DABE 3 - Biblía Axweesantá Hhohho' ar Mungú 2004

Waawutmo Ogu kuwa baál

¹ «Naagáy tari alií warqawaán, tari amór yaamaá Bashanír xuaán. Waawutmo Ogu niri hardáh nee mukós sleémeero as iwa slaqwi nee atén dír isaapoó gixsár Edreír wa ale.

² Ala AAKOÓ MUNGÚ ina báy, ‹Mu da'ayumiitaar, asma ngwaa qaroó haniís gawaá dabaawók, inós nee mukós sleémeerowo dinkwa nee yaamuuwose. Kuúng inós un adór Sihoni tléhh, waawutmoó múk Amori kuduú Heshboni.›

³ «AAKOÓ MUNGÚ Munguúrén waawutmo Ogu oo Bashani nguri gawaá dabaarén i haniís, nee mukós sleémeerowo. Inooín ngiri hhaamisaán, tam heé wák aa meetiiká.

⁴ Gixsaduuwós sleémeero kiri hayohaán, tam gixsár wák ar ta hayoohaniiká i káhh. Dinkwaaro gixsaduuwós kaa hayohaán a mibeeri lahhoó', awa yaamu sleémeero kudaá Argobu, kudá' waawutmo Ogu oo Bashani aa sawaawuti'ín.

⁵ Gixsaduuká' sleémeero koo/ir'ín ka ló'wa gawden, sleeme ka tledaadet. Afér gixsaduuká' i tseegamór koón. Nee ayeemaá yaariir sleeme i dayá' awa taa harweeriiká ar koo/ír gawit.

⁶ Umuú gaaro ana hhaamiisaán amoodae, umuú gixsa kari hhitimaán, nee hhawaate nee /ameena nee na/iiwo nee gixsaduuwo ina adór kudaá waawutmo Sihoni oo Heshboni laqaán.

⁷ Ala haasaáng sleémeero oo taa baraadií awaán, hikwa nee umuú gaaro, ina ar tlawaán.

⁸ «Gawaá adoorihe, qoomaadae yaamaá waawitaádá' tsár oo xoorór Amori, kuduú gayuú da/aáw oo yaaér Yordanír hoót, ina oohaán, iimír yaaér Arnonír wa tleemu ay tloomár Hermoni.

⁹ Múk Sidoni tloomadá' ngin babaya' Sirioni, nee múk Amori ngin babaya' tloomár Seniri.

¹⁰ Gixsadaá yaariir awa yaamaá tlapapai, nee sleeme kudá' yaamaá Gileadi nee Bashani ay Saleka nee Edrei, gixsadaá waawutmo Ogu oo Bashani, ina hayoohaán.

¹¹ «Waawutmo Ogu an heé alhhe'eesáy oo múk Refai. Sandakmoowós kuna tleéhh ar muqsli, tlenaangós a miíta tsiyáhh, nee bihheero a tsaxwaá miíta tsár, qoomoó alhotaariro. Sandakmoodá' tam ay hamí i deer baraá gixsár Raba ar múk Amoni.

Tlahha'aá bihhaá da/aáw awa Yordani ngaa hootiye'

¹² «Qoomár yaamuudá' kiwa hayohaán, ina haniís dír tlahhoó Reubeni nee oo Gadi yaamuudaá bihhaá /iikuú wa tlawá' awa Aroeri isaapoó yaaér Arnoni nee tlaqtá yaamaá tlom'i awa Gileadi dinkwa nee gixsaduuwose.

¹³ Naagáy yaamuudá' naa meetiyé' awa Gileadi ina haniís dír tlaqtá tlahhoó Manase, dinkwa nee yaamaá Bashani sleémeero, kudá' Ogu aa sawaawuti'ín, an yaamaá Argobu sleémeero ay yaamaá Bashani sleémeero, kudá' aáng ta báy yaamaá múk Refai.

¹⁴ «Yairi heé tlahhoó Manase yaamu sleémeero awa Argobu gina hayóh, an yaamaá Bashani ay dír digimuú múk Geshuri nee múk Ma'aka. Yaamu sleémeero gina umuuwós ar ateét, tam ay laarí yaamuudá' ki bay Hawot-yairi.

