DABE 4 - Biblía Axweesantá Hhohho' ar Mungú 2004

Dabér Mungú kawa harmagaahhi

¹ Mose axweesanto iri kumiít iwa kaahi, «Gimsé', kaahi nee hara'ayaarí ni kuungá' í intsaahhatimis ooha hhe'eesaak, nee adoodá' i kat ka tlehhitá' as tawa slafa', nee yaamuudá' AAKOÓ MUNGÚ, Munguú baabi'iihúng naa kuungá' i haniís kiwa ala'.

² Hara'aya ma doogara' daanduú tí naa dír kuungá' i ooi, laqaá dír tí naa ooi tam ar wák ma /aareesara'. Hara'ayár AAKOÓ MUNGÚ Munguúhúng tidá' aníng naa kuungií oó' ooharo harmagahhaak.

³ Kuungá' ilaahúngaá kilae aga aandé' adoodá' AAKOÓ MUNGÚ aa tleéhh daanduú Ba'al-peoriwo. Asma AAKOÓ MUNGÚ Munguúwók mukdá' munguúdá' ta bay Ba'al-peori gwaa sluufmisuú ay guna hhaamiís baraá tla/angwhunge.

⁴ Ala kuungá' inkihhimu una tlehhé' dír AAKOÓ MUNGÚ, Munguúhunge, an gár tas slafa' ay laarí.

⁵ Gimsé', aníng kuungá' naa intsaahhatís kaahi nee hara'ayaro adoodá' AAKOÓ MUNGÚ, Munguúhúng aníng ira ádbáy, as hara'ayaarí kuungá' kawa harmagahha' ooharo baraá yaamaá tay dahmaá eera' as kiwa ala'.

⁶ Dabeerí nee hara'ayaro oohaak, ka boo/esá', asma adoorí bara tlehhé', xoordaá hatlá' kaahirí birnga axaasiyé', inooín ngiri tsaahhiyá' adór kuungá' tar múk sagalooár koóm nee fuquraango, tari ooi, ‹Tí ar tsuwa ló' xooroorí ur sagalooa nee fuqurango ngi koná'.›

⁷ «Xooro tam ar wák ar ur i káhh ar munguúwós dirós i tseew adór atén nee AAKOÓ MUNGÚ, Munguúrén tir tsewén, qoomár bur alee/isáy firirimaán.

⁸ Laqaá xoorór ur tam ar wák i káhh ar kaahi nee hara'ayár ganaa' ar adór tí ga koom, tí aníng naa dirhúngí intsaahhatís laarí.

⁹ Ala gimsé' ti ló'wa harmagahhe' muruuwí mu gunqareesara', kwí ilaahunge taa aandé'. Gár adór tí miwa tleehharút baraá hotaahunge ar muruuwí kuwa gunqaaresa'. Na/iihúng nee na/aá nangwhunge ki kaangwí intsaahhatisá',

¹⁰ oo baalaadá' kuungá' tawa sihhité' dír geeraá AAKOÓ MUNGÚ, Munguúhúng dír tloomár Sinai, qoomár aníng iwa báy, ‹Muksíng burumburaare' dír geeraaeé', as aníng inooín ngiwa axweesante'eé' baw, as kahhó' inooín adór aníng ir ilaiwawa/iya' ngiwa intsaahhiya' baraá hotaaín sleémeero baraá yaamuwo, nee na/ii'ín ngiwa intsaahhatisiya' sleeme.›

¹¹ «Naagáy, qoomaadae nina tsewuuré', tari sihhité' dír gamuú tloomaadá' asla iwa gáwtí tsa/aán ay doori, ar taa tuuntuúk nee giwti nee huunkoó bó/.

¹² Aluuwo AAKOÓ MUNGÚ iri axweés dirhúng baraá tla/ángw asltadá' wa ale. Axweesantós ana axasé', ala inós kuungá' ugwa aandi'iiká, afoorós kilós ana axasé'.

¹³ Inós kuungá' nuri alqadorós báy, as kiwa ota', an hara'ayduuwós kudá' mibaangw taa gooín gawaá tlaa/eedá' tsárawa parereehhayen.

¹⁴ Qoomaadae AAKOÓ MUNGÚ aníng ina ádbáy, kuungá' nuwa intsaahhatis dabe nee hara'aya sleémeero tidá' hariim kuungá' kawa eehada' baraá yaamaá tay hotaá eera'.

Gurbu'uungw daanduú munguaá hatlá'

¹⁵ «Gawaá adoorihe, ti harmagahhe', ma gunqarutara' baldá' AAKOÓ MUNGÚ iwa axweés nee kuungá' didár tloomár Horebúr wa ale baraá tla/ángw asla, kuungá' ugwa aandi'iiká adór i dirii'i. Gawaá adoorihe ti ló'wa harmagahhe'.

