DABE 32 - Biblía Axweesantá Hhohho' ar Mungú 2004

¹ «Aá doóri, kuungá' iia qaasaak, aníng a axweés. Aá yaámu, axweesanoó ni axwees iiárií qaasaak.

² Intsaahhasar'eé' masók i tlúp adór tluwaay, axweesante'eé' i páhh, adór har'uú wa ale, adór tluwoó baáf baraá gitso, adór ilaá tluwaay awa paahhá' baraá loo/ór dutlutluu/.

³ Asma aníng umuú AAKOÓ MUNGÚ un alki/iít, kuungá' ta oa'. ‹Munguúrén uraay ti hanise'.›

⁴ Inós a tlaa/a, gadiyeérós gár kawa /aár i káhh lohduuwós sleémeero i ganaaiyá'. Inós a Munguú inkihhím nee ku dakuús wásl, inós ku hhoó' nee i ganaa'.

⁵ Ala kuungá' tundu inkihhimu wásl dirose. Kuungá' a hariinda'aaká tawa na/iiwós. Kuungá' a qartá tlakuuse nee ar aa qwat.

⁶ Aá daktána nee múk sage waslén, AAKOÓ MUNGÚ musa adoosír bué'? Inós a baabuúhungeekáhe, kudá' kuungá' naa tleehh, tleehharusmoohúng kudá' kuungá' naa gawdeesikáhe?

⁷ de'emaá bál qaro inslawaak, kureeraá yaariir awa naa waarahhiye' aldakutaak. Baabi'iihúng yaahasaak, kuungá' tunduqo mu/aywaats. Bariiserhúng yaahasaak, kuungá' tundu ádbáy.

⁸ Qoomár kudá' úr oo gáwtí dirií' xoordu ngiwa aalir'ín i haniís, qoomár inós muu nguwa qasiís, digeemi gina qaás awa muu, adoodá' faarór na/aá Israeli i diri'.

⁹ Inós múk Yakobo guna qaás tawa mukós. Múk Yakobo guna tsawaár tawa aalirós.

¹⁰ Inooín gina baraá yaamaá xaanxáy áy, darmuú tawo oo fur'ár xaraasl ga koóm, giri baqamín, giri amohhe'eemiís, giri xún adór maamár iltós.

¹¹ Adór gwareesír doó na/iiwós xuum, tidá' harweeririim gawaá na/iiwós ar aleeró, hhampe'eeriwós ngiwa gwét, as na/iiwós ngiwa umiin, nee ngiwa hhaampi'iiwós ar gagariin,

¹² an AAKOÓ MUNGÚ kilós nura geerahaár, nee munguú hatlá' oo inós gwa alee/iis i kaahh.

¹³ Inós gina gawaá gongoamár uhís, inooín balángw qamu nguri /ayé'. Inós gina danuú baraá mar'ór tsaqás, nee di/tá baraá tlaa/ár gawit kari /aáy.

¹⁴ Inooín di/i nee ilwa ngina dír hikwá wa slayé'. Di/tá bee/aangw nee ar gwaandaawe ngina slayé', daqoroó Bashani oo awe nee aara, dinkwa nee angaánoó ló'wa hhohhó'. Difaáír /aben ar mamaá sabiíbu ana wahaandé'.

¹⁵ Ala Yeshuruni ina wahhaár nee kal/aando gari iimu/ún. Kuungá' ana wahhadité', gur'e kari tlehhité', tari bununuquumité'. Aluuwo Munguúdá' gaa tleehh nguri si'iyé'. Tlaa/adár ba/ama ngari waaqaaiyé'.

¹⁶ Inooín nguna dá/tár ayé' ar munguaá hatlá', ar tlehhmi'ii'ín kudá' slasla/arene nguri buhhtisiyé'.

¹⁷ Ilahhooár muruú ta tsu/i ngina hanmiisiyé' dír neetlaame, dír Munguheeká, dír munguaá inooín ta baloó xuiiká, dír munguaá /aben awa naa aluú wa hardihiye', kudá' baabi'iihúng naa baloó xui'iiká.