¹⁵ «Múk tlahhoó Makiri oo hhay Manase ina yaamaá Gileadír i haniís,

¹⁶ nee múk hhay Reubeni nee Gadi ina yaamu sleémeero awa amór Gileadi ay yaaér Arnonír i haniís, digmuuín bihhaá basko a tla/ángw yaae. Nee bihhaá /iiko a yaaér Yaboki tidár digmuú xoorór Amoni.

¹⁷ Bihhaá /uwaawo yaamuuín ay yaaér Yordani, bihhaá /iiko tlawtá Galilaya ngina wa tláy, iri kumiít ay tlawtá Araba, an tlawtá Diwi, ay /etángw Pisga bihhaá da/aawe.

¹⁸ «Qoomaadae ina kaangwí báw, ‹AAKOÓ MUNGÚ, Munguúhúng yaamuudaá bihhaá da/aáw awa yaaér Yordani ngaa kuungá' i haniís as tawa daqaari'iimarhúng. Hám daxta kuungá' awa miguuse dír tla/ángw hhaeehunge, xooslár slaqwara oohaak, yaaér Yordaniro geerií waaraahhé', dír hhaeehúng awa Israeliro.

¹⁹ Ala tlaawayhúng, nee na/iihúng, nee hikwaahúng a xuú' adór kuungá' muruú yaariír kur koondá', inooín i meetiye' dír gixsaduuhúng kudá' naa haniís.

²⁰ Hhaeehúng awa múk Israeli alee/iisaak ay dír AAKOÓ MUNGÚ ngway amohhooárí haniisi, adór kuungá' amohhooa kara sleeré' as inooín sleeme yaamuudá' AAKOÓ MUNGÚ, Munguúhúng naa haniís gayuú yaaér Yordaniro /uwa ngiwa aaliya'. Alaá tihe daqaní kuungá' ta ki/á' baraá yaamuuhúng kudá' naa haniís as tawa koohúng.›

²¹ «Naagáy Yoshua nguri báw, ‹Kuúng kaangwí ilaawoge ugwa aán sleémeero adoodá' AAKOÓ MUNGÚ, Munguúwók aa tleéhh dír waawitaáwí tsare, Sihoni nee Ogu. Ala inós sleeme waawitaádú yaamuudá' sleémeero tar waarahha' gin adoorí laaq.

²² Mada'ayumiitaara', asma AAKOÓ MUNGÚ, Munguúhúng kuungá' nu aleeslaáqw.›

Mose kuwa sií' dahamaá yaamaá Kana'aniro

²³ «Qoomaadae AAKOÓ MUNGÚ una ló'wa harhheehhe'eés niwa kah,

²⁴ ‹Aá, AAKOÓ MUNGÚ, anuú sagadiyusmoowók a xuú' adór kuúng ira sangw aleesleemuuwók oo úr i laqaán. Asma a mungú gaalá gawaá dooriwo, laqaá baraá yaamuwo oo muruú urén nee oo waa/oo/amo oo adór kwí tleehharo gu aleesláw, kwí kuúng taa tlehhít?

²⁵ Aníng kuúng un firiím ni waaraáhh yaaér Yordaniro, yaamuudá' hhoohhoo' awa bihhaá /uwa Yordaniwo masók i ár, yaamaá ló'wa hhoohhoo' awa tlom'aá hhohhó' koomá', dinkwa nee tlom'aá Lebanoni.›

²⁶ «Ala aníng tina i buúhh nee AAKOÓ MUNGÚ as kuungá', iiárií qaasaro iri sií', kitaangose iri báy, ‹A ido! Ma male ki/aar axweesantisinge.

²⁷ Tsa/ám ay gawaá tsitsinír tloomár Pisga, ta ló'wa qaytsita hhe'és bihhaá /uwa, nee /iya, nee basa, nee bihhaá da/aáw, yaamuudá' ki xuuxú', ala kuúng yaaér Yordani a waarahhká.

²⁸ Ala kuúng Yoshua ku hara'arií ó', miwa mune sií' nee i /atli, asma inós mukwí gu geerahaar ay gayuqá', nee yaamuuqá' kuúng taa aán ngiwa aaliya'.›

²⁹ «Naagáy tari diirií meetaán baraá xatstá geeraá Bet-peori.»