¹⁶ Ma hhitiruutara' ar slaqsa'aá munguaá tawo kiwa dakuta', laqaá slaqsoó adór hhawaata, laqaá oo adór /ameeni,

¹⁷ laqaá slaqsoó makiito'ór baraakaá yaamu, laqaá oo tsir/i,

¹⁸ laqaá oo makiito'ór gurúr hi'iimiit, laqaá siyoó baraá ma'aay.

¹⁹ Ti ló'wa harmagahhe' tam qoomár bara qaytsité' gawaá doori, looa nee slahhaangw nee tsatse/ nee mura' sleémeero oo gawaá doori bura aandé' munduwa gee/aásl, as kuwa fiririinda', nee kuwa sagadiyusa' adór Mungú ló'wa ale. Muruuwí AAKOÓ MUNGÚ guna máy dír múk hatla' as nguwa sagadiyuusi.

²⁰ Ala kuungá' an múk inós naa ba/amís baraá yaamaá Misrír wa ale, didár bohóngw asla oo muqsla kar weeqatamisi. Nuna amoodá' wa duúx as tawa mukós tleehhitá', an adoosíng hám laarí tay diria'.

²¹ Ala AAKOÓ MUNGÚ, Munguúhúng aníng iri i buúhh, lo'o gari /aáy, yaaér Yordani a waarahhaaká amór yaamuudá' hhoohhoo' ni kuungá' i haniisi as tawa daqaari'iimarhúng.

²² Aníng an yaamuukií gwaá', tam yaaér Yordani a waarahhaaká, ala kuungá' hám a tsaxwaá tawa waarahha' nee tawa data' baraá yaamuudá' hhoohhoo'.

²³ Ti ló'wa harmagahhe' alqadór AAKOÓ MUNGÚ, Munguúhúng aa tleéhh nee kuungá' ma gunqaresara'. Slaqsa'aá tawo mi alqoomeesara', nee AAKOÓ MUNGÚ, Munguúhúng, kuungá' naa ya/aamárí hanisiiká inós kuwa qoomesa' nee slaqsaay.

²⁴ Asma AAKOÓ MUNGÚ Munguúhúng a asltá /ayiim, inós a Munguú da/tá koóm.

²⁵ «Barnaxes hota iga iimu/uundé' baraá yaamuudae, na/ii kiri laqwalé', nee nángw naangw, tari dimadiindé', tari hhitirumité', slaqsi'i kiri dakutá' as tawa Munguúhúng, muruú tlákw kuri tlehhitá' dír geeraá AAKOÓ MUNGÚ, Munguúhúng, nee kuri buhhtisé',

²⁶ aníng laarí Munguú doori nee yaamu un ateét as tawa lamabu'usmo daanduuhunge, aníng kuungá' nun babaw, kuungá' a hhaandá' wa'aá wák ar ale baraá yaamuudá' ta ala'a amoodár gayuú yaaér Yordani. Kuungá' a tleeresaaká amoodae, aqo tundun ló'wa hhaamiis.

²⁷ AAKOÓ MUNGÚ kuungá' nun diyaa/ baraá tla/ángw xoordaá hatlá', nee múk niiná dirhunge iri meet amoodá' AAKOÓ MUNGÚ nay guusi.

²⁸ Amoodaádae munguaá taa xaaír tleéhh nee tlaa/e kiri sagadiyusá', kudá' handá' awa gadiyér dabaá muu, inooínaadá' xumisa'aaká, laqaá axamisa'aaká, laqaá i /ayna'aaká, laqaá i tsaa'amina'aaká.

²⁹ Baraá yaamuudaá kilae kuungá' AAKOÓ MUNGÚ, Munguúhúng kuri leelehhitá', nee kuungá' un sleerá' bura leelehhité' ar munerhúng sleémeero nee ar qeeremoohúng sleémeero.

³⁰ Muruuwí sleémeero burna sláy, aluuwo kuungá' slahh'amu u sleerá', daqaní kuungá' tari ki/á' amór AAKOÓ MUNGÚ Munguúhúng nee kuri ilaiwawa/á'.

³¹ Asma AAKOÓ MUNGÚ, Munguúhúng, an Munguú gurtleemuú koóm. Inós kuungá' nu si'iiká, nu hhaamisiiká, laqaá alqadoorós ga gunqaresiiká, tidá' aa lo'ór wa /aáy dír bariiserhúng.

