DABE 30 - Biblía Axweesantá Hhohho' ar Mungú 2004

Harahhifór amohhooa de'emaá hi'iita'a

¹ «Qoomár kuungá' bar baraá tla/ángw xoordudá' i dir'á', kudá' AAKOÓ MUNGÚ Munguúhúng nu i diyaá/, nee bar kaangwí sleémeero naa sláy, tsuuqaaká' nee lo'ooro kiri insleeré', kuká' laarí naa dír geerahúng i qaás as tawa tsawdiinda',

² nee barnaxes qoomaadae AAKOÓ MUNGÚ, Munguúhúng ugwa i ki/é', kuungá' nee na/iihúng, axweesantós tidá' laarí naa oó' kari iialooeesé' ar munerhúng sleémeero nee qeeremoohúng sleémeero,

³ daqaní AAKOÓ MUNGÚ, Munguúwók uri ki/is baraá amohhooarók, nee guruuwós iri tláy as kuúng, nee uri ki/is baraá xoorduudá' uy diyaa/i.

⁴ Tam geera kuungá' tunda diyaa/i baraá ku/uyaá yaamu awa saawá', AAKOÓ MUNGÚ, Munguúhúng nun burumbuúr nuri ki/is.

⁵ AAKOÓ MUNGÚ, Munguúhúng nuri huuw baraá yaamuudá' baabi'iihúng naa aaliyé' as kuungá' kiwa ala'. Inós kuungá' nu amohhooárí haniis, nee nuri tlahhas baabi'iihúng ba/a.

⁶ AAKOÓ MUNGÚ, Munguúhúng kuungá' nee na/iihúng nu ilaiwa/ameérí haniis as inós kuwa sla'a' ar munerhúng sleémeero nee qeeremoohúng sleémeero as tawa slafa'.

⁷ AAKOÓ MUNGÚ, Munguúhúng lo'oorí sleémeero gan amór wakuuserhúng xu'us, tidá' kuungá' nu slahh'eemiis, as inooín ngiwa /ak.

⁸ Kuungá' afór AAKOÓ MUNGÚ kari malé ilaiwawa/á' nee hara'ayaarós sleémeero, tí laarí ni kuungií hara'ayiyiim kari otá'.

⁹ AAKOÓ MUNGÚ, Munguúhúng kuungá' nu diihhooár yaariír i haniis baraá umuú gár ta tlehhita'a, na/aá yaariir i laqwalá', nee hikwaá yaariir i sleerá', nee qamuuhúng balángw yaariír ngu hamaareesiyá'. Asma Mungú in malé qwalaa/ kuungá' nuwa dihhooárí haniisi, ar adoodá' ira qwalaá/ baabi'iihúng giri dihhooárí haniís,

¹⁰ barnaxes kuungá' afór AAKOÓ MUNGÚ, Munguúhúng aga iiárií qasé', hara'ayaarós nee dabeerose kari oté', tidá' taa gooín baraá kitaábuuwuú dabe, nee barnaxes kuungá' AAKOÓ MUNGÚ, Munguúhúng ugwa i ki/é' ar munerhúng sleémeero, nee qeeremoohúng sleémeero.

¹¹ «Looeemaawo hara'ayaarí laarí ni kuungií hara'ayiyiím ka ló'wa gawdeeká, slám ka saaweeká dirhunge.

¹² I gawaá doorí diri'ká tam kuungá' tay oa', ‹Heé gawaá doorí tsa/ám as atén a heemá, as kahhó' ngiwa amoorén i huwi, as atén kawa axasaan nee kawa iialooeesaan?›

¹³ Laqaá sleeme i gayuú tláwtí diri'ká, tam kuungá' tari oa', ‹Heé waaraáhh ay gayuquú tlawi as atén a heemá, as kahhó' ngiwa amoorén i huwi, as atén kawa axasaan nee kawa iialooeesaan.›

¹⁴ Aasla'áy, ala /aymu ku ló'wa dirhúng i tseéw, i gawaá aferhúng nee i baraá munerhúng, as kuungá' kuwa boo/esa'.

¹⁵ «Ga/aaweek laarí aníng slafiingw nee gwa'ara nee diihhooa nee amotlakweero ngaa dír geerawók i qaás as tawa tsawdiin.

¹⁶ Barnaxes hara'ayár AAKOÓ MUNGÚ, Munguúwók aga ilaiwá/, tidá' laarí ni kuúng babaw, kuúng AAKO MUNGÚ Munguúwók kuri slá', loohirós kari eehát, kaahirós kari ót, nee dabeerose, nee hara'ayarose, kuúng daqaní a hót tari doogiín. Nee AAKO MUNGÚ, Munguúwók, kuúng turi tsuuq baraá yaamuudá' tay hotaá eer as kiwa al.

¹⁷ Ala barnaxes kuungá' munerhúng aa warqeér tari iiawaslesé', tunduri afa /aásl munguaá hatlá' kiwa sluufmisuú eera', nee kiwa sagadiyusa',

¹⁸ aníng kuungá' nun baw tundu hhaamiis. Kuungá' a tleeresa'aaká baraá yaamuudá' ta aalír eera' amór gayuú yaaér Yordani.

¹⁹ Aníng laarí doori nee yaamu i ateét tawa lamabu'uuse adór aníng slafiingw nee gwa'araro, nee tsuuqa nee lo'ooro ngira dír geeraahúng i qaás tawa tsawdiinda'. Gimsé' slafiingw tsawaraak, kuungá' nee na/iihunge, as tawa hota'.

²⁰ AAKOÓ MUNGÚ, Munguúhúng sla'aak, nee afoorós iialooeesaak, nee inós i naga'ataak. Asma adoorí bara tlehhé' an slafingwhúng nee an hotaahúng awa tleerá' baraá yaamuudá' AAKOÓ MUNGÚ aa lo'ór wa /aáy ngiwa haniisi dír baabi'iihúng Abrahamu, nee Isaka nee Yakobo.»