'eé' kudá' naa gáwtí tleés. Gawaá adoorihe anuú AAKOÓ MUNGÚ, Munguúwók un babaw, deelór Sabaáto harmagahheek kawa ot.

¹⁶ «Baabuúwók nee aayoorók ilaiwawa/eek adoodá' anuú AAKOÓ MUNGÚ, Munguúwók, una hara'ayiím, adoorí tleehheek as slafíngw kureeraá yaariir kuwa sleer, nee diihhooa kawa sleer baraá yaamuudá' AAKOÓ MUNGÚ Munguúwók ni kuúngií haniisi.

¹⁷ «Hee mu gaasaar.

¹⁸ «Fuqi ma awaar.

¹⁹ «Ma fisiisimaar.

²⁰ «Inslaawmoowók mu /aysántí tsataar.

²¹ «Harér inslaawmoowók ma ilatleerusaar, laqaá doó inslaawmoowók mu ilatleerusaar, laqaá qaymoorós, laqaá lawaalmoowós, laqaá lawaalo'oorós, laqaá sleerós, laqaá daqwaywós, laqaá umuúqo gár inslaawmoowók i kona.

²² «Kaangwí an axweesanaydá' AAKOÓ MUNGÚ naa dír dinku'uumarhúng sleémeero wa axweés ar afór ur gawaá tloomár wa ale, baraá tla/ángw asltá wa ale, nee baraá huunki nee baraá ma/amír aa qipit, tam axweesantá aa doók i káhh. Axweesantí gari gooín gawaá tlaa/eedá' tsár awa parereehhayen ngiri dir'eéní haniís.

Muu iwa da'ayuút

²³ «Qoomár afoodá' kawa axasé' baraá tla/ángw giwti, nee asla iwa gawaá tloomár wa ot, geeraharuusér tlahhi'iihúng sleémeero nee bariise nina dir'eéní hardihiyé'.

²⁴ Inooín tari oó', ‹Iia qaaseek! AAKOÓ MUNGÚ, Munguúrén taa xirfuuwós i laqán nee uraywós, afoorós aga axaasaán baraá tla/ángw asltádá'. Laarír kilá' Mungú ugwa araán iwa axweesi nee hee, slám kitángw hee iwa gwaai ina kumiít hotaawo.

²⁵ Tsaxwaá gwa'ara awa asltadá' ur gár tis slaya a milá? Afór AAKOÓ MUNGÚ, Munguúrén bara male axasaán, atén a qatlaán!

²⁶ Xáy, a hee gaalá oo Munguú slaáf gwa axaás oo baraá tla/ángw asltá wa axweés, adoodá' atén kura axasaán nee tay hotaán?

²⁷ Tsiní kuúng, Mose, bihhiiqá' i tseewuweek, tidá' AAKOÓ MUNGÚ, Munguúrén i kaahi ngi iiárií qás, daqaní ni hardát, tidá' sleémeero ngi diréní ooár eér. Atén iia a qaasaán ngiri boo/eesaán.›

²⁸ «AAKOÓ MUNGÚ axweesantahúng sleémeero gana axaás, aníng iri báy, ‹Axweesantadá' naa kuúng bayé' aga axaás sleémeero, nee axweesantadá' sleémeero i qoón.

²⁹ Hám geera a tsiní barnaxes i meetiyá' gawaá inslawaydá' aníng iwa ilaiwawa/iya', nee hara'ayar'eé' ngiwa oohiya' umuu daqto. Geera muruuín sleémeero oo ta tlehhiiti iri ganaa' umuú daqto dir'ine nee dír na/ii'ine ay alhhe'eesay wasle.

³⁰ Tláw ádbaweek, i ki/iye' amór heemaduuín.

³¹ Ala kuúng Mose, dir'eé' tí tseew i sihhiiteek! Aníng kuúng un hara'ayar'eé' sleémeero báw, nee kaahir'eene, nee daber'eene, tidá' ta dir'íní intsaahhatis as tawa adoorír hooti baraá yaamuudá' ni inooín haniisa tawa aalir'ín.›

³² «Kuungá' masók ti harmagahhá' nee adoodá' AAKOÓ MUNGÚ Munguúhúng naa hara'ayín kawa tlehha', baraá kaahirose ma bihhií paranga/aara'.

³³ Kangwdá' sleémeero AAKOÓ MUNGÚ, Munguúhúng naa hara'ayín eeharaak, as tidá' sleémeero kuungá' ta tlehha' iwa qoon, nee deelór hotaahung kiwa sleera' baraá yaamuudá' ta sleera'a, tawa aalirhúng.»