¹⁸ Kuungá' Tlaa/adá' naa xwayluur ana insleeri'iiká, Munguúdá' kuungá' naa laqwaal una gunqaaresé'.

¹⁹ AAKOÓ MUNGÚ adoorí gana ár, giri aáhh, asma na/iiwós awa daaqaay nee awa dasuuwo nguwa buhhtisiyé'.

²⁰ Iri oó', ‹Aníng a inooín wa nahhaát, axáy, alhhe'eesay'ín u ala ga/áw, asma inooín a qartá aa qwat, na/aá inkihhimuú kooma'aaká.

²¹ Aníng ina da/tár ayé' ar gár munguheeká. Inooín iga mune duuxiyé' ar slaqsi'ii'ín kudá' naa dabár tleehhiyé'. Aníng inooín in da/itár aw ar muruú mukooká, nee in buhhtís ar xoorór múk daktana.

²² Asltá buhhtaaeé' kaa oohiís, asla iri /ayiín ay baraá gi'i. Daanduú yaamu nee umuú gaaro guri /ák ihhafirír tlom'i ga /ák.

²³ Aníng amotlakwe an gawaaín i ufa tleéhh aníng i tlaquút ar maheerieé'.

²⁴ Inooín qwari gi hhaamiis, nee duuraai gin fák, i tiqtír tlákw i kwaáhh. Aníng i makaá xaraaslá' i tleés, nee dayshér qarkú koom, tidá' gur'ér ar hi'imiit.

²⁵ Tsee/aawo slaqwara gi fák, nee baraá guruú do'o dae gi fák. Masoombár daaqaay nee dasuú /amaatliiteero i hhaamiís, tam na/aá du'uumá' nee bariisér sage /awake.›

²⁶ Aníng ana oó', ‹Inooín in diyaá/ ay amór saaw, kiri inslayká nee muu gawaá daanduú yaamuwo.›

²⁷ Ala aníng axweesantá wakuuser'ín ana da'ayuút, as wakuuser'ín mingiwa adór hatlár tsáhh tari ooi, ‹Atén aga baalimaán, nee AAKOÓ MUNGÚ inooín gaa alee/isiiká.› »

²⁸ Múk Israeli a xoorór fuqurángw koomaaká. Muk'ín a múk sagalooár koomaaká tam ar niiná.

²⁹ Barnaxes inooín geeraawo i fuqurángw kona'a, geera tí ngaa tsaahhiyé', nee alhhe'eesáy'ín ngwaa aldakutiyé', axáy a adoomá.

³⁰ Xáy, heé wák múk kumuú wák adór ngur guusi? Nee múk tsár adór múk kumér mibaangw ngur baali, aqo inooín birka kwaáhh nee tlaa/ar'ín, barnaxes AAKOÓ Munguúín ga geexáy?

³¹ Looeemaawo tlaa/ar'ín an adór tlaa/areneeká, tam wakuuseerén adoorí gana kilooín ó'.

³² Asma xa'anoó sabiíbuuín a xa'anoó Sodomár daáhh, dír kunguwa huúw a Gomora, sabiíbuuwós a sabiíbuú qarkú koóm, mamuuwós i qarqariyá'.

³³ Difaáir'ín a adór qarkú dayshamo, a adór qarkú dayshe oo ló'wa tsu/uút.

³⁴ Xáy, aníng sakwasleemar'ín aga amohhe'eesiikáhe? Xáy, aníng adór inooín ngir sakwasleemuút a xuaakáhe?

³⁵ Li/aay a kwe'eé', heé gu buú' a aníng, qoomár ya'aaín birna ninkiritsimitiyé', asma deelor'ín ar amotlakwe naa xeér, alhhe'eesay'ín naa tseewúy.

³⁶ Looeemaawo AAKOÓ MUNGÚ mukós gu alekalaa/, sagadiyuuseerós ga gurtláy, qoomár birnga ár /uureemooín naa faakiyé', nee birnga ár heé meét i kaahh, oo lawaalmo nee lawaalmoowooká.

