DABE 33 - Biblía Axweesantá Hhohho' ar Mungú 2004

Mose tlahh'aá múk Israeli ngiwa tsuúq

¹ Gaarí an tsuuqaadá' Mose, heé Mungú, múk Israeli ngira tsuúq dír ira gwaaiiká.

² Ina oó', «AAKOÓ MUNGÚ amór tloomár Sinai ngina daáhh, tina amór tloomár Seirír wa harati'iít, tina amór tloomár Paranír wa i gwa/aát, nina baraá tla/ángw malaykér yaariír wa ti'iít, nee asla ina ót gawaá dakós oo doó /iyáy wa ale.

³ Looeemaawo mukós guna slaá', inós mukós sleémeero oo hhohhó' gun de'én. Gawaá adoorihe inooín digiruuwós gun eeharahariyá', nee hara'aya ngin dirós wa slaslayá'.»

⁴ Mose tina ádbáy dabe kawa iialooeesaan, tawa adór aalír slahhaa' dír dinku'uumarén ar Yakobowo.

⁵ AAKOÓ MUNGÚ tari waawutmoó múk Yeshuruni, qoomár geeraharuusér muu iwa burumburít qoomár tlahh'aá Israeli niwa burumburitiyé'.

⁶ Daanduú tlahhoó Reubeniwo ina oó', «Múk tlahhoó Reubeni i hooti, matawa hhán inooín masók ki niinaweeká.»

⁷ Daanduú tlahhoó Yudawo ina oó', «Aá AAKOÓ MUNGÚ, afór múk Yuda axaaseek, inooín dinkwárí ki/iseek dír muk'ín, Aako slaáqw as inooín. Inooín alee/iiseek dír wakuuser'ine.»

⁸ Daanduú tlahhoó Laáwiwo ina oó', «Múk tlahhoó Laáwi tlaa/eedaá Tumimu nee Urimu, kudá' sla'aarirók kar tsatsahhan haniseek, dír kudá' inkihhimuú koomá', kudá' taa iiara'át dír Masár wa ale, kudá' kuúng taa xuuxú' ar looeema dír ma'aá Meribaro.

⁹ Inooín xwaylitér'ín ngina geexayé' nee hhaeeín ngina gaárí xui'iiká, nee na/ii'ín ngaa gaárí xui'iiká, asma axweesantók ngina harmagaahhiyé', nee alqadoorók ngina amohhe'eemisiyé'.

¹⁰ Nee na/aá Yakobo ngi intsaahhatisiye' kaahiroge, múk Israeli dabeeroge ngu intsaahhatisiye'. Mooyángw tsuú' nguri geeraawók i qaasiyá' nee ilahhooár da/a sleémeero gawaá kitaangók oo ilahhooa.

¹¹ Aá AAKOÓ MUNGÚ, /uuruuín tsuuqeek, nee gadiyér dabaaín ya/aameek, afeetlér wakuuser'ín giqaweek, kudá' inooín ngi ahhiitá' mindiwa malé sihhiitiyé'.»

¹² Daanduú tlahhoó Benyaminiwo ina oó', «Sla'aaruusér AAKOÓ MUNGÚ. Inooín tan hoot ar amohhooa dirós wa ale, Munguú Gáwtí dirii' tlatla/aagw sleémeerowo gin harwediit nee sla'aarusmooín iri baraá tla/angw'ín wa hoot.»

¹³ Nee daanduú tlahhoó Yosefuwo ina oó', «Yaamuuwós ki tsuuqi nee AAKOÓ MUNGÚ ar tsuuqaadá' hhoohhoo' awa gawaá dooraá dahhá', nee ar tsuuqaadá' baraá yaamaá dahhá'.

¹⁴ Yaamuuwós ki tsuuqi ar mamaá tsee/amá aa hamaareés, nee ki tsuuqi ar mamaá umuú slahhaangw.

