DABE 29 - Biblía Axweesantá Hhohho' ar Mungú 2004

Alqadór Mungú nee múk Israeli baraá yaamaá Moabuwo

¹ Kaangwí an axweesanoó alqadór AAKOÓ MUNGÚ oo Mose nguwa hara'ayín nguwa tleehhi dinkwa nee múk Israeli, qoomár tawa baraá yaamaá Moabu i dirii'i, dinkwa nee alqadoodá' AAKO MUNGÚ aa tleehhi dír tloomár Horebu wa ale.

² Mose múk Israeli sleémeero guna dinkwárí ateét, guri báy, «Kuungá' ilaahunge aga aandé' adór AAKOÓ MUNGÚ aa tleéhh dír waawutmoó Misri, nee geeraharuuserose, nee sagadiyuuseerose, nee yaamuuwós sleémeero.

³ Kuungá' slahh'eemisuú yaariír kudá' ugwa aandé', nee layudaá yaariire nee muruú waa/oo/amooro.

⁴ Ala tam ay laarí AAKOÓ MUNGÚ fuqurángw muruuwí kur tsahha' nee ilaá tar xumisa', nee iaá tar axasa' nga hanisiiká.

⁵ Gawaá har afiqoomár kureeraá mibeeraá tsiyahhe, Mungú kuungá' nuna geerahaár baraá xaanxaywo, tlabaahúng kudá' taa dahasé' naa slaxarumiti'iiká, laqaá ya/ataahúng naa harfarkini'iiká baraá ya'ahunge.

⁶ Mikaáte aga /agi'iiká, laqaá difaái aga wati'iiká, laqaá gár onitamis tam ar niiná, as kawa tsahha' adór AAKOÓ MUNGÚ tar Munguúhúng.

⁷ Nee qoomár tawa baraá ayawií hardahaán waawutmo Sihoni oo Heshboni, nee waawutmo Ogu oo Bashani nina hardiyé', as niwa slaqwarár aya' amoorén, ala atén ina baalaán.

⁸ Yaamuuín kiri hayohaán kiri qasisaán dír múk tlahhoó Reubeni, nee oo Gadi, nee tlaqtá tlahhoó Manase, as tawa aalir'ín.

⁹ Gawaá adoorihe ilakaaharu tleehhaak alqadoorí kawa ota', as kahhó' kuungá' diihhooa kawa sleera' baraá gadiyeduuhúng sleémeero awa taqo tlehhita'a.

¹⁰ «Hám laarí kuungá' aga sihhté' dír geeraá AAKOÓ MUNGÚ, Munguúhúng, kuungá' sleémeero awa geeraharuusér tlahhi'i nee bariiseero, nee geeraharuuserhunge,

¹¹ nee na/iihunge nee tlaawayhunge, nee hoomár baraá ayaahúng hoota, tidá' migiruú feehhamiis, nee tidá' ma'ayhúng hhekiita.

¹² Kuungá' a diirí as lo'o kawa /aga' ar tawa data' baraá alqadór AAKOÓ MUNGÚ, Munguúhúng laarí.

¹³ Inós laarí kuungá' nu gawdes tawa mukós, nee inós tari Munguúhúng, adoodá' ngira lo'ór wa /aáy dír kuungá' nee baabi'iihúng, Abrahamu, nee Isaka nee Yakobo.

¹⁴ Slám aníng laarí alqadoorí a tlehhitaaká as kuungá' kiloohúng, nee axweesanaywuú lo'oorí u kaahaaká as kuká' hamí naa burumburiitiye' laarí dír geeraá AAKOÓ MUNGÚ, Munguúrén,

¹⁵ ala aqo as daanduú kudá' ta sangw laqwaali sleeme.

¹⁶ «Kuungá' a xuá' adoodá' tara hootaán baraá yaamaá Misriro, nee adoodá' tara hi'imitaán yaamaá xoordaá hatlae sleeme.

¹⁷ Kuungá' slaqsi'ii'ín kudá' ló'wa buhhtamisá' iga aandé' awa munguaá taa tleéhh ar xaai nee tlaa/e, nee peésa nee sahaábu.

