DABE 27 - Biblía Axweesantá Hhohho' ar Mungú 2004

Dabér Mungú ar taa gooín gawaá parhheemaá tlaa/e

¹ Naagáy Mose nee bariisér Israeli tawa dinkwárí dirii'i, múk Israeli sleémeero guna báy, «Hara'ayaarí laarí ni kuungií hara'ayiyiim oohaak.

² Bál yaaér Yordani bara waarahhé', nee tari daté' baraá yaamaá AAKOÓ MUNGÚ, Munguúhúng ni haniisi, tlaa/aá uren ki sihhá' nee ki daandeemo ninkiritsá'.

³ Gawaá dandeemaá tlaa/eedae /aymi'i sleémeero awa dabeerí ki gooiindá' qoomár bara daté' baraá yaamuudá' diihhooár ilwa nee dane, kudá' AAKOÓ MUNGÚ, Munguú baabi'iihúng naa al'axweés.

⁴ Qoomár bar yaaér Yordaniro aga waarahhé', tlaa/eeká' sihhaak gawaá tloomár Ebali, ar adoorí laarí ngira dirhúngií hara'ayiím, nee ki ninkiritsá'.

⁵ AAKOÓ MUNGÚ, Munguúhúng amoodae kitángw ilahhooa ti tlehhe' ar tlaa/e awa taa dakwiiká ar muqsla.

⁶ Kuungá' kitángw ilahhooár AAKOÓ MUNGÚ, Munguúhúng kudá' ta tlehha' masók aqo un tlehhá' ar tlaa/aá taa dakwiiká. Daqaní gawaá kitaangwihe AAKOÓ MUNGÚ, Munguúhúng ilahhooár da/a ti hanmise'.

⁷ Inós ilahhooár muruú ta tsu/i ti hanise', nee ka didá' wa /agá', nee ta qwalala/á' dír geeraá AAKOÓ MUNGÚ, Munguúhúng wa ale.

⁸ Gawaá daanduú tlaa/eedá' taa ninkiritsi axweesanayduú dabe sleémeero gooiro geehhooeesa hhe'eesaak.»

⁹ Aluuwo Mose dinkwa nee kaahamuusér Mungú, tidár tlahhoó Laáwi, múk Israeli sleémeero nguri bayé', «Iia qaasaak, kuungá' múk Israeli, hám laarí kuungá' aga múk AAKOÓ MUNGÚ, Munguúhúng tleehhité'.

¹⁰ Gawaá adoorihe afór AAKOÓ MUNGÚ, Munguúhúng iialooeesaak, hara'ayaarós nee kaahirose oohaak, tí laarí naa kuungií hara'ayiím.»

Lo'o as iiawasle

¹¹ Baalaadae Mose muu guri adoorí báy,

¹² «Kuungá' yaaér Yordani bar aga waarahhé', tlahhi'iiká' i sihhiitiye' gawaá tloomár Gerisimu, as muu nguwa tsuuqiya': Tlahhoó Simeon, nee oo Laáwi, nee oo Yuda, nee oo Isakari, nee oo Yosefu nee oo Benyamini.

¹³ Nee tlahhi'iiká' i sihhiitiye' gawaá tloomár Ebali qoomár lo'ooro: Tlahhoó Reubeni, nee oo Gadi, nee oo Asheri nee oo Sebuluni nee oo Dani nee oo Naftali.

¹⁴ Múk tlahhoó Laáwi kaangwí ngu ilahaniisiye' dír múk Israeli sleémeero ar afór ur, ta ooi,

¹⁵ «Umuúqo heewo oo slaqsaay gwaa tleehh, laqaá gwaa kwahhuut, nee umuúqo gaaro ar taa tleéhh ar daba' kari qawti sihhtís, tidá' AAKOÓ MUNGÚ i waki, kwaa lu'ús.» «Nee muu sleémeero ta ooi, Amin.»

¹⁶ «Umuúqo heewo oo baabuúwós, laqaá aayoorós waaqaqaá', kwaa lu'ús.» ‹Nee muu sleémeero ta ooi, Amin.»

¹⁷ «Umuúqo heewo oo digimuú inslaawmoowós gwa surkuús, kwaa lu'ús.» «Nee muu sleémeero ta ooi, Amin.»

¹⁸ «Umuúqo heewo oo heé taampa gwa loohi qwaarees, kwaa lu'ús.» «Nee muu sleémeero ta ooi, Amin.»

¹⁹ «Umuúqo heé hariímár hoomoó ayaahúng hoót, laqaá ar na/oó panmo, laqaá ar /ameenír kwaalo'o gaa paslis, kwaa lu'ús.» «Nee muu sleémeero ta ooi, ‹Amin.»

²⁰ «Umuúqo heé aa qaat nee harér baabuúwós, kwaa lu'ús.» «Nee muu sleémeero ta ooi, Amin.»

²¹ «Umuúqo heé tsaatu'uuma ga ay dír makiito'ór umuú daa'awto, kwaa lu'ús.» «Nee muu sleémeero ta ooi, Amin.»

²² «Umuúqo heé aa tsaatu'uumár ay dír hho'oorós, barnaxes an dasír baabuúwós laqaá an dasír aayírós, kwaa lu'ús.» «Nee muu sleémeero ta ooi, Amin.»

²³ «Umuúqo heé aa tsaatu'uumár ay dír aayír hareerós, kwaa lu'ús.» «Nee muu sleémeero ta ooi, Amin.»

²⁴ «Umuúqo heewo oo hee gwaa qawti gaas, kwaa lu'ús.» «Nee muu sleémeero ta ooi, Amin.»

²⁵ «Umuúqo heé ta bui as heé dakuúsár koomaaká nguwa gaasi, kwaa lu'ús.» «Nee muu sleémeero ta ooi, Amin.»

²⁶ «Umuúqo heé axweesantá dabeerí gaa haalin nee gaa iialooeesiiká, kwaa lu'ús.» «Nee muu sleémeero ta ooi, Amin.»