¹⁵ Ar balángw hhohhó' oo tlom'aá aáng, nee balángw yaariír oo gawaá gongoamaá alhhe'eesay wasl.

¹⁶ Yaamuuwós tsuuqaá yaariire i hatsiye', ki tsuuqi ar tsuuqaá AAKOÓ MUNGÚ, kudá' taa geehhoees ar baraá kitkiintidá' asltá wa oh. Tsuuqaaká' sleémeero i hardihiye' dír múk Yosefu, inósuuduú geeraharusmoó hhaeewós.

¹⁷ Xirfuuwós a adór oo awuú baris, xareemiiwós a adór kuqaá yaqaambuú saree/a, xareemidaádae inós xoordu gin tliwii/ ay alhhe'eesoó yaamu, inooín sleémeero gi ku/iyaá yaamií hardahaas. Efraimu xareemi ngi kon kume mibaangw, nee Manase kumér yaariir.»

¹⁸ Daanduú Tlahhoó Sebuluniwo ina oó', «Sebuluni, kuúng qwalalaá/ qoomár ti'iinangoge, nee Isakari, qwalalaá/ baraá heemaduuwoge.

¹⁹ Inooín muu kun ateet gawaá tlom'ii'ín, nee amoodae muu giri ilahhooár ganaa' ar muruú ta tsú/í hanmiis. Asma daqaari'iimar'ín ngi baraá tlawtá wa slayá', nee muruú yaariír oo taa luú/ ngu baraá hhasángw afaá tlawtá slayá'.»

²⁰ Nee daanduú tlahhoó Gadiwo ina oó', «AAKOÓ MUNGÚ i xirfuuti, asma yaamaá Gadi kaa ureés, Gadi i mamahhamiit adór diraangw, kudá' daba' gi karslamiís nee ságw gweehhiím.

²¹ Inooín yaamaá wahhaará' ngina tsawaariyé', didár yaamaá geeraharusmo. Inós múk Israeli guna geerahaár, AAKOÓ MUNGÚ nguri iialooeesiyé', nee kaahirós tidá' aa ooi dír múk Israeli.»

²² Daanduú tlahhoó Daniwo ina oó', «Dani a na/oó diraangw, kudá' naa /akuut amór Bashanír wa ale.»

²³ Daanduú tlahhoó Naftaliwo ina oó', «Aá Naftali, sla'aari aa háts diroge, yaamuuwók a bihhaá /uwa awa tlawtá Galilaya, bihhaá basko ay afiqoomár alhhe'eesoó tlawi.»

²⁴ Daanduú tlahhoó Asheriwo ina oó', «Inós ku tsuuqi ta na/ii sleémeero awa Yakobowo, hhaeewós ngu gurií ba/iye', ya'aawós di/i ngi adaraahiye'.

²⁵ Koo/ír do'ók a muqsla nee muqslár sirdaa/aten, kuúng a waydúr hót daqisleém.

²⁶ Munguú adór Munguú Yeshuruni i kaahh. Inós nina gawaá doorí wa aweér uri alee/iisár áy, nee inós i gáwtá wa hi'iimiit ar xirfuuwós oo yaariír.

²⁷ Munguú iimu/ungw wásl an dír guwaywók. Dabaawós kudá' alhhe'eesay wasl un loohisiyá'. Inós wakuuse gan geerawók wa guus, i kaahi, ‹Hhaamiseek.›

²⁸ Gawaá adoorihe, múk Israeli iri saxareemár hoot, xwaylár Yakobo gár ga daawitis i káhh dír yaamaá balaangw nee difaái, yaamaá doori i har'ií paahhamisiya'.

²⁹ Kuungaá Israeli a múk amohhoó', múk adór kuungá' a gaalá? Múk taa ba/amís nee AAKOÓ MUNGÚ. Inós an gaambórhúng ar alee/isaay, nee paángarhúng ar baali. Wakuuserhúng ni dirhúng i hardát ar ilaiwa/ame, kuungá' kiri yaamuií naka/aruurá'.»