DABE 34 - Biblía Axweesantá Hhohho' ar Mungú 2004

Gwa'arár Mose

¹ Mose iri baraá xatstadár Moabúr wa tláy, iri tsa/án gawaá tloomár Nebo, ay dír tsitsinidá' ta bay Pisga, tidá' nee yaamaá Yeriko ti ga/aawá'. Nee AAKOÓ MUNGÚ yaamuudá' sleémeero iimír Gileadír wa tleemu ay Dani giri dirósí laqán,

² yaamu sleémeero awa Naftali, nee yaamaá Efraimu, nee awa Manase, nee yaamu sleémeero awa Yuda ay Tlawtá Tla/aangw.

³ Nee darmuú Negebu, nee yaamaá darmuú Yeriko nee gixsadár slaansla, ay Soari.

⁴ Naagáy AAKOÓ MUNGÚ Mose guri báy, «Yaamuusingá' an kudá' naa lo'ór wa /aáy dír baabi'iihúng Abrahamu, nee Isaka nee Yakobo, as ngiwa haniis dír xwaylar'ín. Aníng ngaa laqaám nee ilaawoge iga aán, ala kuúng a datká baraaqií alé.»

⁵ Naagáy Mose, sagadiyusmoó AAKOÓ MUNGÚ, iri gwaá' baraá yaamaá Moabu, adoodá' aáng AAKOÓ MUNGÚ ngira oó'.

⁶ AAKOÓ MUNGÚ Mose guri foól baraá xatstá yaamaá Moabu, tidá' ti ga/aawá' nee gixsár Bet-peori. Ala ay laarí heé /aantár Mose ga xuú' i kaahh.

⁷ Qoomár Mose iwa gwaá' kureeriiwós a tsiiru nee mibeeri tsár, ilaawós naa giwi'iiká, nee inós /uuruuwós sleeme aa faakiiká.

⁸ Múk Israeli iri tsuunqumiís as gwa'arár Mose har afiqoomár deelór mibeeri tám baraá yaamaá xatstá Moabu wa ale. Naagáy, deelór tsuunqumis iri fák.

⁹ Yoshua garmoó Nuni i haats qeeruú sagalooaro, asma Mose guna dákwí qaás. Gawaá adoorihe, múk Israeli Yoshua guri ilaiwawaá/, nee hara'ayaadár AAKOÓ MUNGÚ tidá' aa Mósé hara'ayín, ngiri eehariyé'.

¹⁰ Baraá yaamaá Israeliwo aarusmoó adór Mose aa baloó ti'iitiiká, oo nee AAKOÓ MUNGÚ naa axweesiye' ar afe.

¹¹ Aarusmoó hatlá' i kaahh oo layu nee muruú waa/oo/amo gwaa tleehh, adór kudá' AAKOÓ MUNGÚ aa tleéhh ar dákw Mose baraá yaamaá Misriro dír Farao nee dír sagadiyuuseerós sleémeero nee yaamuuwós sleémeero.

¹² Aarusmo i kaahh tumu wák oo muruú waa/oo/amo gwaa tleehh, nee oo dae tlaáq adór kudá' Mose aa tleéhh, dír geeraá múk Israeli sleémeero wa ale.