¹⁸ Gimsé' ti harmagahhe' laarí hhawaata laqaá /ameeni, laqaá heé doohúng, laqaá oo tlahhayhúng tumu wák oo diirí wa sihhmiít laarí, oo AAKOÓ MUNGÚ, Munguúrén gu sií', miwa deeruút, iri munguaá xoordaá hatlá' sagadiyér áy. Gár adór tí an adór dee/armoó aa harmaa/, mamaá qarqará' giri laqwaál, kudá' qarkú koomá'.

¹⁹ Barnaxes axweesanoó alqadoorí, tí hamí lo'o kawa /agé', hee gwaa axaás, aluuwo iri sagós ar awín, nee iri ooi, ‹Aníng gár i aw i káhh, tam aníng sagagawduueé' bura eehár,› gaarí kuungá' sleémeero nu fák, múk tlákw nee oo hhoe.

²⁰ AAKOÓ MUNGÚ, heé adór kwí gu baloó gurtlayká, nee buhhtaá AAKOÓ MUNGÚ nee da/itose heewí ngu al'oohiyá', lo'o sleémeero ar taa gooín baraá kitaábuuwí heedaádá' gu /ák, nee AAKOÓ MUNGÚ umuú heedaádá' gun fiits gawaá daanduú yaamuwo.

²¹ AAKOÓ MUNGÚ heedaádá' gun paraatl dír tla/ángw tlahh'i sleémeero awa Israeliwo, as amotlakwe nguwa sleer ar adór lo'oodá' sleémeero ar alqado i diri', tidá' ta gooín baraá kitaábuuwuú dabe.

²² «Qartadá' aluúwaá hardah, ar xwaylarhúng nee ar hoomár amór saáwá hardah baraá ayaahúng, ngi ariyá' adór AAKOÓ MUNGÚ yaamuuká' ngira amotlakwérí huúw, nee slahh'amaayeero,

²³ nee adór yaamuuká' asla ngira hhitiín, nee diwto, nee adór asla ngira qororo'ós, gár ki dahamiisi káhh, gár i laqwalina' i káhh, tam gitsór ti'imiit i káhh, a adór qoomaadá' AAKOÓ MUNGÚ yaamaá Sodoma nee Gomora nee Adma nee Seboimu ngira hhaamiís ar buhhtaawós kudá' xaraaslá'.

²⁴ Muruuwí bur ngwa ariyé', inooín nee xoordu sleémeero tari ooi, ‹Ahaá waáy, gár AAKOÓ MUNGÚ yaamuuká' ngisa adoorí laáq? Buhhtaá adór kuká' gár i laqaqana' a milá?›

²⁵ Naagáy muu iri ooi, ‹Asma inooín alqadór AAKOÓ MUNGÚ ngina mayé', Munguú baabi'ii'ín kudá' alqado gaa tleehh qoomár inooín ngiwa baraá yaamaá Misrír wa duúx,

²⁶ inooín nina tlayé', munguaá hatlá' ngina sluufmisiyé' nee ngiri firór ayé', munguaá aáng inooín naa xui'iiká, laqaá tam AAKOÓ MUNGÚ gaa ádbayká.

²⁷ Gawaá adoorihe, AAKOÓ MUNGÚ buhhtaawo ina daa/atúy daanduú yaamuuká', nee lo'oodá' sleémeero taa gooín baraá kitaábuuwí, yaamuuká' giri /ák.

²⁸ AAKOÓ MUNGÚ giri tlatlahhaás baraá yaamuuín wa ale ar buhhtaá xaraasla', giri kwaáhh baraá xoordaá hatlá' adoodá' hamí laarí i dirii'iya'.›

²⁹ «Muruú naaqo oo AAKOÓ MUNGÚ, Munguúrén, ala muruudá' taa geehhooatís a koorén nee na/iirén ay alhhe'eesay wasle, as axweesanoó dabeerí kuwa harmagahhaan.»