³⁷ Aluuwo Mungú in ooi, «Munguihúng kudá' taa i gobé' i amoomá? Tlaa/arhúng tidá' tay nahhaté' gaálaay?

³⁸ Kudá' muruú wahhaár oo taa ilahhooár wa tsu/é' gwaa /aay, nee kudá' difaáidá' taa ilahhooár wa hanisé' ngaa wahane' ta amá? Axáy gimsé' ni sihhitiye' nee nu alee/iisiye'. Gimsé' inooín pa/ángwií hanisaak tawa baqamorhúng.

³⁹ «Gimsé' daxta tsaahhaak adór aníng kilooé' tar Mungú, Munguú hatlá' i kaahh, aqo har aníng kilooeé'. Aníng an kudá' tsu/uút nee kudá' slafmís, kudá' nor'omiís nee kudá' hungu/umiís. Nee baraá dabaaeene heé hee gu tuú/ i kaahh.

⁴⁰ Aníng dakwe'eé' un gawaá doori tleés nee lo'o ngiri /aáy ar umuueé'.

⁴¹ Barnaxes paángar'eé' ar qwiirii/ aga aandé', nee dakw'eene sakwasleema aga tleéhh, aníng li/aay u buú' dír wakuuser'eé'. Mukdaádá' aníng i ahhiít u sakwasleemuút.

⁴² Maheerieé' in xufitiís ar tseere, paángar'eé' fu'unaay giri /ák, tseerér mukdá' taa tsuú/ nee kudá' taa hayóh, tam geeraharuusér wakuuse sleeme.»

⁴³ Kuungá' xoorúdu, mukós xirfayeemisaak, kuungá' mungúi, inós sluufmisaak, asma inós li/oó tseerdaá sagadiyuuseerós gu buu', li/aay gun buu' dír wakuuseerós nee mukdá' inós gu ahhiít gu sakwasleemuut, inós mukós nee yaamuwose gi gi hheehhee'ees.

⁴⁴ Mose ina hardáh as inós nee Yoshua garmoó Nuni, daa'angwí nguwa dír geeraá múk Israeli sleémeero wa daai.

Alqadaá Mose

⁴⁵ Alaá Mose múk Israeli sleémeero kaangwí beemuuwo nguwa hhe'eés,

⁴⁶ inooín giri báy, «/Aymi'iiká' sleémeero awa daa'angwí laarí naa dirhúng i daá', baraá munerhúng ti qase', nee na/iihúng ki hara'ayiindá', as kahhó' niwa ilakaahareesiya' axweesanoó dabeerí ooharo.

⁴⁷ Dabeerí a tlooraá taworooká dirhunge, ala an slafingwhúng oo kilá'. Kuungá' nu hotaá tleerá' ar eér baraá yaamuudá' ta aalír eera' amoodár gayuú yaaér Yordani.»

⁴⁸ Baalaadár kilae AAKOÓ MUNGÚ Mose guna báy,

⁴⁹ «Tsa/ám gawaá tloomár Abarimu, tloomár Nebo, tidár baraá yaamaá Moabu, tidá' nee gixsár Yeriko ti ga/aawá', yaamaá Kana'ani xuuxueek, kudá' ni aalír wa haniis dír múk Israeli.

⁵⁰ Daqaní kuúng a gwá' gawaá tloomadá' tay tsa/aán tay haraagwá' amór baabi'iiwók, adoodá' hhiyaawók Aroni ira gwaá' gawaá tloomár Hori iri haraagwaá' amór baabi'iiwós.

⁵¹ Asma kuungá' tsaraawo ana inkihhimu waslesé' dir'eene baraá múk Israeliwo, qoomár tawa dír ma'aá Meriba, iisaapoó Kadeshi baraá xaanxoó Sini. Qoomaadae kuungá' hhohhoaarir'eé' laqaamaro ana harslaaqaté' dír múk Israeliwo.

⁵² Kuúng tam yaamu i amór saáwá aanda, ala a datká baraá yaamuudá' aníng ni haniis dír múk Israeli.»