³² «Axáy muruú aáng aldakutaak, muruú aa tleehharumiit qoomár kuungá' tunduwa laqwaliiká, iimidár aáng Mungú hee nguwa tleéhh gawaá daanduú yaamuwo. Yaahamiisé' yaamu sleémeerowo, bihhaaqá' wa iimu/umaak ay kuqá', barnaxes gár waa/oo/amo ar adór tí aa tleehharút laqaá kaa axaás!

³³ Xáy muu afór Mungú gana qoo axaási iwa axwés dír tla/ángw asltá wa aleeró, adoodá' kuungá' kara axasé' handá' tari slafé'?

³⁴ Xáy, kuungá' mungú taa axasé' i deéro oo mukós gwaa leehh baraá xoorór hatlá' i ale, adoodá' AAKOÓ MUNGÚ, Munguúhúng aa tleéhh ar loohír iiara'at, nee layu nee slaqsa'aá waa/oo/amo, ar slaqwara, laqaá ar /uuruuwós kudá' úr, muruú yaariír guri tleéhh, kudá' taa aandé' ilahunge baraá yaamaá Misriro.

³⁵ Kuungá' muruuwí una aandé' as kawa tsahha' adór AAKOÓ MUNGÚ, inós kilós tar Mungú, oo hatlá' i kaahh.

³⁶ Afoorós ana axasé' gawaá doorí ale as kuungá' nuwa intsaahhatisi. Baraakaá yaamuwo kuungá' asltá ur kawa aanda' nee axweesantós dír tla/ángw asltadá' wa ale.

³⁷ Asma inós baabi'iihúng gina ló'wa slaá'. Inós kuungaásaá xwaylar'ín nuna tsawaár, inósuú kilá' nuri baraá Misrír wa duúx ar /uuruuwós kudá' úr.

³⁸ Inós xoordaá /uuruú koomá' nee awa uren ta kuungae gina geeraahúng wa guús as kuungá' nuwa baraadá' i huwi as yaamuuín tawa koohúng, an adoodá' hám i dirii'iya' tam ay laarí.

³⁹ Gimsé', laarí inslawaak nee baraá munerhúng ti qase' adór AAKOÓ MUNGÚ tar Mungú gawaá doori nee daanduú yaamu, Munguú hatlá' i kaahh.

⁴⁰ Gawaá adoorihe, kaahirós nee hara'ayaarós oohaak, tidá' laarí aníng naa haniís dirhúng as diihhooa kawa sleera', kuungá' dinkwa nee na/iihúnge, as kahhó' tawa hota' deelór yaariire baraá yaamuudá' AAKOÓ MUNGÚ, Munguúhúng ni kuungá' i haniisi ay alhhe'eesay wasle.»

Gixsadaá ta i gogoowí bihhaá da/aáw awa Yordaniro

⁴¹ Mose gixsadaá tám giri paraátl bihhaá da/aáw awa yaaér Yordaniro.

⁴² Gixsaduudá' muu i gogoowi bar hee heé wakusmowoseeká gwaa gaás ar pa/aayo. Heé adoorí gaa tleehh in goow baraá gixsaduuká', iri /úy.

⁴³ Gixsár Beseri gana paraátl dír yaamaá tlapaaro kudá' baraá xaanxaay as hhay Reubeni, gixsár Ramoti, baraá yaamaá Gileadiro as hhay Gadi, nee gixsár Golani baraá yaamaá Bashaniro as hhay Manase.

Dabér Mungú

⁴⁴ Gaarí an dabeedá' Mose aa haniís dír xoorór Israeli.

⁴⁵ Adoorí an adoodá' taa tleéhh, dabe nee hara'ayaadá' Mose aa hara'ayín dír múk Israeli qoomár niwa Misrír wa ti'iitiyé'.

⁴⁶ Kaangwí ina tleehharuút qoomaadá' tawa gayuú hatlá' oo Yordanírí dirii'i baraá xatstadár geeraá Bet-peori, baraá yaamuudá' aáng awa waawutmo Sihoni oo Amori, kudá' aa waawuti'in baraá gixsár Heshbonír wa ale. Mose inooín gina baál qoomár múk Israeli niwa baraá yaamaá Misrír wa ti'iít.

⁴⁷ Yaamuuwós kina hayóh nee awa waawutmo Ogu oo Bashani. Waawitaáwí tsár oo xoorór Amori, nina waawuti'ii'iné' bihhaá da/aáw awa yaaér Yordanír wá ale.

⁴⁸ Yaamuuká' nina tlayé' iimír Aroerír wa ale afaá yaaér Arnoni ay tloomár Sirioni, tidá' ta bay Hermoni,

⁴⁹ dinkwa nee bihhaá da/aáw awa yaaér Yordani ay tlawtá Araba, alhhe'eesoó /etángw tloomár Pisga.